Wan brifi fu a Tiri Skin
Lobi brada nanga sisa:
A DE wan bigi prisiri fu skrifi unu a brifi disi! Wi e prèise unu fu a lobi èn fu a fasi fa unu e tan gi unsrefi. Unu sa leisi na ini a Jaarboek (Yaribuku) taki furu bun wroko du na ini a dienstyari di pasa. Ini a dienstyari di pasa wi gebroiki moro leki wan milyard yuru baka na ini a preiki nanga leri wroko, fu gi sma a deki-ati fu kon krosibei na Yehovah. A no de wan grani fu wroko makandra nanga a tumusi bun Gado èn hemel Tata fu wi?—1 Kor. 3:9.
Te wi e luku a wroko di musu du ete, dan wi abi na overtoigi taki unu sa go doro fu waka baka a faya nanga a bribi di den futuboi fu Gado ben abi soleki fa a skrifi na ini Bijbel. Leki eksempre, na apostel Paulus ben de klariklari fu du ala san a ben man du fu meki den Kownukondre afersi go na fesi. Soleki fa a e sori, na ini a lasti yari di a ben tan na ini Efeise a skrifi en fosi brifi gi a Kresten gemeente na ini Korente. A ben skrifi san a ben o du wantewante: „Mi e tan na Efeise teleki a Pinksterfesa; bika wan bigi doro di e tyari go na aktiviteit opo gi mi, ma furu gensman de.”—1 Kor. 16:8, 9.
Paulus ben wani go na Masedonia nanga Korente. Ma a si taki a ben kan du bun wroko na ini Efeise èn dati meki a tan pikinso moro langa drape. Paulus ben de wan sma di ben e fiti ensrefi na wan situwâsi; pe a ben tan na ini Efeise, a si wan moi okasi fu man taki nanga trawan fu Kownukondre afersi, sobun a fiti a schema fu en akruderi den sani disi. Wan bigi doro ben opo fu du moro furu na ini a diniwroko, èn Paulus ben de fayafaya fu meki gebroiki fu na okasi disi fu go na ini.
Fu du disi ben o teki furu wroko — namku fu preiki a bun nyunsu èn fu bow a gemeente na ini Efeise. Bakaten Paulus taigi den owruman na ini a gemeente na ini a foto dati: „Mi no ben draidrai fu fruteri unu ala san ben bun èn fu leri unu na publiki èn na oso fu oso tu. Ma mi ben gi kotoigi finifini na den Dyu èn na den Grikisma fu a berow na Gado èn a bribi na ini wi Masra Yesus.”—Tori fu den Apostel 20:20, 21.
Na a srefi fasi disi furu fu unu lobi brada nanga sisa e meki bun gebroiki fu den okasi di unu e kisi. Na ini a dienstyari di pasa, wan sani fu 798.938 sma ben man seti sani fu man go na ini wan noso tra fasi fu a pionierwroko. Sonwan fu unu go na farawe presi soso fu dini leki zendeling. Unu e panya a bun nyunsu fayafaya èn unu e bow gemeente sosrefi. Trawan leri wan tra tongo so taki den kan yepi sma di e taki wan tra tongo èn di e libi krosibei fu den. Trawan seti den sani na so wan fasi taki den man wroko na ini kontren pe preikiman no de, noso man dini pe moro preikiman de fanowdu. Trawan baka feni wan bigi doro di ben opo fu du moro na ini a diniwroko na skoro, na den wrokopresi, noso na tra okasi pe den ben kan gi wan bun kotoigi soleki nanga yepi fu telefon. Den ondrofenitori fu ala sei fu grontapu e sori taki a pipel fu Gado, yonguwan nanga owruwan, e suku okasi fayafaya èn den e feni okasi fu gi sma na ala presi sabi fu a waarheid.
Unu kan abi a dyaranti taki Yehovah e si èn a e warderi ala muiti di unu e du. Bijbel e taki: „Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en” (Hebr. 6:10). De klariklari ala ten fu prati a tru anbegi nanga trawan. Sonwan fu unu kan du moro na ini a diniwroko. Wi alamala kan pruberi fu du wi diniwroko na wan moro bun fasi.
Wi no e du a komando fu preiki sondro fu kisi gens. Memre taki baka di Paulus ben taki fu a bigi doro di ben opo fu du moro furu na ini a diniwroko, a skrifi: „Ma furu gensman de.” Gi Paulus den gensman ben de Dyu nanga Heiden. Sonwan fu den ben feti krinkrin nanga en èn trawan ben sreka sani na wan triki fasi fu gens en.—Tori. 19:24-28; 20:18, 19.
Na ini a ten disi wi abi fu du nanga so wan srefi sortu tori. Fu di wi e doro a pori fu a godelowsu sistema disi, wi e fruwakti taki a gens di wi e kisi sa kon moro furu. Satan abi ’bigi atibron’ èn na atibron fu en de spesrutu teige den wan di e dini Gado (Openb. 12:12). Noiti frigiti taki Satan na „a tiriman fu grontapu”. Yesus ben fruteri den disipel fu en: „Efu unu ben de wan pisi fu grontapu, dan grontapu ben sa lobi srefisrefi san na fu en. Now fu di unu no de wan pisi fu grontapu, ma mi teki unu puru na grontapu, meki grontapu no wani si unu na ai.”—Yoh. 14:30; 15:19.
Wi abi a fasti bosroiti fu no meki nowan sma swaki wi bribi na ini Gado noso fu meki wi du moro mendri na ini wi preikiwroko. Wi sabi taki sma sa de di sa tan feti nanga wi èn di sa sreka ogri sani teige wi. Ma wi e horidoro fu preiki a bun nyunsu fu a Kownukondre nanga na overtoigi taki Yesus sa masi Satan nanga a legre fu en tapu a yoisti ten di Yehovah poti gi dati. Gensman no ben man tapu na apostel Paulus fu taki fu a bun nyunsu, èn na ini a ten disi den no man du dati nanga den futuboi fu Yehovah tu. Awinsi Satan e atibron èn awinsi a grontapu no lobi wi kwetikweti, toku a yeye fu Yehovah e wroko na wan krakti fasi na mindri a pipel fu En. A de wan prisiri fu sabi taki na ipi sma di e preiki a bun nyunsu doro wan nyun heimarki fu 6.304.645 sma!
Wi e begi taki unu tan go doro fu meki bun gebroiki fu den okasi di de fu meki den afersi fu a kefalek moi Kownukondre fu Yehovah go na fesi. Unu kan de seiker taki wi e broko wi ede nanga unu te wi e tanapu leki „wan man” na ini a diniwroko fu a Moro Hei Gado, Yehovah.—Sef. 3:9.
Un brada,
A Tiri Skin fu Yehovah Kotoigi