Sori taki yu de nanga tangi

¹ Aladi wi e libi na ini ’muilek ten di tranga fu pasa’, toku furu sani de gi san wi kan taki Yehovah tangi (2 Tim. 3:1). A moro prenspari reide fu san ede wi kan taki en tangi na fu di a gi wi en Manpikin leki wan warti presenti (Yoh. 3:16). Boiti dati, wi e nyan bun fu bogobogo yeye nyanyan, aladi den sma na ini falsi anbegi abi angri na yeye fasi (Yes. 65:13). Wi de wan pisi fu wan organisâsi fu Kresten brada nanga sisa na heri grontapu èn wi abi a grani fu yepi fu meki a tru anbegi gro na wan kefalek moi fasi (Yes. 2:3, 4; 60:4-10, 22). Fa wi kan sori taki wi de nanga tangi gi den bogobogo blesi di Yehovah e gi wi?​—Kol. 3:15, 17.

² Diniwroko di wi e du nanga prisiri èn nanga wi heri ati: Di na apostel Paulus ben e taki fu a gi di wan sma e gi trawan sani, dan a ben skrifi: „Gado lobi wan sma di e gi sani nanga prisiri” (2 Kor. 9:7). A gronprakseri disi abi fu du tu nanga a diniwroko di wi e du gi Gado. Te wi de nanga tangi, dan disi sa de fu si na a faya di wi abi gi a tru anbegi, a prisiri di wi abi na den Kresten konmakandra, a faya di wi abi na ini a preikiwroko, èn a prisiri di wi abi te wi e du a wani fu Gado.​—Ps. 107:21, 22; 119:14; 122:1; Rom. 12:8, 11.

³ Na ini Israel fu owruten, a Wet ben e sori taki sma musu tyari ofrandi, ma fu so wan fu den ofrandi disi a Wet no ben taki finifini o furu wan sma ben musu gi. Ibri anbegiman ben abi na okasi fu sori omeni warderi a abi, fu di a ben o gi wan ofrandi di ben e ’kruderi nanga den blesi di a ben kisi fu Yehovah’ (Deut. 16:16, 17). Na so a de tu na ini a ten disi, taki efu wi de nanga tangi na ati, dan dati sa pusu wi fu du so furu leki wi man na ini a Kownukondre preikiwroko èn na ini a wroko di wi kisi fu meki disipel. Furu tron, a fakansi e gi wi moro okasi fu sori taki wi de nanga tangi na ati. Son brada nanga sisa e gebroiki den fakansi dei disi di den kisi fu wroko, noso fu skoro, fu du moro na ini a preikiwroko, èn den e go srefi na ini a yepi-pionierwroko. Yu denki taki yu kan gebroiki a fakansi fu du moro na ini preikiwroko?

⁴ Wi musu sori taki wi abi furu warderi: Wan tumusi prenspari fasi fa wi kan taki Yehovah tangi, na te wi e begi (1 Tes. 5:17, 18). Gado Wortu e gi wi a deki-ati fu ’abi bribi pasa marki, aladi wi e taki wortu fu tangi’ (Kol. 2:7). Awansi wi abi furu fu du, noso awansi wi abi furu broko-ede, toku wi musu taki Gado tangi te wi e begi ala dei (Fil. 4:6). Iya, meki wi ’taki Gado tangi furu tron’, nanga yepi fu wi diniwroko èn sosrefi nanga yepi fu den begi fu wi.​—2 Kor. 9:12.