San sma e taki fu begi
„Te mi e begi, mi e firi leki Gado de na mi sei, a e hori mi anu èn a e yepi mi te mi no sabi san fu du.”—MARÍA.
„Mi frow ben abi kanker 13 yari langa èn a dede te fu kaba. Mi e memre fa mi ben e begi Gado ibri dei èn mi ben e firi taki a ben arki mi te mi ben e sari. Mi ben kisi trowstu.”—RAÚL.
„Begi na wan moi kado di Gado gi libisma.”—ARNE.
Begi na wan moi kado gi María, Raúl, Arne, nanga furu tra sma. Den feni taki begi e meki taki den man taki nanga Gado, den man taki en tangi èn den man suku yepi na en. Den e bribi a sani disi di Bijbel e taki fu begi: „Wi sabi taki awansi san wi e aksi en, a e yere wi, solanga a e kruderi nanga a wani fu en.”—1 Yohanes 5:14.
Ma furu tra sma no e bribi san a tekst disi e taki. Steve sabi ete fu san ede a no ben wani begi moro: „Di mi tron 17 yari, dri mati fu mi dede. Wán fu den dede di wagi naki en èn den tu trawan dede na se.” San Steve du? A taki: „Mi begi Gado fu kon sabi fu san ede ala den sani disi ben pasa, ma mi no kisi piki. Dan mi denki: ’Fu san ede mi musu begi ete?’” Furu sma feni taki den no kisi piki tapu den begi fu den èn fu dati ede den no sabi efu den musu begi ete.
Tra reide de tu fu san ede son sma feni taki begi no e yepi. Son sma e taki dati Gado sabi san wi abi fanowdu, noso san na den problema fu wi fu di a sabi ala sani. Dati meki a no de fanowdu fu fruteri en den sani disi moro.
Tra sma e bribi taki Gado no wani arki den begi fu den, fu di den ben meki fowtu. Jenny e taki: „A moro bigi problema di mi abi, na taki mi e firi leki mi no warti noti. Fu di mi du son sani di e hati mi te now ete, meki mi feni taki mi no warti fu Gado arki den begi fu mi.”
San yu e denki fu begi? Efu yu srefi feni taki a no de fanowdu fu begi noso efu yu no de seiker efu begi e yepi, dan yu o breiti fu sabi taki Bijbel kan piki den aksi fu yu. Wi kan bribi den sani di Bijbel e taki fu begi.a Bijbel kan yepi yu fu feni piki tapu den aksi disi:
Gado e arki den begi fu wi trutru?
Fu san ede Gado no e piki ala begi?
Fa yu kan begi na so wan fasi taki Gado arki den begi fu yu?
Fa begi kan yepi yu?
a Na ini Bijbel yu kan feni furu begi fu futuboi fu Gado, sosrefi den begi fu Yesus Krestes. Den Hebrew Buku fu Bijbel di sma sabi leki na Owru Testamenti abi moro leki 150 begi.