’Meki sma fu ala kondre tron disipel’

1, 2. Fa yu kan horibaka gi a Tiri Skin di abi a frantwortu fu luku fa a preikiwroko e du na heri grontapu?

¹ Yesus Krestes ben taki na fesi dati a bun nyunsu ben o preiki na heri grontapu „so taki sma fu ala kondre kan yere dati”. Ala sma di e du a preikiwroko èn di e gi sma leri, frustan krin san a wroko dati wani taki (Mat. 24:14; 28:​19, 20). Te wi e du a preikiwroko, dan wi kan miti sma di e taki wan tra tongo. Den sma disi musu kisi na okasi tu fu yere a Kownukondre boskopu èn fu sori krin taki den e anbegi a tru Gado bifo a bigi dei fu Yehovah doro di e meki sma frede (Mal. 3:18). San wi kan du gi den sma di e taki wan tra tongo na ini a kontren pe wi musu preiki?

² Na heri grontapu, a de so taki wi e poti moro prakseri na sma di e taki wan tra tongo. Fu dati ede a de fanowdu taki na ini wi kondre, wi musu meki moro muiti fu du sani soleki fa a Tiri Skin wani taki wi musu du en now. (Luku Wi orga-buku, blz. 104-108.) Meki wi go luku wan tu fu den bodoi moro fini.

3. Sortu frantwortu ibri preikiman abi?

³ Fa wi kan poti moro prakseri na den sma di e taki wan tra tongo? Den bodoi disi e meki taki ala preikiman, sosrefi den wan di de na ini den Sranantongo gemeente, e du moro muiti fu yepi den sma di e taki wan tra tongo fu di den abi a frantwortu fu du dati. Bijbel e taki dati „koni rai o yepi yu fu feti wan bun feti” (Odo 20:18). Fu man du disi wi musu hori bun na prakseri fa wi musu yepi den sma di e taki wan tra tongo èn wi abi a marki fu preiki finifini gi „ala sortu sma” (1 Tim. 2:​4). San wi musu hori na prakseri na taki a gemeente srefi abi a frantwortu fu preiki gi ala sma na ini a kontren fu den èn den musu du dati finifini. Efu a kan, dan a sma kan yere a bun nyunsu na ini a tongo di a e taki (Odo 3:27). Na so fasi wi e hori wisrefi na den moro nyun bodoi fu a srafu di de fu frutrow (Mat. 24:​45-47).

4, 5. San na a moro bun fasi fu yepi wan sma di e taki wan tra tongo?

⁴ San yu musu du te yu miti wan sma na ini yu kontren di e taki wan tra tongo? Yu o du a srefi neleki te yu ben o miti wan sma di e taki Sranantongo, èn dati na fu preiki a bun nyunsu gi en. Kande yu o gebroiki a brochure di nen Goed nieuws voor mensen uit alle landen. Yu musu skrifi na adres fu a sma? Tu sani kan pasa: (1) A sma trutru wani sabi moro, noso (2) na a momenti dati a sma no wani sabi moro. Efu a sma trutru wani sabi moro, dan yu musu gebroiki a S-43 papira di nen Nabezoek. Den brada o seni a papira gi a gemeente di musu preiki gi sma di e taki a tongo na ini a kontren dati. Efu dati no kan, dan den musu seni en go na a bijkantoro. A bijkantoro o seni a papira gi wan preikiman di ben gi en nen taki a man taki wan tra tongo bun, na tapu a S-17 papira di nen Vragenlijst over verkondigers die een vreemde taal beheersen. Te a sma no wani sabi moro na a momenti dati, dan yu no abi fu du noti, boiti efu den owruman seti sani gi sma di e taki a tongo dati.

⁵ Baka te yu skrifi a sma en nen tapu a S-43 papira, dan yu kan tan go na a sma teleki wan preikiman di e taki a tongo fu a sma go na en. Te a preikiman di e taki a tongo fu a sma e go na en, dan a ben o bun fu tan go luku a sma wanwan leisi. Kande a preikiman dati musu kon fu farawe, kande a no man go na a sma ala ten, noso a presi pe den konmakandra e hori na ini a tongo fu a sma de farawe. A kan de so tu taki nowan sma e taki a tongo fu a sma. Dan yusrefi musu du muiti fu yepi a sma. Awinsi fa a no fa, wan fasi de fu yepi a sma.

6, 7. Fu san ede wi musu hori wisrefi finifini na den sani di seti na ini wi gemeente fu preiki gi sma di e taki wan tra tongo?

⁶ Sortu kontren den gemeente nanga grupu di e taki wan tra tongo musu wroko? Na ini a Wi orga-buku na tapu bladzijde 107 skrifi: „Na ini furu bigi foto, den preikiman fu den difrenti gemeente musu poti prakseri spesrutu na den sma di e taki a tongo di densrefi e taki, fu di den kontren pe sma e taki difrenti tongo e prati akruderi a tongo di den sma e taki.” Efu disi de so na ini yu kontren, dan den owruman fu yu gemeente o taigi yu sortu gemeente noso grupu di e taki wan tra tongo e wroko na ini a srefi kontren leki unu. Sobun, wroko makandra nanga den owruman fu yu gemeente. Na so fasi, ibri ososma kan kisi yepi.

⁷ Fa a kontren fu wan gemeente noso grupu di e taki wan tra tongo, musu seti? A Wi orga-buku e sori taki a kontren di wan gemeente e kisi fu wroko no musu bigi tumusi. Na tapu bladzijde 105 skrifi fa wan gemeente e kisi wan kontren fu wroko: „Te a de so taki yu abi wan moi grupu fu trakondre-sma di kon libi na ini a kontren fu a gemeente, dan den owruman musu orga a preikiwroko, so taki den sma disi kan kisi yepi na yeye fasi. A kan taki den sma di e taki wan tra tongo e libi panyapanya na ini a kontren fu tu noso moro gemeente di de krosibei fu makandra.” Efu a kontren fu a gemeente di e taki wan tra tongo de na foto èn na ini a kontren fu „tu noso moro gemeente di de krosibei fu makandra”, dan den no o abi fu go na farawe presi. Disi o meki taki a no o kostu so furu moni èn a no o teki so furu ten fu den preikiman fu preiki gi den sma dati. Boiti dati, den o man luku a kontren fu den moro bun, fu di den o abi fu wroko makandra soso nanga wan tu tra gemeente (1 Kor. 14:40). Fu dati ede a kontren fu wan gemeente noso grupu di e taki wan tra tongo, no o bigi so moro.

8. Fa yu kan kisi a blesi fu Yehovah?

⁸ Abi prisiri na ini a wroko di wi e du makandra. Fu di a libimakandra e kenki, meki wi leki preikiman èn leriman fu a bun nyunsu musu du moro muiti fu fiti wisrefi. Abi a srefi denki leki Paulus, di ben suku sma fu preiki fayafaya gi den. A ben kan taki dati a ben ’fruteri sma finifini taki den musu abi berow, den musu teki Gado sei èn bribi na ini wi Masra Yesus’ (Tori 20:​21-24). A ben de klariklari fu ’tron ala sani gi ala sortu sma fu frulusu sma, awinsi na wan tu nomo’ (1 Kor. 9:​19-23). A de krin taki Yehovah ben yepi Paulus èn a ben gi en a santa yeye fu du en diniwroko (Tori 14:​3, 4). Te yu fruteri „sma fu ala kondre” finifini fu a bun nyunsu, dan yu kan de seiker taki Yehovah o tan tiri èn blesi yu.

[Prenki na tapu bladzijde 5, 6]

(Efu yu wani si pe den sani disi skrifi, luku a Kownukondre diniwroko)

S-43 papira