Fa wi kan yepi trowpatna di no de Kotoigi?
1 Furu dinari fu Yehovah abi wan trowpatna di e sori switifasi gi Kotoigi èn den e denki bun fu a gemeente, ma den no e tron dinari fu Gado. Wan masra ben taki: „Soso a denki taki mi ben musu preiki oso fu oso ben de wan bigi problema gi mi.” A kan taki trawan musu tapu nanga gwenti di no e kruderi nanga Bijbel, noso den e denki taki den no abi ten fu du ala den sani di den patna fu den e du gi a waarheid. Fa wi kan yepi den?
2 Poti prakseri na sma: Te wi e poti prakseri na trawan èn te wi e poti prakseri na den broko-ede fu den, dan dati kan meki taki den o arki den tru sani di skrifi na ini Bijbel (Fil. 2:4). Furu tron, den wan di no ben abi a srefi bribi leki a patna fu den e fruteri fa tra Kotoigi ben handri na wan lobi-ati fasi nanga den. A masra di kari na a bigin ben taki: „José, wan owruman na ini a gemeente, ben poti spesrutu prakseri na mi. A deki-ati di a ben gi mi meki taki mi bigin studeri Bijbel seryusu.” Wan tra masra e memre taki den brada di ben e fisiti en ben teki a ten fu taki fu sani di en lobi. A taki: „Mi bigin si a bribi fu mi wefi na wan heri tra fasi. Den mati fu en ben de bun koni sma di ben kan taki fu ala sortu tori.”—1 Kor. 9:20-23.
3 Yepi den nanga spesrutu sani: Te wi e yepi den trowpatna di no de na bribi nanga wan sani, dan dati kan naki na ati fu den sosrefi (Odo 3:27; Gal. 6:10). Di a wagi fu wan masra di no de na bribi broko, dan wan yongu Kotoigi ben yepi en. A masra ben taki: „A sani dati naki mi ati trutru.” Wan tra brada ben yepi a masra fu wan sisa wan heri dei fu meki wan skotu gi a dyari fu den, aladi a masra fu a sisa no de na bribi. Te den ben e wroko na a skotu, dan den ben e taki nanga makandra èn dati meki den kon tron mati. Baka tu wiki, a masra go na a brada èn a taigi en: „A ten doro taki mi tyari kenki kon na ini mi libi. Yu wani studeri Bijbel nanga mi?” A ben go na fesi heri esi èn now a de wan dopu Kotoigi.
4 Aladi wi e tan suku den wan di warti na ini a kontren fu wi, dan meki wi go doro fu yepi den wan di trow nanga kompe bribiman fu wi.—1 Tim. 2:1-4.