A de tumusi prenspari fu studeri Bijbel nanga yusrefi èn nanga yu osofamiri!
1. San a Tiri Skin wani gi a pipel fu Gado, èn fu san ede?
1 Neleki fa a ben de na ini a fosi yarihondro, na so a de tu taki a Tiri Skin wani du ala san den man fu meki sani go bun nanga a pipel fu Yehovah (Tori. 15:6, 28). Fu di a bigi banawtu de krosibei, meki a de tumusi prenspari taki ibri Kownukondre preikiman abi wan bun matifasi nanga Yehovah. San yu o du now nanga a ten di yu ben e gebroiki gi a Gemeente Bukustudie? Wi alamala e kisi a deki-ati fu gebroiki a ten dati fu hori na Osofamiri Anbegi. Te wi e gebroiki a ten dati bun, dan dati o meki taki wi studeri Gado Wortu moro bun, èn wi o kisi wini fu den leri dati.—Ps. 1:1-3; Rom. 11:33, 34.
2. Fa wi kan seti sani fu studeri na a ten di wi ben gebroiki gi a bukustudie?
2 A neti fu na Osofamiri Anbegi: Osofamiri-edeman abi a frantwortu na fesi Yehovah, fu sorgu taki den e studeri Bijbel ala wiki leki osofamiri, èn fu sorgu taki den e kisi wini fu a studie dati (Deut. 6:6, 7). Brada nanga sisa di no trow èn di no abi wan osofamiri, o man gebroiki a ten dati fu studeri Bijbel nanga densrefi èn fu ondrosuku sani moro fini. A de tumusi prenspari taki ibriwan fu wi „gebroiki ibri okasi bun” fu studeri èn fu denki dipi fu sani. Na so fasi wi o tan abi wan bun matifasi nanga Yehovah, aladi „den dei ogri”.—Ef. 5:15, 16.
3, 4. Sortu sani wi kan gebroiki fu studeri, èn san musu de a marki?
3 Sani di wi kan studeri: Yu kan gebroiki na Index van Wachttoren-publikaties noso a Watchtower Library na tapu CD-ROM, fu feni tori di kan meki yu osofamiri nyan bun fu a studie. Osofamiri kan studeri artikel soleki „Fa yu kan abi wan koloku osofamiri libi?”, „Leri den pikin fu yu”, nanga „Gi den yonguwan”. Den artikel disi fu A Waktitoren e kon wan tu leisi na ini a yari. Boiti dati, na Ontwaakt! abi na artikel „Jonge mensen vragen” nanga tra artikel di abi fu du nanga den moi sani di Yehovah meki.
4 Te wi e leisi Bijbel leki osofamiri sondro fu hasti wisrefi, dan dati sa yepi ibri sma fu no frigiti den Bijbel rai èn fu du den sani di den leri (Hebr. 4:12). Na tra okasi yu kan luku wan fu den video fu na organisâsi èn yu kan taki fu en. Yusrefi kan bosroiti sortu sani yu wani studeri èn fa yu o du dati. Yu kan aksi den sma fu yu osofamiri san den ben o wani studeri.
5. Fu san ede a de prenspari now taki wi e studeri Bijbel nanga wisrefi èn nanga wi osofamiri?
5 A de prenspari fu du den sani disi now: Wi musu kon abi wan moro bun matifasi nanga Yehovah, fu di dati o meki taki wi de srekasreka fu „tanapu kánkan èn luku fa Yehovah o frulusu” wi (Ex. 14:13). Papa nanga mama abi a tiri fu Gado fanowdu fu kweki den pikin fu den „na mindri den kruktusma fu a ten disi di e du soso ogri” (Fil. 2:15). Na ini a ten disi, pe furu sma na skoro no e tyari densrefi na wan fasi di fiti, pikin abi yepi fanowdu so taki den e tyari densrefi na wan bun fasi (Odo 22:3, 6). A ben o bun te trowpaar e du muiti fu kon abi wan moro bun matifasi nanga Yehovah, di de leki a di fu „dri titei” na ini a trowlibi fu den (Preik. 4:12). Meki a de so taki wi e gebroiki a ten di tan abra na wan bun fasi, so taki wi tranga wisrefi nanga „a moro santa bribi” fu wi!—Yud. 20.
[Raportu na tapu bladzijde 3-6]
2009 DINIWROKO RAPORTU FU YEHOVAH KOTOIGI NA HERI GRONTAPU
(Luku a Kownukondre diniwroko)