A de fanowdu taki Kresten e begi
1. San de fanowdu fu man du a diniwroko fu wi?
1 Wi no man du a diniwroko nanga wi eigi krakti. Yehovah e gi wi a krakti fu du a wroko disi (Fil. 4:13). A e gebroiki den engel fu en fu yepi wi fu feni sma di de leki skapu (Openb. 14:6, 7). Wi e prani siri fu a bun nyunsu èn wi e gi den watra, ma na Yehovah e meki den gro (1 Kor. 3:6, 9). A prenspari trutru taki Kresten e frutrow tapu wi hemel Tata na ini begi!
2. Gi sortu sani wi kan begi?
2 Wi musu begi gi wisrefi: Wi musu begi na ibri okasi te wi e preiki (Ef. 6:18). Gi sortu sani wi kan begi? Wi kan begi fu abi wan yoisti denki fu den sma na ini a kontren fu wi, èn fu preiki sondro frede (Tori. 4:29). Wi kan aksi Yehovah fu yepi wi fu miti reti-ati sma, so taki wi kan studeri Bijbel nanga den. Efu na ososma e poti wan aksi gi wi, dan wi kan begi syatu na ini wi ati èn wi kan aksi Yehovah fu yepi wi fu gi wan yoisti piki (Neh. 2:4). Wi kan aksi en tu fu gi wi koni so taki wi kan tan poti a diniwroko fu wi na a fosi presi (Yak. 1:5). Boiti dati, a e plisi Yehovah te wi e taki en tangi gi a grani di wi abi fu de dinari fu en.—Kol. 3:15.
3. Fa a begi di wi e begi gi trawan e meki a preikiwroko go na fesi?
3 Wi musu begi gi trawan: Wi musu ’begi sosrefi gi makandra’, èn wi kan kari a nen srefi fu wi brada noso sisa te dati fiti (Yak. 5:16; Tori. 12:5). A de so taki yu no man du so furu moro na ini a preikiwroko fu di yu gosontu no de so bun? Dan yu kan begi gi den brada nanga sisa fu yu di abi wan bun gosontu. Noiti no denki taki den begi fu yu no prenspari! A fiti tu fu begi gi den tiriman, so taki den no gens a preikiwroko. Na so fasi den brada nanga sisa fu wi „kan libi wan tiri libi sondro dyugudyugu”.—1 Tim. 2:1, 2.
4. Fu san ede wi musu tan begi?
4 A preiki fu a bun nyunsu na heri grontapu na wan bigi wroko. Efu wi e „tan begi”, dan wi o man du a wroko dati nanga a yepi di Yehovah e gi.—Rom. 12:12.