Gebroiki den CD fu prati a bun nyunsu!
1. Sortu publikâsi wi kisi na tapu CD na a kongres di pasa?
1 Na a „Meki Gado Kownukondre kon!” Distrikt Kongres fu wi di ben hori no so langa pasa, wi ben breiti srefisrefi fu kisi a buku Teki leri fu a Bigi Leriman—On Compact Disc na ini Sranantongo nanga a brochure Yu kan de Gado mati na ini Sramakatongo. Yu kan puru den tu CD disi na a website: www.pr418.com. A no de fu taki dati wi e angri fu gebroiki den CD disi fu gi ala sortu sma leri, so taki den e kisi soifri sabi fu Bijbel.
2. Fa wi kan gebroiki den CD fu gi trawan leri?
2 Gebroiki den CD fu yepi tra sma: Disi a no a fosi publikâsi di wi kisi na tapu CD. A Gado mati-brochure de na tapu CD tu na ini Sranantongo. Fa wi kan gebroiki den CD disi fu yepi tra sma? A fosi sani, na taki wisrefi musu kon sabi den publikâsi disi èn sreka na fesi neleki te wi ben o tyari wan gobaka noso hori wan Bijbelstudie. Wi kan arki a CD fu a buku noso a brochure èn gebroiki den aksi efu dati de na ini a buku noso a brochure. Boiti dati wi kan poti moro aksi efu dati de fanowdu.
3. Fa yu kan gebroiki den prenki bun?
3 Gebroiki den prenki na ini den publikâsi: Sori a Bijbelstudenti fa a kan sreka te a e arki a CD bifo unu bigin studeri. Gebroiki den prenki so taki a kan si den sani di a e leri, èn yepi en fu si san den prenki abi fu du nanga den sani di a e leri. Disi o yepi en fu „tanapu steifi” na ini a tru bribi (Ef. 3:17).
4. Fa wi kan yepi den wan di no man leisi èn skrifi, èn sortu bosroiti wi musu teki te wi e du dati?
4 Son leisi gosontu problema kan meki taki wan sma no man leri leisi. Ma trawan di no ben man skrifi èn leisi bun, ben man leri leisi èn skrifi nanga yepi fu a brochure Du Muiti fu Leisi èn fu Skrifi. Disi ben tranga a bribi fu den. Sobun, te wi e gebroiki den CD fu prati a bun nyunsu, dan dati kan yepi moro sma di wani sabi moro fu Bijbel, so taki den kan feni a smara pasi (Mat. 7:13). Wi musu teki a srefi bosroiti neleki na apostel Paulus, fu tron ala sani gi ala sortu sma fu a bun nyunsu ede.—1 Kor. 9:22, 23.
[Faki na tapu bladzijde 3]
Fa wi kan gebroiki a CD
„Meki wi go arki a fosi les di nen ’Gado E Gi Yu a Kari Fu Tron En Mati’. [Arki a les èn baka te yu stop a CD yu kan aksi.] Soleki fa a les disi e sori, dan suma ben de wan mati fu Gado? [Gi a sma na okasi fu piki.] Na en wawan ben de Gado mati? [Gi a sma na okasi fu piki.] Yu denki taki yu kan tron Gado mati tu? [Gi a sma na okasi fu piki.] Na ini a les disi wi yere taki son sma e suku fu kon gudu, na presi fu tron wan mati fu Gado. Yu denki taki dati na wan koni sani fu du? [Gi a sma na okasi fu piki.] Fu san ede? [Gi a sma na okasi fu piki.] Yu frustan a pisi disi heri bun. Yu denki taki ala sma o feni en bun taki yu e leri sani fu Gado? [Gi a sma na okasi fu piki.] Fu dati ede, san yu musu hori na prakseri?” [Gi a sma na okasi fu piki.] Prèise a sma fu den moi piki di a gi èn gi en deki-ati fu tan studeri Gado Wortu.