Wan brifi fu a Tiri Skin
Now di wi de na ini den fosi yari fu a di fu 21 yarihondro, a e gi wi bigi prisiri fu skrifi a brifi disi gi ’a heri brada libimakandra’ di de na ala sei fu grontapu, èn fu prèise unu gi a tranga wroko di unu e du (1 Petr. 2:17). Pikinmoro leki 2000 yari pasa, Yesus ben aksi: „Te a Manpikin fu libisma doro, a sa feni a bribi na grontapu trutru?” (Luk. 18:8) A fasi fa unu ben wroko fayafaya na ini a diniwroko a yari di pasa, e meki taki sondro tweifri a piki tapu na aksi disi fu Yesus na, iya! Sma ben kosi èn spotu son wan fu unu fu a bribi fu unu ede. Na furu presi unu e kisi fu du nanga orloku, rampu, siki, nanga angriten (Luk. 21:10, 11). Ma fu di unu de fayafaya fu du bun wroko, meki te now ete Yesus kan „feni a bribi na grontapu”. A no de fu taki, dati bigi prisiri de na ini hemel fu dati ede!
Wi sabi taki a no makriki fu horidoro. Prakseri sortu tesi den brada fu wi e miti na ini wan fu den kondre na a westsei fu Asia. Na ini a kondre dati sma abi a gwenti fu du Yehovah Kotoigi ogri. No tumusi langa pasa, skowtu ben tapu wan bigi konmakandra di den ben hori na wan bun fasi sondro dyugudyugu pe sowan 700 sma ben de. Fu di son pasi ben tapu, meki taki sowan 1300 sma no ben man kon na a konmakandra srefi. Wan grupu ogri-ati sma di ben tapu den fesi, ben broko kon na ini a presi pe a bigi konmakandra ben hori. Wan tu skowtu ben de na den mindri tu. Den fon den sma di ben de drape èn den bron a sani di den brada ben meki fu hori a bigi konmakandra dati. Na difrenti tra okasi, sma di e hori steifi na den fromu kerki denki fu den, ben fon den brada fu wi na wan tumusi ogri-ati fasi. Den sma disi ben naki den brada srefi nanga tiki di ben abi spikri.
Aladi a kan gi wi groskin fu yere fu den sortu ogri-ati sani disi, toku den na sani di wi musu fruwakti. Na apostel Paulus ben skrifi nanga yepi fu santa yeye: „Ala sma di wani dini Gado fayafaya na ini wánfasi nanga Krestes Yesus, sa kisi frufolgu tu” (2 Tim. 3:12). Na ini a fosi yarihondro, den Kresten ben kisi frufolgu na difrenti fasi. Sma ben e taigi den hati sani, sma ben pina den na skinsei, èn sma kiri sonwan fu den srefi (Tori 5:40; 12:2; 16:22-24; 19:9). Den srefi sortu sani disi ben e pasa na ini a di fu 20 yarihondro, èn a no de fu taki dati a sa tan so na ini a di fu 21 yarihondro disi. Toku Yehovah e taigi wi: „No wan fetisani di den sa meki teige yu sa abi bun bakapisi” (Yes. 54:17). Dati na trutru wan tumusi moi dyaranti! Fu di wi de sma di warti trutru gi Yehovah, meki a ben taki nanga yepi fu a profeiti Sakaria: „A sma di e fasi unu, e fasi a popki fu mi ai” (Sak. 2:8). Den feanti fu den anbegiman fu Yehovah no sa man wini kwetikweti. A soifri anbegi sa wini!
Prakseri taki na ini a kondre di wi ben kari na fesi, Yehovah Kotoigi ben doro tu nyun heimarki na ini a nomru fu preikiman na ini a dienstyari 2001. Iya, den brada fu wi na ini a kondre dati e pina bika den abi furu problema, ma den e horidoro neleki ala den tra brada fu wi na heri grontapu. Na ini a dienstyari di pasa, na heri grontapu sowan 5066 sma ben e teki dopu ibri wiki fu sori taki den gi densrefi abra na Yehovah. Now den nyunwan disi teki a fasti bosroiti, neleki fa wisrefi ben du dati tu, fu „de lepi sma di abi wan tranga bribi na ini ala sani di Gado wani”.—Kol. 4:12.
Prakseri tu fa sani waka no tumusi langa pasa na ini Grikikondre. Baka someni yari fu frufolgu di ben e komoto fu a Griki Orthodox Kerki, dan now a tirimakti fu Grikikondre e taki dati a de so taki Yehovah Kotoigi na wan „kerki di sma sabi”. A lantipapira pe dati skrifi, e taki sosrefi dati a Bethel-oso fu Grikikondre na „wan santa presi di poti na wan sei spesrutu gi na anbegi fu Gado”. A e gi wi prisiri tu taki wi kan taigi unu dati na ini a dienstyari di pasa difrenti krutubangi ben teki krutubosroiti di ben abi bun bakapisi gi na anbegi fu wi na ini Amerkankondre, Bulgaria, Doisrikondre, Kanada, Rosiakondre, Rumeinia, nanga Yapan. Wi e taki Yehovah tangi trutru, taki a tan opo na okasi gi den sma na ini den kondre dati fu du a diniwroko!
Te wi luku a fasi fa Yehovah e horibaka gi a pipel fu en na ini den lasti dei disi, dan dati e sori wi krin taki en na a moro bun Mati di wi oiti ben sa kan abi. Wi e prisiri nanga a matifasi di wi abi nanga en, fu di wi sabi taki a lobi wi, taki a e gi wi leri, èn taki a e piri-ai gi wi te wi e meki fowtu. Iya, wi sa tan kisi tesi tapu a bribi fu wi. Ma a tranga bribi di wi abi na ini Yehovah, na dati sa yepi wi fu tan go doro. Yakobus ben skrifi: „ Unu brada fu mi, te unu e miti nanga difrenti tesi dan unu musu prisiri trutru, fu di unu sabi taki a bribi fu unu di kisi tesi, sa meki taki unu kan horidoro” (Yak. 1:2, 3). Boiti dati, dan a horidoro fu wi e sori krin taki wi lobi Yehovah, èn disi e gi wi bigi prisiri! No frigiti, wi lobi brada, taki Yehovah sa horibaka trutru gi ibriwan fu wi. Efu wi tan getrow, dan a sa yepi wi trutru fu doro a nyun grontapu. A wani taki sani musu waka bun nanga wi.
Fu dati ede meki wi e gi unu leki brada nanga sisa, yonguwan nanga owruwan, deki-ati fu hori bun na prakseri den tumusi moi blesi di e wakti wi na ini a ten di e kon. Meki wi si a tori leki fa na apostel Paulus ben si en di a ben skrifi: „Mi e taki dati a pina di wi e pina now no de notinoti efu yu teki en gersi nanga a glori di sa tyari kon na krin na ini wi” (Rom. 8:18). Frutrow tapu Yehovah awinsi sortu gens unu e kisi. Horidoro, èn no gi abra kwetikweti. Noiti, iya noiti a no sa hati yu taki yu ben du dati. A Wortu fu Gado e gi wi a dyaranti disi: „Ma fu a sei fu a regtfardikiwan, fu di a de getrow, meki a sa tan na libi.”—Hab. 2:4.
Unu brada,
Tiri Skin fu Yehovah Kotoigi