Fayafaya preikiman musu begi èn denki dipi fu sani
1. San yepi Yesus fu tan poti prakseri na a moro prenspari wroko fu en?
1 A heri neti, Yesus ben e dresi sma èn a ben e puru ogri yeye na den tapu. Di den disipel feni en a tra dei, den taigi en: „Ala sma e suku yu.” Den ben wani taki a go doro nanga den wondru di a ben e du. Ma Yesus no ben meki sma puru en prakseri na a moro prenspari wroko di a ben musu du, èn dati ben de fu preiki a bun nyunsu. A taigi den: „Kon meki wi go na wan tra presi na den pikin foto di de na ini a birti, so taki mi kan preiki drape tu, bika na fu dati ede mi kon.” San yepi Yesus fu tan poti prakseri na den sani di de prenspari? A ben opo fruku mamanten fu begi èn fu denki dipi fu sani (Mark. 1:32-39). Te wi e denki dipi fu sani èn te wi e begi fu den sani dati, dan fa disi o yepi wi fu de fayafaya preikiman?
2. Fu sortu sani wi kan denki dipi, so taki wi kan tan de fayafaya na ini a preikiwroko?
2 Fu sortu sani wi musu denki dipi? Yesus ben si taki sma ben e nyan ’pina èn taki den ben waka bruyabruya leki skapu di no abi skapuman’ (Mat. 9:36). Na so a de tu, taki wi kan prakseri o tranga sma abi a bun nyunsu fanowdu. Wi kan prakseri tu na ini sortu prenspari ten wi e libi (1 Kor. 7:29). Wi kan denki dipi fu den sani di Yehovah du, fu den fasi fu en, fu a grani di wi abi fu de wan Kotoigi fu Yehovah, èn fu den tumusi moi sani di wi leri fu Gado Wortu, ma di sma na ini a kontren fu wi no sabi ete.—Ps. 77:11-13; Yes. 43:10-12; Mat. 13:52.
3. O ten wi kan denki dipi fu sani?
3 O ten wi musu denki dipi? Neleki Yesus, son sma e opo fruku mamanten te a tiri ete. Trawan e feni en moro bun fu denki dipi fu sani na neti, bifo den go sribi (Gen. 24:63). Srefi te wi abi furu fu du, wi kan meki ten fu denki dipi fu sani. Son sma e du dati te den de na ini bus. Trawan e gebroiki a ten te den abi pauze fu denki dipi fu sani. Furu sma feni taki te den e denki dipi fu sani bifo den e go na ini a preikiwroko, dan dati e yepi den fu preiki nanga moro faya èn deki-ati. Dati de so, srefi efu den e denki dipi fu sani fu wan tu miniti nomo.
4. Fu san ede wi musu denki dipi fu sani?
4 Te wi e denki dipi fu sani èn e begi, dan dati o gi wi moro deki-ati fu dini Yehovah. Boiti dati, a sani disi o yepi wi fu si na anbegi fu wi leki a moro prenspari sani na ini wi libi, èn a o tranga a bosroiti di wi abi fu tan go doro nanga a preikiwroko. Yesus, a Moro Prenspari Preikiman fu Gado, ben kisi wini fu di a ben e denki dipi fu sani. Wi sosrefi o kisi wini fu dati.