Wan brifi fu a Tiri Skin
Lobi brada nanga sisa:
Na apostel Paulus ben gebroiki ibri okasi fu sori lobi nanga warderi gi den Kresten brada nanga sisa fu en. A ben skrifi gi den Kresten fu Rome: „Nanga yepi fu Yesus Krestes mi e taki mi Gado tangi fu un alamala, fu di sma na heri grontapu e taki fu a bribi fu unu” (Rom. 1:8). Iya, na ini a heri Gran Kownukondre fu Rome, sma ben sabi den Kresten fu a fosi yarihondro leki sma di abi tranga bribi, èn leki sma di lobi preiki (1 Tes. 1:8). Dati meki Paulus ben lobi den Kresten brada nanga sisa fu en so te!
Neleki Paulus, wi e taki Yehovah tangi tu, ibri tron te wi e prakseri unu. Wi lobi unu alamala srefisrefi! Èn unu kan de seiker taki Yehovah lobi ibriwan fu unu tu. Sonwan fu unu e kisi hebi frufolgu, ma toku unu e tan preiki go doro. Yehovah e prisiri trutru, fu di unu no frede fu preiki!—Odo 27:11.
A Jaarboek abi moi tori di e tranga a bribi fu wi. Fu eksempre, yu abi wan pisi na ini di nen „De geschiedenis van Jehovah’s Getuigen in deze tijd” (Sani di den disiten Kotoigi fu Yehovah du). Te yu leisi den ondrofenitori na ini a pisi disi finifini èn yu e prakseri fu den, dan yu o si krin taki Masra Yesus Krestes e go doro fu „feti a wan feti baka a trawan èn fu wini a feti fu en”. Yu o si tu taki sma no man tapu den bakaman fu Krestes, awinsi san den e du.—Openb. 6:2; Yes. 54:17.
Paulus ben skrifi gi den Kresten fu Filipi: „Mi e taki mi Gado tangi . . . , fu di unu horibaka gi a bun nyunsu” (Fil. 1:3-5). Na so wi leki memre fu a Tiri Skin e denki fu unu tu. Na ini a dienstyari 2007, yu ben abi 6.691.790 preikiman di gebroiki 1.431.761.554 yuru fu du a preikiwroko na ini 236 kondre na heri grontapu. Fu tru, unu e du furu muiti fu panya a bun nyunsu na ala sei! Prakseri omeni sma kisi yepi, fu di wi e wroko makandra! Ala den sani disi di wi du e meki Yehovah kisi prèise.
Wan tra leisi Paulus ben sori tu taki a ben e firi gi den Kresten brada nanga sisa fu en. Gi den Kresten na ini Tesalonika, a skrifi: „Doronomo wi e prakseri . . . a fasi fa unu e horidoro fu di unu e howpu tapu wi Masra Yesus Krestes, na fesi fu wi Gado èn Tata” (1 Tes. 1:2, 3). Iya, a libi lai problema. Ma te problema e kon, wi musu tan horidoro. Sortu problema yu abi? Kande yu e firi brokosaka fu di yu abi wan seryusu siki di e meki taki yu no man du so furu moro na ini a diniwroko gi Yehovah. Kande baka someni yari Dede, a bigi feanti wi, teki a libi fu yu lobi trowpatna (Odo 30:15, 16). Kande a gersi leki yu no man feni wan trowpatna di lobi Yehovah neleki yu, ma toku yu e tan getrow èn yu e gi yesi na a Bijbel rai fu trow soso na ini Masra (1 Kor. 7:39). A kan tu taki yu abi moni problema, aladi yu e du muiti fu kweki yu pikin na wan bun fasi. Efu yu tan poti Kownukondre afersi na a fosi presi na ini yu libi awinsi na ini sortu situwâsi yu de, yu kan de seiker taki Yehovah ’no sa frigiti den wroko fu yu èn a no sa frigiti a lobi di yu sori gi a nen fu en’. Grantangi brada nanga sisa, no „tapu fu du san bun”!—Hebr. 6:10; Gal. 6:9.
San o yepi yu fu horidoro? A srefi sani di ben yepi den Kresten fu Tesalonika, namku fu „howpu tapu wi Masra Yesus Krestes”. Dati meki Paulus ben agersi ’a howpu fu kisi frulusu’ nanga wan steifi helm di kan yepi wan Kresten fu no prakseri sani di kan meki a firi brokosaka èn di kan meki a tweifri doronomo.—1 Tes. 5:8.
Fu tru, te yu abi prisiri aladi yu e horidoro, dan yu e gi wan piki na Satan, di e spotu Gado fu di a feni taki Gado no abi a reti fu tiri hemel nanga grontapu. Satan taki dati libisma e denki densrefi nomo. A e taki dati son sma wani dini Gado fu wan pisi ten nomo, ma te moro nanga moro problema e kon, noso te a kaba fu a sistema disi no e kon so esi leki den fruwakti, dan den no o anbegi Gado so fayafaya moro. Yu abi a grani fu sori taki Didibri na wan lagi leiman trutru! Dei fu dei a ten e kon moro krosibei taki yu o kisi den blesi di yu e howpu na tapu.
Paulus ben gebroiki ibri okasi fu prèise den Kresten brada nanga sisa fu en, fu di den ben abi tranga bribi, den ben e preiki fayafaya èn den ben e horidoro ala ten. Na a srefi fasi wi e prisiri fu gebroiki na okasi disi fu prèise unu tu èn fu taigi unu ete wan leisi taki wi lobi unu trutru. Un tan du a bun wroko fu unu go doro!
Meki Gado gi unu furu blesi a yari disi. Wi e winsi unu taki ala sani waka bun nanga unu,
Un brada,
A Tiri Skin fu Yehovah Kotoigi