’A bun nyunsu disi o preiki’!
1. Fa wi du sabi taki noti no man tapu a preikiwroko?
1 Nowan sani de di man tapu Yehovah fu du san a abi na prakseri (Yes. 14:24). Aladi a ben gersi leki Krutuman Gideon nanga den 300 man fu en no ben o man feti teige wan legre fu 135.000 Midiansma, toku Yehovah taigi en: „Yu o frulusu den Israelsma fu na anu fu den Midiansma. A no mi e seni yu go?” (Krut. 6:14) Gi sortu wroko Yehovah e horibaka na ini a ten disi? Yesus taki: „A bun nyunsu disi fu a kownukondre o preiki gi sma na heri grontapu” (Mat. 24:14). Nowan sma o man tapu a wroko disi!
2. Fu san ede wi kan fruwakti taki Yehovah o yepi ibriwan fu wi na ini a preikiwroko?
2 Yehovah e yepi ibriwan fu wi: Wi kan de seiker taki Yehovah o meki sani waka bun gi den Kotoigi fu en leki grupu. Ma wi kan fruwakti taki a o yepi ibriwan fu wi? Di na apostel Paulus ben de na ini nowtu, a ondrofeni taki Yehovah yepi en èn a du dati nanga yepi fu en Manpikin, Yesus (2 Tim. 4:17). Wi kan de seiker taki na a srefi fasi Yehovah o blesi a muiti di ibriwan fu wi e meki fu du a wani fu en.—1 Yoh. 5:14.
3. Na ini sortu situwâsi Yehovah e yepi wi?
3 A de so taki den broko-ede fu na aladei libi e meki taki yu no abi krakti moro fu du a preikiwroko? „A e gi weri sma krakti” (Yes. 40:29-31). Sma e frufolgu yu noso den e gens yu? „Trowe yu hebi na tapu Yehovah, dan en srefi o horibaka gi yu” (Ps. 55:22). A de so taki son leisi yu no abi nofo deki-ati? „We, go now. Misrefi o yepi yu te yu o taki” (Ex. 4:11, 12). Yu abi problema nanga a gosontu fu yu di e meki taki yu no man du so furu na ini a preikiwroko? Yehovah e warderi a muiti di yu e du nanga yu heri ati, awansi yu no man du furu.—1 Kor. 3:6, 9.
4. Sortu krakti a o abi na wi tapu te wi e frutrow tapu Yehovah?
4 Yehovah „langa en anu fu du wan sani, suma man puru en anu?” (Yes. 14:27) Meki wi abi a frutrow taki Yehovah o blesi a diniwroko fu wi èn meki wi tan preiki ’sondro frede fu di Yehovah gi wi a makti fu du dati’.—Tori. 14:3.