Hori Bijbelstudie di e go na fesi
1. Sortu frantwortu den preikiman di e hori Bijbelstudie abi?
1 Nowan sma kan dini Gado efu Yehovah ’no hari en kon’ (Yoh. 6:44). Ma toku den preikiman di abi Bijbelstudie musu meki muiti fu yepi den Bijbelstudie fu abi wan bun matifasi nanga den hemel Tata (Yak. 4:8). Efu wi wani du disi bun, dan wi musu sreka wisrefi. Efu wi wani meki den studenti frustan a boskopu èn go na fesi, dan wi no musu leisi den paragraaf nomo èn poti den aksi di skrifi.
2. San wi musu du fu yepi wan Bijbelstudenti fu go na fesi?
2 Efu wi wani taki den Bijbelstudenti fu wi go na fesi, dan wi musu yepi den (1) fu frustan san Bijbel e leri, (2) fu bribi san Bijbel e leri, èn (3) fu du san Bijbel e leri (Yoh. 3:16; 17:3; Yak. 2:26). A kan teki omeni mun fu yepi wan sma fu du den sani disi. Ma ibriwan fu den sani disi o yepi en fu kisi wan matifasi nanga Yehovah èn fu gi ensrefi abra na En.
3. Fu san ede wan bun leriman e aksi a studenti san a e denki?
3 Fa a Bijbelstudenti e denki?: Te wi wani sabi efu wi Bijbelstudenti e frustan san a e leri en èn efu a e bribi dati, dan wi wawan no musu taki na a heri studie, ma wi musu gi en deki-ati fu taki fa a e denki (Yak. 1:19). A e frustan san Bijbel e taki fu a tori di unu e studeri? A kan fruklari a tori nanga en eigi wortu? Fa a e denki fu den sani di a leri? A e bribi taki den sani di Bijbel e leri de so trutru? (1 Tes. 2:13) A e frustan taki a musu fiti den sani di a leri na ini en libi? (Kol. 3:10) Fu man sabi a piki tapu den aksi disi, wi musu poti aksi di o gi a studenti deki-ati fu taki fa a e denki, èn wi musu arki san a e taki.—Mat. 16:13-16.
4. San wi musu du te a studenti no man frustan wan Bijbel leri krin, noso te a muilek gi en fu fiti den sani di a e leri na ini en libi?
4 Son sma abi takru gwenti di muilek fu broko èn a kan tu taki den abi wan fowtu denki fu sani langa ten kaba. Dati meki a o teki ten fu kenki den gwenti èn den fowtu denki fu den (2 Kor. 10:5). Ma san wi kan du efu a studenti no e bribi den sani di a e leri noso efu a no e du den? Wi musu abi pasensi. A kan teki langa fosi Gado Wortu nanga a santa yeye wroko tapu na ati fu wan studenti (1 Kor. 3:6, 7; Hebr. 4:12). Efu a studenti no man frustan wan Bijbel leri krin, noso efu a muilek gi en fu fiti en na ini en libi, dan wi no musu dwengi en. Na presi fu dati a moro bun fu go doro nanga wan tra Bijbel leri. Efu wi abi pasensi nanga a studenti èn wi e tan gi en Bijbel leri na wan lobi-ati fasi, dan a kan taki bakaten disi o pusu en fu tyari kenki kon.