A Preiki Di Wi E Preiki E Meki Taki Wi De Tra Fasi
1 Furu sma e aksi: „San e meki Yehovah Kotoigi de tra fasi leki den tra relisi?” San yu ben o piki? Yu ben sa kan tyari sani di wi e bribi kon na krin, di de fu feni na ini Bijbel. ¿Ma yu prakseri tu fu sori sma fa a publiki diniwroko fu wi e meki wi de so aparti fu den tra relisi?—Mat. 24:14; 28:19, 20.
2 Na ini a ten disi, yu no abi furu kerkisma di e firi a krakti di musu buweigi den fu prati den sani di den e bribi nanga trawan. Kande den e denki taki a nofo fu du san den wet fu Caesar e taki, èn taki a nofo fu libi wan moreel krin libi, noso fu du bun sani gi trawan. Ma den no e firi a fruplekti fu yepi trawan fu leri den sani san a Bijbel e taki fu a kisi di sma kan kisi frulusu. Fa wi de tra fasi?
3 A fayafaya diniwroko fu wi de heri tra fasi leki den sani di den tra relisi e du. Moro leki 100 yari, Kotoigi fu a ten disi preiki a bun nyunsu fayafaya te na a moro farawe pisi fu grontapu, neleki den fositen Kresten. A marki fu wi fu du disi na fu yepi someni sma leki wi man fu tyari den libi kon de leki fa Gado wani.—1 Tim. 2:4; 2 Petr. 3:9.
4 Fa Sma Sabi Yu? ¿Sma sabi yu leki wan fayafaya preikiman fu a Wortu fu Gado? (Tori. 17:2, 3; 18:25) ¿Den birtisma fu yu kan si wantewante na yu preikiwroko san na a difrenti na mindri a relisi fu den nanga di fu yu? ¿Den sabi yu leki wan sma di e angri fu prati a howpu fu en nanga trawan? ¿Yu abi wan fasti gwenti fu teki prati na ini a diniwroko? Hori na prakseri taki wi de tra fasi no fu a nen fu wi wawan, ma so srefi fu di wi e du san a nen e taki—a preiki di wi e preiki fu Yehovah.—Yes. 43:10.
5 A lobi di wi lobi Gado nanga den sma na wi sei e gi wi a krakti fu du a preikiwroko (Mat. 22:37-39). Fu dati ede, neleki Yesus nanga den apostel, na so wi wani gebroiki ala okasi fu prati a Kownukondre boskopu nanga trawan. Meki wi go doro fu preiki a bun nyunsu fayafaya gi den wan di wani arki. Te wi e du disi, dan a sa yepi den wan di abi wan opregti ati fu ’si a difrenti na mindri wan sma di e dini Gado nanga wan sma di no dini en’.—Mal. 3:18.