Teki a bun eksempre fu den profeiti—Hosea
1. San yu aksi yusrefi kande?
1 ’San mi de klariklari fu du gi Yehovah?’ Kande yu ben aksi yusrefi a sani dati di yu ben prakseri o furu bun Yehovah du gi yu èn o furu sari-ati a abi gi yu (Ps. 103:2-4; 116:12). Hosea ben de klariklari fu du san Yehovah taigi en fu du, aladi dati ben o aksi furu fu en. Fa wi kan de neleki Hosea?
2. Fa wi kan teki a moi eksempre fu Hosea fu tan du a preikiwroko?
2 Preiki na ini muilek ten: A boskopu fu Hosea ben de spesrutu gi a tin-lo kownukondre Israel pe pikinmoro nowan sma ben anbegi a tru Gado moro. Kownu Yerobeyam II ben du sani di Yehovah no ben feni bun èn a ben go doro nanga na anbegi fu pikin kaw di Yerobeyam I ben seti (2 Kow. 14:23, 24). Den tra kownu di ben tiri baka dati, ben tan du sani di meki taki a tin-lo kownukondre no ben e anbegi Gado fayafaya moro, èn te fu kaba a kisi pori na ini 740 fosi Krestes. Ma aladi sma ben tan anbegi falsi gado, toku Hosea ben tan dini leki profeiti sowan 59 yari langa. Wi o tan preiki ibri yari baka neleki Hosea, aladi sma no wani arki èn aladi wi e kisi gens?—2 Tim. 4:2.
3. Fa a fasi fa Hosea ben libi e sori a sari-ati fu Yehovah?
3 Poti prakseri na a sari-ati fu Yehovah: Yehovah taigi Hosea taki a musu trow nanga ’wan uma di du hurudu’ (Hos. 1:2). Aladi en nanga en wefi Gomer ben kisi wan manpikin, toku bakaten Gomer meki tu pikin fu di a du sutadu nanga wan tra man. Hosea ben de klariklari fu gi en wefi pardon. A sani disi di a du e sori o furu sari-ati Yehovah abi gi den Israelsma di ben trangayesi En, ma di ben abi berow (Hos. 3:1; Rom. 9:22-26). Wi de klariklari fu libi son sani di wi lobi na baka, so taki wi kan meki ala sortu sma kon sabi a sari-ati fu Yehovah?—1 Kor. 9:19-23.
4. San na wan tu sani di wi kan du fu du moro gi Yehovah?
4 Son anbegiman fu Yehovah ben kan meki en na ini grontapu, ma den no du dati soso fu du moro na ini a diniwroko. Tra brada nanga sisa teki a bosroiti fu no trow noso fu no abi pikin, soso fu du moro gi a Kownukondre fu Gado. Te wi e prakseri a libi fu Hosea, dan wi e denki kande taki noiti wi o man du san en ben du. Ma te wi abi moro warderi gi a bunfasi fu Yehovah èn te wi e bribi taki en santa yeye o gi wi krakti, dan neleki Hosea a kan gebroiki wi na wan fasi di noiti wi ben prakseri.—Mat. 19:26; Fil. 2:13.