Gebroiki sani di pasa no so langa ete fu hari sma prakseri
1 Yu ben sa wani sorgu taki yu diniwroko no soi? Yu ben sa wani hari sma prakseri nanga a Bijbel boskopu fu di yu abi difrenti fasi fu bigin wan takimakandra? Dan yu kan gebroiki den sani di e pasa na grontapu èn na ini yu birti fu bigin takimakandra. Yu kan poti prakseri na sani di pasa no so langa ete na ini yu birti, èn na ini yu kondre noso na nyunsu fu tra kondre. Den sani disi e kenki doronomo (1 Kor. 7:31). Luku den eksempre di e kon now.
2 Sma e broko den ede fu di a libi e kon moro diri èn fu di ekonomia problema de. Sobun, yu kan taki:
◼ „Yu yere na ini nyunsu taki a prijs fu [kari a nen fu a sani] kon moro hei baka?” Noso yu kan taki fu a problema taki sma no abi wroko, efu wan wrokope seni furu wrokoman gowe. Te yu wani go doro nanga a takimakandra, yu kan aksi: „Yu aksi yusrefi kaba fu san ede a muilek so fu wroko nofo moni?” noso, „Yu denki taki ala ten a o muilek fu kon abi den moro prenspari sani di de fanowdu fu tan na libi?”
3 Wan tra sani fu san yu kan taki, na ogri di e pasa na ini osofamiri èn na ogri di skoropikin e du. Yu ben kan aksi:
◼ „Yu ben leisi na ini koranti taki [kari a sani di ben pasa na ini a libimakandra]?” Dan yu kan aksi: „Fu san ede yu e denki taki someni ogri de na grontapu?” noso, „Yu e denki taki wan ten sa kon te wi no o frede moro?”
4 Nyunsu fu bigi frudu di pori someni sani, gronseki, noso dyugudyugu na ini difrenti kondre, na sani di wi kan gebroiki fu hari sma prakseri. Fu eksempre yu ben kan aksi:
◼ „Na Gado meki [kari a rampu] pasa?” Noso yu ben kan taki fu wan borgufeti di pasa no so langa ete: „Efu ala sma wani taki vrede musu de, dan fu san ede a de so muilek fu meki dati pasa?”
5 Tan luku sortuwan fu den sani di pasa no so langa ete, yu kan gebroiki fu bigin takimakandra. Wan tu eksempre di kan yepi yu, de fu feni na a ondro-edeprakseri „Sani Di No Pasa So Langa Ete”, na tapu bladzijde 5, 6 fu a brochure Fa foe bigin èn go doro nanga bijbel takimakandra. Ma sorgu taki yu no e teki sei na ini afersi di abi fu du nanga politiek noso nanga problema na ini a libimakandra. Na presi fu dati, poti prakseri na Bijbel èn na Gado Kownukondre leki a wan-enkri sani di man tyari wan trutru lusu kon gi den problema fu libisma.