Fa fu hori wan bun osofamiri-studie
1 Wán fu den moro prenspari sani di papa nanga mama musu du, na fu leri den pikin fu den a tru anbegi. Na Yehovah gi den a komando dati (Deut. 6:6, 7). A de fanowdu taki pikin e kisi tiri nanga rai fu tan getrow na Yehovah na ini na ogri grontapu disi. Den musu leri fu lobi Yehovah nanga a tru anbegi, èn den musu abi a fasti bosroiti fu tan du den sani disi di den leri. De Wachttoren fu 1 augustus 1988 ben taki na tapu bladzijde 11: „Awansi sortu tra frantwortu yu abi noso awansi sortu problema yu abi, toku a moro prenspari sani na fu teki ten fu de nanga yu pikin. Te yu e du dati, dan yu sa man leri yu pikin fu si sani soleki fa Gado e si sani. Dati sa kibri na ati fu yu pikin èn a sa meki den waka na tapu a yoisti pasi.”
2 Efu osofamiri wani du san Gado Wortu e taki, dan den musu meki ten fu hori na osofamiri-studie doronomo. A moro prenspari sani di osofamiri-edeman musu du, na fu sorgu taki na osofamiri fu den e kisi san de fanowdu fu abi wan tranga bribi. Efu papa nanga mama no e du dati now, dan den kan kisi seryusu problema na ini a ten di e kon.
3 Publikâsi di yu kan gebroiki èn a fasi fa yu kan studeri: San yu musu studeri? Na osofamiri-edeman na a sma di sabi moro bun san na osofamiri abi fanowdu. A kan aksi den trawan sortu publikâsi den denki taki ben o bun fu studeri, èn a kan hori den sani dati na prakseri te a o bosroiti san den o studeri. Te yu man fiti yusrefi makriki, dan na osofamiri-studie sa waka bun èn a sa gi na osofamiri deki-ati. Furu osofamiri e sreka densrefi makandra gi na alawiki Waktitoren-studie. Ma son tron a kan de fanowdu fu taki fu wan spesrutu tori di abi fu du nanga den problema di yonguwan e kisi na skoro. Publikâsi e gi rai di abi fu du nanga difrenti tori, soleki te sma meki mofo fu trow, te den musu du sani di no abi fu du nanga a leri programa na skoro, te a abi fu du nanga sport, èn te a abi fu du nanga a morsu fasi fa sma e tyari densrefi. Yu kan taki na so wan fasi fu den rai disi, taki na osofamiri e kisi deki-ati. A de prenspari taki na osofamiri-edeman e luku ibri tron baka sortu rai den memre fu na osofamiri abi fanowdu, èn a o luku san na a moro bun fasi fa a kan doro na ati fu den.—Luku De Wachttoren fu 15 mei 1971, bladzijde 297, 298.
4 Fa yu musu hori wan osofamiri-studie? Sorgu taki ala sma e firi switi na a studie, ma toku a musu de wan lespeki okasi. No hori a studie soso fu di yu musu hori en, sondro taki yu e hori den tra memre na prakseri. Poti tra aksi boiti den wan di skrifi na ini na publikâsi, gebroiki agersitori di o meki na osofamiri denki fu a tori, èn sorgu taki den alamala abi wan prati na a studie. Gebroiki sani di kan yepi den frustan a tori moro bun, soleki karta nanga schema, èn na so a studie kan kon moro moi. Yu kan aksi den pikin fu suku wan tu tori na ini na Index noso na Inzicht-buku, aladi yu e hori na prakseri omeni yari den abi èn san den man du. Te den yongu pikin man gi piki kaba, dan yu kan meki den abi wan prati tu na a takimakandra. Yu kan aksi den makriki sani, pe den kan piki nanga wan tu wortu nomo. No gebroiki a studie fu piri-ai gi den pikin. Na presi fu dati, prèise den, sori warderi gi a muiti di den e du, èn de fayafaya te yu e sori den fa Gado e denki fu sani.
5 Fa yu kan de seiker efu yu e doro na ati fu den? Gi na osofamiri deki-ati fu gi piki nanga den eigi wortu. Na wan koni fasi yu kan poti aksi di o sori fa den e denki fu sani, èn na so yu kan kon sabi san de na ini den ati. Yu kan aksi den: „Fa den pikin na skoro e prakseri fu a tori disi? Yu e tweifri son leisi na a tori disi?” Luku bun taki yu no e atibron nanga den pikin te den e gi piki tapu den aksi dati, bika dati kan meki den pikin frede fu taki fa den e denki fu wan tori. Gi den na okasi fu taki san de na tapu den ati. Te den sabi taki yu wani arki den èn taki yu wani yepi den nanga den problema di den abi, dan a o de moro makriki gi yu fu gi den leri.—Luku De Wachttoren fu 1 november 1986, bladzijde 23-25.
6 Hori na prakseri taki a moro prenspari sani fu na osofamiri-studie a no fu feni den piki di den o man gi na den gemeente konmakandra, ma na fu leri den fa Yehovah e denki fu sani (Ef. 3:17-19). Disi wani taki dati yu musu pruberi fu doro na ati fu den nanga den sani di yu e leri den. Meki na osofamiri frustan fu san ede den musu du a wani fu Gado, èn fu san ede dati na a moro bun fasi fu libi.
7 A de prenspari fu hori na osofamiri-studie doronomo, so taki na osofamiri kan kisi wan moro bun matifasi nanga Gado. Na osofamiri-studie sa leri èn yepi den pikin fu sabi san den musu du te den kisi problema na ini a libi fu den. Papa nanga mama, unu na den moro bun sma di kan yepi den pikin fu unu. Du ala san yu man fu tyari a frantwortu disi di yu kisi fu Gado. A no de fu taki dati Yehovah o blesi ala den muiti di yu e du fu hori wan bun osofamiri-studie doronomo.