Frutrow Tapu Yehovah fu Kisi Krakti
1 Furu sani de fu san ede wi musu frutrow tapu Yehovah. A wroko fu preiki a bun nyunsu „na heri grontapu pe sma e libi” no makriki srefisrefi (Mat. 24:14). Ala ten baka wi e feti nanga wi sondu skin (Rom. 7:21-23). Boiti dati, wi abi fu „feti nanga . . . den grontapu tiriman fu a dungru disi [di hei moro leki libisma]” (Ef. 6:11, 12). A de krin taki wi abi yepi fanowdu. Fa wi kan kisi a krakti fu Yehovah?
2 Fu Di Wi E Begi: Yehovah e gi a tranga santa yeye fu en na den futuboi fu en bogobogo te den e aksi fu kisi dati (Luk. 11:13). Yu e firi taki yu no koni nofo fu gi kotoigi oso fu oso, na strati, noso nanga yepi fu telefon? Yu e fredefrede fu preiki te wan okasi de? Yu no abi a srefi faya moro fu di sma na ini a birti no wani arki a boskopu? San yu kan du efu sma e dwengi yu fu libi a bribi fu yu? San yu kan du te sma wani broko a soifri retifasi fu yu? Yu musu frutrow tapu Yehovah. Begi en fu a gi yu krakti.—Fil. 4:13.
3 Fu Di Wi E Studeri: Neleki fa wi e kisi krakti te wi e nyan, na so wi e kisi krakti na yeye fasi tu te wi e studeri Gado Wortu doronomo èn te wi e studeri den publikâsi fu „a getrow èn koni srafu” (Mat. 4:4; 24:45). Di den ben aksi Stanley Jones san ben gi en a krakti fu horidoro di den ben sroto en, en wawan na ini wan kamra na dungru-oso furu yari langa, dan a ben taki: „Wi man tanapu kánkan ini bribi. Ma a no de fu taki dati wi musu studeri fosi. Wi no abi krakti efu wi no e studeri.”
4 Fu Di Wi E Go na den Konmakandra: Na wan Kresten konmakandra fu a fosi yarihondro, Yudas nanga Silas „ben gi den brada deki-ati nanga furu lezing èn den ben tranga den” (Tori. 15:32). Na so a de tu nanga den sani di wi e yere na den konmakandra ini a ten disi. Den sani disi e meki taki wi e warderi Yehovah moro furu, taki wi bribi e kon moro bigi èn taki wi e kisi deki-ati fu du a preikiwroko. Den konmakandra e gi wi furu okasi fu miti ’tra wrokoman fu a kownukondre fu Gado’ èn den wan disi e ’yepi fu di den e gi wi tranga’.—Kol. 4:11.
5 Wi abi yepi fanowdu ini den ’muilek ten disi, di tranga fu pasa’ (2 Tim. 3:1). Den wan di e kisi krakti fu Yehovah e gi wi a dyaranti taki: „Den sa opo go na loktu nanga frei neleki aka. Den sa lon èn den no sa kon swaki; den sa waka èn den no sa kon weri.”—Yes. 40:31.