Wan brifi fu a Tiri Skin

Wi lobi brada nanga sisa,

Wi breiti srefisrefi fu skrifi ala den moro leki seibi milyun futuboi fu Yehovah di wi lobi trutru èn di e horidoro. Te yu miti wan brada noso sisa fu wan tra kondre, dan wantewante yu e firi wan spesrutu lobi gi a sma dati (Yoh. 13:34, 35). A no de fu taki dati te yu o leisi a Jaarboek, dan den moi ondrofenitori fu brada nanga sisa di abi wan tranga bribi èn di horidoro na ini difrenti kondre, o meki yu firi a lobi dati tu.

Den boskopu di wi kisi fu heri grontapu e sori taki furu fu unu e hori na Osofamiri Anbegi doronomo. Den papa nanga mama di abi pikin-nengre du difrenti moi sani fu meki den pikin tan poti prakseri na a Osofamiri Anbegi (Ef. 6:4). Te trowpaar e studeri nanga makandra, dan dati e meki taki a trowlibi fu den e kon moro bun (Ef. 5:28-33). Fu tru, sma di de den wawan èn sosrefi osofamiri e kisi wini fu a seti disi te den e studeri Gado Wortu finifini.​—Yos. 1:8, 9.

Wi e firi gi ala den wan di lasi furu sani na ini den rampu no so langa pasa. Wi e teki na okasi disi tu fu taki ala den sma tangi di no ben draidrai fu yepi di den rampu disi ben pasa (Tori 11:28-30; Gal. 6:9, 10). Boiti dati na ini ibri gemeente yu abi brada nanga sisa di e si san trawan abi fanowdu èn den e du wan sani fu yepi den. Neleki Dorkas di kari na ini Bijbel, unu ’du furu bun sani èn unu ben meki furu sani gi den pôti sma’ (Tori 9:36). Unu kan de seiker taki Yehovah e si san unu e du èn a sa blesi unu gi dati.​—Mat. 6:3, 4.

Na ini son kondre, sma ’e meki wèt fu du ogri’ nanga unu so taki unu no man du san unu abi reti na tapu (Ps. 94:20-22). Fu di unu e frustan taki Yesus ben taki dati wi ben o kisi frufolgu, meki unu e horidoro nanga deki-ati èn unu e bribi taki Yehovah o frulusu unu (Yoh. 15:19, 20). Unu kan de seiker taki wi e begi doronomo gi unu èn wi sabi taki na a srefi ten unu e „opo taki gi unsrefi na fesi ala sma di e aksi unu sani di abi fu du nanga a howpu fu unu”.​—1 Petr. 3:13-15.

Wi e prèise den furu milyun brada nanga sisa di e tan tyari densrefi na wan krin fasi aladi Satan e tan pruberi na wan triki fasi fu meki sma libi na wan fasi di no fiti kwetikweti. Na ini a ten disi sma na ini grontapu e tyari densrefi moro nanga moro na wan fasi di no fiti. Toku unu „kon tranga moro nanga moro, fu di unu de wán nanga Masra èn fu di a krakti fu en bigi srefisrefi” (Ef. 6:10). Unu „sorgu taki unu abi ala den sani di Gado gi unu fu feti”, èn disi e meki taki unu e tanapu kánkan te „Didibri e kon nanga den triki fu en” (Ef. 6:11, 12). Unu kan de seiker taki Yehovah e gebroiki a bun fasi fa unu e tyari unsrefi, fu piki Satan, a sma di e spotu en!​—Odo 27:11.

Wi breiti taki na ini a yari 2011, wi ben abi 19.374.737 sma di ben kon na a Memrefesa fu a dede fu wi Masra. Na fu di so furu sma ben wroko leki yepipionier na ini a mun april fu a yari di pasa, meki so furu sma ben kon na a Memrefesa. Milyunmilyun sma na heri grontapu ben kan yere fa den Kotoigi fu Yehovah ben e prèise Yehovah leki wán man! (Rom. 10:18) Awansi yu ben de wan fu den 2.657.377 yepipionier a mun dati, noso yu ben pruberi fu du moro na ini a diniwroko, unu meki wi prisiri trutru fu di wi si taki unu ben de klariklari fu du a wroko èn unu ben du en nanga faya tu.​—Ps. 110:3; Kol. 3:23.

A yari di pasa, 263.131 sma teki dopu fu sori taki den gi densrefi abra na Yehovah. Wi e taki Yehovah tangi gi disi, èn wi e taki un alamala tangi taki makandra nanga wi, unu ben gi sma a kari: „’Kon!’ Ibri sma di e yere disi, meki a taki: ’Kon!’ Ibri sma di watra e kiri en, meki a kon. Meki ibri sma di wani, kon dringi fu a watra di e gi libi èn di de fu kisi fu soso” (Openb. 22:17). Spesrutu fu di wi leri moi sani di abi fu du nanga Gado Kownukondre na a kongres fu 2011, meki wi e taki nanga moro faya: „Meki Gado Kownukondre kon!” Yesus ben gi wi a dyaranti: „Mi o kon esi.” Dati meki nanga wi heri ati wi e taki a srefi neleki na apostel Yohanes: „Amen! Kon, Masra Yesus.”​—Openb. 22:20.

Unu e tan na ai fu si fa a sani disi o pasa. Disiten unu kan abi a dyaranti taki wi lobi ibri brada nanga sisa trutru fu di nanga wan ’krin ati èn nanga den sani di unu e du’ unu e sori taki un lobi Yehovah!​—1 Yoh. 3:18.

Un brada,

A Tiri Skin fu Yehovah Kotoigi