Wan brifi fu a Tiri Skin

Wi lobi brada nanga sisa,

Wi hemel Tata, Yehovah na a moro bun eksempre fu wan sma di abi lobi. Dati meki Bijbel e taki: „Gado na lobi” (1 Yoh. 4:8). Aladi Yehovah na a almaktiwan, toku noiti en Wortu e taki dati „Gado na krakti” noso „Gado na makti”. A e gi wi den wèt fu en fu di a lobi wi. A sani disi e meki wi lobi en trutru!

Koloku taki Yehovah no e dwengi wi fu dini en. A no de wan ogri-ati tiriman. A wani taki wi dini en fu di wi lobi en nanga wi heri ati. Te wi e du disi, dan wi e sori taki wi wani a tiri fu en, fu di wi sabi taki a e tiri na a yoisti fasi èn na wan lobi-ati fasi. Disi de krin fu si sensi na a bigin di a meki libisma.

Na presi fu dwengi Adam nanga Eva fu du san a taki, Yehovah gi den na okasi fu teki den eigi bosroiti. Efu trutru den ben lobi Yehovah èn ben e warderi san a du gi den, dan den no ben o arki Satan èn opo densrefi teige Gado.

Bakaten, Moses taigi a pipel fu Israel den lasti wortu disi: „Tide mi o meki unu srefi bosroiti san unu wani. Den bosroiti di unu o teki, kan meki taki sani o waka bun gi unu èn unu o tan na libi, noso taki ogri o miti unu èn unu o dede” (Deut. 30:15). A pipel ben kan bosroiti gi densrefi fa den ben wani libi. Dati meki Yosua ben taigi den Israelsma: „Efu unu no wani dini Yehovah, dan unu srefi musu bosroiti tide suma unu wani dini.” Baka dati a pipel taigi Yosua: „Noiti wi ben o man gowe libi Yehovah” (Yos. 24:15, 16). Wisrefi e denki so tu na ini a ten disi. ’Noiti wi o gowe libi’ Yehovah, fu di wi lobi en.

Na ini a Kresten gemeente, wi e frustan krin san a wani taki fu teki wi eigi bosroiti. Aladi owruman abi a frantwortu fu gi rai nanga leri, den no e pruberi fu basi a libi noso a bribi fu trawan. Na apostel Paulus skrifi: „A no de so taki wi na basi fu un bribi, ma wi e wroko makandra nanga unu, so taki unu kan de nanga prisiri. Bika na a bribi fu unu e meki taki unu e tanapu kánkan.”​—2 Kor. 1:24.

A e gi wi prisiri te wi e du wan sani, fu di wisrefi wani du en, no fu di wan sma e dwengi wi! Yehovah wani taki wi musu du san bun, fu di wi lobi en. Paulus skrifi o prenspari a sani disi de: „Awinsi mi e seri ala san mi abi fu gi pôtiwan wan sani fu nyan, èn awinsi mi e gi mi skin leki wan srakti-ofrandi fu man meki bigi, ma mi no abi lobi, dan dati no e tyari nowan enkri wini kon gi mi.”​—1 Kor. 13:3.

A e gi Yehovah furu prisiri èn a e gi en glori tu fu si milyunmilyun brada nanga sisa fu wi di e dini en fu di den lobi en nanga den heri ati.

Yehovah fu en sei, lobi ala den futuboi fu en trutru. A lobi sosrefi unu yonguwan nanga tini di e sori taki unu lobi Yehovah, na presi fu lobi grontapu pe sma e plisi densrefi nomo. Wi wani taigi unu tu taki wi lobi unu trutru.​—Luk. 12:42, 43.

A yari di pasa, den brada nanga sisa nanga den yonguwan ben preiki 1.748.697.447 yuru fu prati a bun nyunsu, fu di den lobi Yehovah. A lobi disi meki taki 7.782.346 preikiman na heri grontapu ben du a preikiwroko. Wi breiti taki 268.777 nyunwan gi densrefi abra na Yehovah èn teki dopu. Furu fu den na yonguwan. Disi wani taki dati ibri satra nanga sonde sowan 5168 sma ben teki dopu. A sani disi e naki wi ati trutru!

Na a ten disi fu a kaba, a pipel fu Gado e kisi furu problema, tesi, frufolgu, den e siki èn sonwan fu den e kon owru. Ma wi teki a bosroiti fu no „frede” èn fu no „gi abra” noiti. Wi lobi un alamala trutru.​—Hebr. 10:39; 2 Kor. 4:16.

Un brada,

A Tiri Skin fu Yehovah Kotoigi