Wan Brifi fu a Tiri Skin

Wi kotoigi fu Yehovah breiti trutru nanga a grani di wi abi! Leki Kotoigi fu Yehovah wi no abi a grani wawan dati wi sabi a wan-enkri tru libi Gado, Yehovah, a Mekiman fu na universum, ma so srefi taki wi e tyari en nen èn taki wi e dini en. Disi na a moro bigi blesi di de!​—Yes. 43:12; Hebr. 8:11.

Wi e howpu fu kisi frulusu èn wi abi a komando fu preiki a bun nyunsu fu a Kownukondre so taki trawan kan anbegi Yehovah tu èn abi a srefi howpu leki wi (Mat. 24:14; Rom. 10:13, 14; 1 Tes. 5:8). Wi breiti tu taki wi na wan bradafasi fu anbegiman na heri grontapu di abi lobi èn e yepi makandra. Ala den sani disi na trutru wan moi blesi!

Dati meki Bijbel e gi wi a deki-ati di fiti: „Dini Yehovah nanga prisiri. . . . Kon na ini den portu fu en nanga tangi, na ini den fesi dyari fu en nanga prèisesingi. Gi en tangi, blesi en nen. Bika Yehovah bun; en lobi bun-ati de te ten di no skotu, èn en getrowfasi de fu a wan geslakti go miti a tra geslakti” (Ps. 100:2-5). A dini di wi e dini Yehovah nanga prisiri abi langalanga fu du nanga wan bun matifasi nanga en. Gado e sorgu taki wi man abi so wan matifasi nanga en, èn wi abi a grani fu meki a matifasi disi kon moro bun. Te wi abi a sortu matifasi disi, dan wi sabi taki ala ten Yehovah man yepi wi èn taki a man tranga wi te wi de na ini wan nowtu. Wi de seiker taki a man gi wi krakti na yeye fasi èn taki a man gi wi a tiri di wi abi fanowdu fu kakafutu gi den tyalensi fu libi na ini den lasti dei fu a seti disi fu sani. Awinsi sortu kwinsi e miti wi, wi e prisiri nanga a diniwroko fu wi, èn wi e taigi Yehovah tangi ibri dei bika, neleki fa en Wortu e memre wi, ’a e sorgu gi wi’.​—1 Petr. 5:7.

Fu tru, Yehovah blesi wi bogobogo na ini a yari di pasa. Na a „Duman fu a Wortu fu Gado” Distrikt Kongres wi ben prisiri srefisrefi taki makandra nanga dusundusun trawan di abi a srefi sortu warti bribi leki wi, wi ben man singi èn nyan bun fu Yehovah en tafra na yeye fasi. Na a Gemeente Bukustudie wi bribi ben kon moro bigi, fu di wi ben studeri makandra a buku di nen ¡Poti Prakseri na a Profeititori fu Danièl! Boiti dati, a ben de trutru wan prisiri sani fu kisi Pisi 1 fu a nyun publikâsi di nen A Profeititori fu Yesaya—Leti gi a Heri Libisma Famiri! ’Wi beker furu srefisrefi.’​—Ps. 23:5.

Na trutru wan prisiri sani fu sabi taki milyunmilyun fu wi, brada nanga sisa na yeye fasi, e dini Yehovah na ini wánfasi! O fa a e gi wi deki-ati te wi e leisi fu den nyun heimarki fu a preikiwroko! Wi breiti taki bun furu sma ben konmakandra nanga wi na a Memrefesa fu a dede fu wi Masra — èn taki den ben du dati awinsi fa a situwâsi fu grontapu de. Te wi e luku a heri grontapu, dan a krin taki „a kotiwroko bigi trutru” (Luk. 10:2). A yari di pasa, ibri wiki so wan 5555 bijbelstudenti ben meki go na fesi so taki den ben man sori taki den gi densrefi abra fu di den ben teki dopu na ini watra. Ala di a kotiwroko moro bigi na ini son pisi fu grontapu, toku wi alamala e prisiri nanga den sani di Yehovah e du. Wi e si krinkrin buweisi taki a e blesi den muiti di den dinari fu en e meki na ini wánfasi.

Wan tra sani di ben meki taki wi ben prisiri srefisrefi, na taki nyun Kownukondre zaal ben bow! Wi breiti trutru fu si taki den brada nanga sisa fu wi fu den pôti kondre ben yepi trutru fu du a wroko disi. Hondrohondro Kownukondre zaal bow kaba nanga yepi fu Kownukondre zaal bow-grupu di ben kisi a leri di den ben abi fanowdu. Den brada disi e go fu a wan gemeente go na a trawan na ini den eigi kondre fu teki fesi na ini den Kownukondre zaal bow-programa. Fu di dusundusun Kownukondre zaal musu bow ete, meki moro friwani wrokoman de trutru fanowdu na ini den pôti kondre fu yepi pe a de fanowdu. Efu yu e libi na ini so wan kondre, yu e sorgu taki yu de klariklari fu yepi? Fu tru, den brada nanga sisa o warderi en srefisrefi taki den abi den eigi Kownukondre zaal pe den kan konmakandra fu anbegi! Den e warderi en srefisrefi taki a bradafasi na heri grontapu e yepi den fu di den e gi moni so taki den kan abi den eigi Kownukondre zaal!

Den nyunsu fu krututori di wi wini e meki taki wi e prisiri tu. Ma toku a de so taki, na ini furu presi sma di abi makti ben o wani gens wi fu wi no anbegi Yehovah. Te wi abi fu du nanga den situwâsi disi, dan wi kan de seiker taki, te Yehovah musu yepi sma dan a no abi trobi omeni gensman de noso o swaki a gersi taki den dini man fu en de (2 Kron. 14:11). Wi e prèise trutru unu alamala brada nanga sisa di e go doro fu tan tanapu steifi ini a tru anbegi.

Go doro fu tranga un bribi èn fu frutrow tapu Yehovah trutru taki a o tiri unu te unu e tan du den frantwortu fu unu leki Kresten nanga prisiri (Odo 3:5, 6). No wan reide no de fu lasi-ati, awinsi sortu sani a feanti e kisi pasi fu du. Memre sortu deki-ati Elisa en futuboi di ben e frede srefisrefi ben kisi: „No frede, bika moro de di de nanga wi leki den wan di de nanga den” (2 Kow. 6:15-17). Na ini a ten disi Yehovah legre di de na hemel de srekasreka fu kibri den sani di abi fu du nanga a tru anbegi soleki fa dati ben de na ini den dei fu Elisa. Wi abi frutrow te wi e prakseri a ten di e kon. Yehovah e basi ala sani. Den nâsi no man feti nanga en. A gi en manpikin ala makti fu tiri. „Koloku fu ala den wan di e suku kibri na en.”​—Ps. 2:1-6, 12.

Unu lobi brada nanga sisa, grantangi, hori na prakseri taki wi e memre unu ala ten. Wi e begi trutru taki ibri wan fu unu „kan de lepi sma di abi wan tranga bribi na ini ala sani di Gado wani”.​—Kol. 4:12.

Den brada fu unu,

A Tiri Skin fu Yehovah Kotoigi