WI KRESTEN LIBI

Wan nyun sani na a mindriwiki konmakandra

Bigin nanga 1 yanuari 2018, a mindriwiki konmakandra o abi wan nyun sani di teki puru fu a Studie Bijbel tapu Internet [New World Translation of the Holy Scriptures (nwtsty)]. A Bijbel disi e fruklari son wortu, son presi nanga tra sani moro fini èn yu kan si felem noso fowtow tu. Awinsi a Bijbel disi no de na ini yu tongo, toku yu kan leri moro te yu e gebroiki den sani disi fu sreka gi den konmakandra. San moro prenspari na taki a o yepi yu fu si krin taki Yehovah wi Tata lobi wi!

ETE WAN TU SANI

A pisi disi e taki moro fini fu son presi, son wortu noso son sani di abi fu du nanga a kulturu fu Bijbel ten. Disi e yepi wi fu frustan den Bijbeltekst moro bun.

Mateyus 12:20

Wan faya di e suku fu dede: Nofo tron den lampu di sma ben gebroiki ben meki fu klèidoti, èn den ben abi olèif-oli na ini. Den ben abi wan pisi titei na ini di ben e soigi na oli, so taki a lampu ben e tan bron. Den Griki wortu di vertaal nanga „wan faya di e suku fu dede” e sori taki a titei ben e puru smoko fu di a faya ben kon pikin. A profeititori fu Yesaya 42:3 ben taki na fesi taki noiti Yesus ben o kiri wan faya di e suku fu dede. Disi wani taki dati a ben o abi firi gi sakafasi sma nanga sma di brokosaka. Awinsi den sma disi ben de leki wan pikin faya di e suku fu dede, toku a ben e tyari wan boskopu fu howpu gi den.

Mateyus 26:13

Fu tru: A Griki wortu amen nanga a Hebrew wortu aman wani taki „na so a de” noso „fu tru”. Yesus ben lobi gebroiki a wortu disi te a ben e taki fu wan tori, wan pramisi noso fu wan profeititori. Na so a ben sori taki san a e taki tru èn sma kan frutrow en. Yesus e gebroiki a wortu disi soso ini den Evangelietori. Na nowan tra presi na ini Bijbel noso tra kerki buku, a wortu „fu tru” noso amen de fu feni. Na ini a Evangelietori fu Yohanes, wi e si taki Yesus e taki a wortu „amen” tu tron baka makandra. A ben du dati fu sori taki san a e taki, tru.—Yoh 1:51.

FELEM NOSO FOWTOW

Fowtow, prenki, felem nanga tra tekening e yepi wi fu frustan son sani di skrifi na ini Bijbel moro bun.

Betfage, Olèif-bergi nanga Yerusalem

A syatu felem disi e sori a pasi di sma ben e teki te den ben komoto fu owstusei fu go na Yerusalem. Den ben e pasa a dorpu di sma sabi now leki et-Tur fu go na a moro hei pisi fu Olèif-bergi. A kan taki a dorpu disi na Betfage di kari na ini Bijbel. Betania de na owstusei fu Betfage, na a owstusei pisi fu Olèif-bergi. Te Yesus nanga den disipel fu en ben de na Yerusalem, den ben gwenti sribi na Betania, di sma sabi now leki a foto el-ʽAzariyeh (El ʽEizariya). Na ini Arabiatongo a nen disi wani taki „A presi fu Lasarus”. Wi de seiker taki Yesus ben gwenti sribi na a oso fu Marta, Maria nanga Lasarus (Mt 21:17; Mr 11:11; Lu 21:37; Yoh 11:1). Te Yesus ben komoto fu den oso fu go na Yerusalem, dan a kan taki a ben e teki a srefi pasi di sori na ini a felem. Tapu 9 Nisan fu a yari 33, di Yesus rèi pasa Olèif-bergi tapu wan buriki fu go na Yerusalem, dan a kan taki a teki a pasi fu Betfage di e go na Yerusalem.

Pasi fu Betania go na Betfage
Betfage
Olèif-bergi
Kidron-lagipresi
Presi pe a tempel de

Wan spikri na ini wan bakafutu

Disi na wan fowtow di e sori fa wan spikri fasi na ini a bakafutu fu wan sma. A spikri meki fu isri èn a langa 11.5 centimeter. Sabiman feni a bonyo disi na ini 1968 na a noordsei fu Yerusalem di den ben diki sani puru na ini gron. A de fu a ten fu den Romesma. Sabiman e taki dati disi na wan buweisi taki den ben e gebroiki spikri fu fasi sma na udu postu. A spikri gersi den wan di den Rome srudati ben gebroiki fu spikri Yesus Krestes na wan postu. Den ben feni a spikri disi na ini wan ston baki pe den e poti den drei bonyo fu wan dedesma, baka te a skin fu den ben pori. Disi e sori taki den ben e beri sma di den ben kiri na wan postu.—Mt 27:35.