Feni Sma Di Abi Belangstelling, Nanga Yepi fu Stratiwroko Di Abi Bun Bakapisi
1 Yesus ben leri den disipel fu en fu suku sma di e frudini fu yere a Kownukondre bun nyunsu (Mat. 10:11). Toku, ini furu kontren na ini a ten disi, a e kon tron muilek moro nanga moro fu miti sma na den oso fu den. So bun, san wi kan du fu miti sma di e frudini dati, èn di wi ben sa misi kande?
2 Stratiwroko kan de wan bun fasi fu feni sma di wi ben misi na a oso-fu-oso wroko. Wi kan du stratiwroko na bushalte, krosibei fu oso na den publiki presi pe sma e koiri, èn na tra publiki presi pe sma e waka pasa te den e du den aladei afersi fu den.
3 Te sma e taki fu stratiwroko, dan sonwan e frede. Den e draidrai kande fu abi wan prati na a wroko dati fu di den e syen, noso fu di den e fruwakti taki sma di no lobi a Kownukondre boskopu, sa weigri fu arki den. Moro furu den broko-ede disi na fu soso. Den wan di abi ondrofeni ini a wroko disi, e taki dati a no de moro muilek leki a oso-fu-oso kotoigiwroko. Moro leki dati srefi, den ben kon si taki furu sma gwenti taki trawan e waka miti den na strati fu difrenti reide ede, èn sonwan wani taki nanga tra sma noso arki tra sma moro leki den ben sa du dati te wi ben sa naki na a doro fu den. So bun, efu wi ’teki deki-ati’, èn du dati, dan wi kan abi bun bakapisi di wi no ben fruwakti.—1 Tes. 2:2.
4 Fa wi kan du a stratiwroko, so taki wi kan abi moro bun bakapisi? A de prenspari fu sreka bun. Leisi den tijdschrift na fesi, èn teki wán noso tu penti fu taki fu den di yu e denki taki den sa wiki a belangstelling fu den sma di yu sa miti. Wan pristeri fu 30 seconde de nofo. Sensi a marki de fu miti trawan persoonlijk, dan wi musu tanapu na wan presi pe furu sma e waka pasa doronomo. Ala di a kan de wan bun sani fu abi wan tra preikiman krosibei, toku furutron, a moro bun fu ibri sma wroko aparti. Preikiman di e tanapu makandra, kande sa wani fu pasa a ten nanga a taki di den e taki nanga makandra èn dan den no sa de na ai fu si den wan ini a publiki di wani arki a Kownukondre boskopu.
5 Tanapu na wán presi èn sori sma den tijdschrift nomo, no abi so bun bakapisi leki te yusrefi e waka go miti sma. Pruberi fu luku a sma na ini en ai. De nanga switifasi èn no draidrai te yu e pruberi fu bigin wan takimakandra. Na ini son kefal a kan de so taki, yu musu waka wan pisi nanga a sma, ala di yu e taki nanga en. Efu a e gi yesi, dan pristeri den tijdschrift. Efu a e weigri fu teki den tijdschrift, dan yu kan pristeri wan traktaat.
6 Na ini moro furu kefal, a de moro bun fu sreka wan syatu pristeri di e poti wan aksi noso e taki wan sani di sa wiki a belangstelling fu sma. Efu a sma e piki na wan bun fasi, dan pruberi fu kisi en nen, adres, nanga kande srefi a telefon nomru fu en, so taki yu kan go baka na a sma fu kweki a belangstelling di a abi. Yu ben sa kan taki: „Efu yu ben sa wani leri moro, dan mi ben sa wani fisiti yu na yu oso, noso seti sani so taki wan tra Kotoigi kan du dati.”
7 Wan owruman di ben du stratiwroko ben waka miti wan uma èn a ben kon sabi taki na uma noiti ben abi na okasi fu taki nanga den Kotoigi na en oso. Na uma ben teki wan buku èn a ben agri fu wan sisa fisiti en na oso tapu wan ten di fiti. Wi seiker kan feni moro furu sma di e frudini dati èn wi kan yepi den efu wi e du stratiwroko nanga bun bakapisi.—Tori. 17:17.