Aksi di opo kon

◼ „A getrow èn koni srafu” e feni en bun taki Kotoigi e seti den eigi grupu pe den e kon makandra fu ondrosuku èn hari-taki fu tori di skrifi na ini Bijbel?—Mat. 24:45, 47.

Nôno, den no feni en bun. Ma toku, na ini difrenti kondre, wan tu Kotoigi seti den eigi grupu fu ondrosuku Bijbel tori. Son sma seti den eigi grupu fu ondrosuku a Hebrewtongo nanga Grikitongo di sma ben e taki na ini Bijbel ten, fu luku efu a Nieuwe-Wereldvertaling soifri. Tra sma e ondrosuku sabidensi tori di abi fu du nanga Bijbel. Den sma disi poti den tori disi na tapu Website. Boiti dati den e go tapu Internet fu fruteri trawan fa den e denki fu den tori dati èn fu hari-taki nanga trawan fu den sani disi. Den e hori konmakandra èn den e druk publikâsi fu meki tra sma kon sabi den sani di den ondrosuku, èn den e fruteri moro leki san wi e leri na den Kresten konmakandra èn na ini den publikâsi fu wi.

Na heri grontapu Yehovah en pipel e kisi furu leri di abi fu du nanga na anbegi fu den, èn den e kisi furu deki-ati na den gemeente konmakandra, den bigi konmakandra, èn sosrefi na ini den publikâsi di Yehovah en organisâsi e tyari kon na doro. Yehovah e gebroiki a santa yeye fu en èn En Wortu fu waarheid, fu sorgu taki ala sma di e anbegi en e kisi san den abi fanowdu so taki den kan ’abi a srefi denki soleki fa a fiti èn den kan de wán na ini a fasi fa den e prakseri fu sani’. Na so fasi den kan ’tan meki a bribi fu den kon tranga’ (1 Kor. 1:10; Kol. 2:6, 7). A no de fu taki, dati wi de nanga tangi taki Yehovah e gi wi den sani disi fu tranga wi bribi na ini den lasti dei disi. Sobun, „a getrow èn koni srafu” no e feni en bun te sma e seti den eigi sani na ini na organisâsi, sondro a tiri fu a srafu. Disi kan de sani soleki publikâsi di sma e druk, konmakandra di den e hori, noso sani di den e poti na tapu Internet.—Mat. 24:45-47.

A de fu prèise taki sma wani denki dipi fu sani, so taki den kan fruteri trawan a bun nyunsu moro bun. Ma a no musu de so taki den sani di wisrefi e ondrosuku e meki taki den sani di Yesus e leri wi nanga yepi fu en gemeente na grontapu, lasi krakti. Na ini a fosi yarihondro, na apostel Paulus ben warskow sma fu no lasi den ten fu go moksi densrefi na ini takimakandra fu tori, soleki a suku di sma ben suku fu „kon sabi nomonomo suma na den afo fu den, bika den sani disi na fu soso; den sani disi e meki nomo taki aksi e opo kon di sma musu go ondrosuku èn den no e yepi sma fu kon sabi sani di e kon fu Gado, èn di abi fu du nanga bribi” (1 Tim. 1:3-7). Ala Kresten musu meki tranga muiti fu ’no arki sma di e poti dondon aksi di e tyari trobi kon, èn fu no suku fu kon sabi nomonomo suma na den afo fu den. Den no musu go haritaki nanga sma fu a Wet, èn den no musu go meki trobi fu a sani disi, bika den sani disi no warti notinoti èn den de fu soso.’—Tit. 3:9.

A ben o bun taki den sma di wani ondrosuku Bijbel tori moro fini, e gebroiki den buku soleki Inzicht in de Schrift, „De gehele Schrift is door God geïnspireerd en nuttig”, èn tra publikâsi fu wi, soleki den wan di e taki fu profeititori fu den Bijbel buku Danièl, Yesaya, nanga Openbaring. Den buku disi abi furu tori na ini di wi kan gebroiki fu studeri Bijbel èn fu denki dipi. Na so fasi wi ’kan kon sabi a wani fu Gado finifini, so taki wi kan abi koni èn wi kan kon frustan sani nanga yepi fu a yeye fu En; na so fasi wi sa waka na wan fasi di Yehovah feni bun so taki wi kan plisi en dorodoro, aladi wi e tan meki froktu na ini ibri bun sani di wi e du, èn wi e kon sabi Gado finifini moro nanga moro’.—Kol. 1:9, 10.