Gi yusrefi fu yepi yu Bijbelstudenti
1. San wi musu du fu man yepi wan Bijbelstudenti?
1 Fu man yepi wan Bijbelstudenti fu doro a marki fu gi ensrefi abra na Yehovah, dan moro de fanowdu leki fu studeri ala wiki nanga en. Na apostel Paulus ben agersi a matifasi di a abi nanga den wan di a gi leri, nanga di fu wan mama di e gi en pikin bobi. Wi sosrefi breiti fu gi „wi eigi libi”, noso wi e gi wisrefi, so taki wi kan yepi den Bijbelstudenti fu wi fu go na fesi na ini a tru anbegi.—1 Tes. 2:7-9.
2. Fu san ede wi musu sori taki wi e broko wi ede nanga wi studenti, èn fa wi kan du dati?
2 Sori taki yu e broko yu ede nanga den: Te wan Bijbelstudenti e du den sani di a e leri, dan a konsensi fu en o meki taki a tapu fu abi krosibei demakandra nanga sma di no e hori densrefi na Bijbel gronprakseri (1 Petr. 4:4). Kande den famiriman fu en o drai baka gi en (Mat. 10:34-36). Te wi e sori taki wi e broko wi ede nanga den studenti disi, dan den o firi taki den no de den wawan. Wan zendeling di abi ondrofeni e taki: „No hasti yusrefi fu gowe baka a studie. Efu a kan, tan taki pikinso nanga en.” De na ai fu si pe yu kan yepi yu studenti. Fu eksempre, yu kan bel en, noso yu kan go luku en te a siki. Te a fiti, yu kan sidon sei yu studenti na den konmakandra èn yepi en nanga den pikin.
3. Fa wi kan yepi wi studenti fu kisi deki-ati fu a gemeente?
3 Yepi fu a gemeente: Efu yu de na ini a preikiwroko, èn yu e wroko krosibei pe a studenti fu yu e libi, dan a ben o bun fu go taki en odi èn meki a miti a sma di yu e wroko nanga en. Te a fiti, dan ten na ten, yu kan kari difrenti preikiman, sosrefi owruman, fu go nanga yu na a studie. Boiti dati, no wakti langa fu gi yu Bijbelstudenti wan kari fu kon na den konmakandra na a Kownukondre zaal. Disi o yepi en fu abi bun demakandra nanga sma fu a gemeente di kan tron en brada nanga sisa.—Mark. 10:29, 30; Hebr. 10:24, 25.
4. Sortu blesi wi kan kisi fu a muiti di wi e du?
4 Te wan papa noso mama du muiti fu yepi den pikin fu en na ini a tru anbegi, dan a e prisiri te den pikin disi teki a bosroiti fu dini Yehovah èn fu waka na ini a waarheid (3 Yoh. 4). Wi kan abi a prisiri dati tu, te wi e gi wisrefi fu yepi den Bijbelstudenti fu wi.