Teki leri fu Gado Wortu
Fu san ede wi musu teki leri fu Gado?
Na artikel disi e poti prakseri na sani di yu ben kan aksi yusrefi èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.
1. Fu san ede wi musu teki leri fu Gado?
Gado abi bun nyunsu gi libisma. A e fruteri wi fu a bun nyunsu disi na ini Bijbel. Bijbel de leki wan brifi fu wi lobi-ati Papa na hemel.—Leisi Yeremia 29:11.
2. San na a bun nyunsu?
Libisma abi wan bun tirimakti fanowdu. Nowan tiriman na grontapu man tyari wan kaba kon na ogridu, kruktudu, siki noso dede. Ma bun nyunsu de. Gado o gi libisma wan bun tirimakti di o puru ala den sani di e meki sma pina.—Leisi Danièl 2:44.
3. Fu san ede a de tumusi prenspari fu teki leri fu Gado?
Heri esi Gado o pori den sma di e meki trawan pina. Ma fosi a du dati, a e leri milyunmilyun safri-ati sma fu libi na wan moro bun fasi èn fu abi trutru lobi. Sma e leri fu Gado Wortu fa fu lusu problema na ini den libi, fa fu de koloku trutru, èn fa fu plisi Gado.—Leisi Sefanya 2:3.
4. Suma na a Skrifiman fu Bijbel?
Bijbel abi 66 pikin buku èn sowan 40 mansma skrifi den. Sowan 3500 yari pasa, Moses skrifi den fosi feifi buku fu Bijbel. Na apostel Yohanes skrifi a lasti buku sowan 1900 yari pasa. Den Bijbel skrifiman no ben skrifi den eigi prakseri, ma den ben skrifi den prakseri fu Gado. Sobun, Gado na a Skrifiman fu Bijbel.—Leisi 2 Timoteyus 3:16; 2 Petrus 1:21.
Wi sabi taki Bijbel komoto fu Gado bika a e taki finifini san o pasa na ini a ten di e kon. Nowan libisma ben o man du dati (Yesaya 46:9, 10). Boiti dati, Bijbel e tyari kon na krin sortu moi fasi Gado abi. Bijbel abi a krakti fu kenki sma libi so taki den abi wan moro bun libi. Den buweisi disi e gi milyunmilyun sma na overtoigi taki Bijbel na a Wortu fu Gado.—Leisi Yosua 23:14; 1 Tesalonikasma 2:13.
5. Fa yu kan kon frustan Bijbel?
Furu sma ben sabi Yesus leki wan leriman fu Gado Wortu. Aladi furu fu den sma di a ben taki nanga den ben sabi Bijbel, toku den ben abi yepi fanowdu fu frustan dati. Fu yepi den, Yesus ben sori go na a wan tekst baka a trawan èn a ben sori den „san Gado Buku ben wani taki”. Na artikel disi di nen „Teki leri fu Gado Wortu”, o du a srefi sani tu fu yepi yu.—Leisi Lukas 24:27, 45.
Furu sani no de di moi so, leki fu teki leri fu Gado èn fu kon sabi fu san ede wi de na libi. Ma son sma no o feni en bun taki yu e leisi Bijbel. Efu dati de so, dan no lasi-ati. Efu yu wani kisi têgo libi, dan a de fanowdu fu kon leri sabi Gado.—Leisi Mateyus 5:10-12; Yohanes 17:3.
Efu yu wani sabi moro, dan luku kapitel 2 fu a buku disi San Bijbel e leri wi trutru? di Yehovah Kotoigi tyari kon na doro.