A moi fu de na den konmakandra ala ten!
Na omeni tenti yari a ben de so taki na ini Owstu-Europa, lanti no wani furu fu den lobi brada fu wi hori konmakandra. Yu kan prakseri fa den ben prisiri di den kisi primisi fu hori den konmakandra fu den sondro taki sma tapu den!
Wan kring-opziener ben skrifi disi di a ben fisiti wan fu den gemeente: „Tudewroko neti, leti na a bigin fu a fisiti fu mi, na apparaat di e hori a presi waran, ben kon broko. Na dorosei a ben kowru so te taki watra ben kan tron ijs, èn na inisei a ben de wan sani fu 5 graden Celsius nomo. Den brada nanga sisa ben sidon nanga den dyakti, deki syaal, handschoen, musu nanga den laars. Nowan sma ben man suku tekst na ini den Bijbel, fu di den no ben man opo den bladzijde. Mi ben tanapu na tapu a podium nanga mi dyakti, aladi mi ben e beifi fu a kowru èn mi ben man si a bro fu mi te mi ben e taki. Ma a ben fruwondru mi srefisrefi taki mi no yere nowan sma e krutu. Ala den brada ben taki dati den ben prisiri srefisrefi fu de na a konmakandra!” Den brada disi no ben denki srefi fu misi a konmakandra dati!
Na so wisrefi e denki tu? Wi e warderi en taki wi kan fisiti den konmakandra ibri wiki, sondro taki sma tapu wi? Noso wi no e si den konmakandra so prenspari te sani e go bun? Kande a no de wan makriki sani fu go doronomo na den konmakandra, èn son tron wi kan abi wan bun reide fu no go. Ma noiti wi musu frigiti taki sma de na wi mindri di e kon owru, den gosontu no de so bun, den musu wroko tranga noso den abi tra bigi frantwortu. Aladi a kan muilek son leisi gi den sma disi, toku den sabi o prenspari a de fu go na den konmakandra èn pikin moro ala ten den de na den konmakandra. Dati na trutru moi eksempre di wi kan teki!—Luku Lukas 2:37.
Meki a tron wi gwenti fu horibaka gi a tru anbegi fu di wi e go na ala den Kresten konmakandra, iya, den gemeente konmakandra èn sosrefi den bigi konmakandra fu wi. Fu san ede wi musu si en leki wan prenspari sani fu go na den konmakandra disi? Fu di na Gado gi wi a komando fu kon makandra. Ma tra prenspari reide de ete. Wi alamala abi den rai fu Gado fanowdu di kan tyari wini kon gi wi, èn wi abi a yepi fu a santa yeye fanowdu. Wi e kisi den sani disi na den konmakandra (Mat. 18:20). Wi bribi e kon tranga fu di wi e kisi deki-ati te wi abi demakandra nanga den brada nanga sisa fu wi.—Hebr. 10:24, 25.
Di Yesus ben kenki kon de heri tra fasi, Petrus taki: „Leriman, a bun taki wi dya” (Luk. 9:33). Na so wi musu denki fu ibriwan fu den Kresten konmakandra fu wi. Fu tru, a moi fu de na den konmakandra ala ten!