Wan Dyu uma e fruteri fu san ede a go ondrosuku a bribi fu en

Fruteri wi pikinso fu yusrefi.

Mi gebore na ini Amerkankondre ini a yari 1979. Di mi ben abi dri yari, mi papa nanga mama broko trow. Mi mama kweki mi nanga Dyu gwenti èn a poti mi na wan skoro pe den ben e taki Dyutongo. Di mi ben abi seibi yari wi froisi go tan na Israel gi wán yari. Drape mi ben e go na skoro na ini wan birti di den e kari kibboet. Baka dati mi nanga mi mama froisi go tan na Meksikow.

Aladi wan snoga no ben de na ini a kontren dati, toku mi ben tan hori misrefi na den Dyu gwenti. Tapu sabadei mi ben leti kandra, leisi wi Tora, èn mi ben e begi nanga yepi fu a siddoer noso wan buku pe begi skrifi na ini. Mi ben lobi fruteri den tra pikin ini mi klas dati a bribi fu mi na fosi bribi di ben de. Noiti mi ben leisi a Nyun Testamenti di e taki fu den leri fu Yesus Krestes nanga a wroko fu en. Fu taki en leti mi mama ben taigi mi fu no leisi en, fu di a ben e frede taki den leri dati ben o pori mi denki.

Fu san ede yu bosroiti fu leisi a Nyun Testamenti?

Di mi ben abi 17 yari, mi drai go baka na Amerkankondre fu go na heiskoro. Drape wan sma di mi ben sabi èn di ben taki dati en na wan Kresten, taigi mi taki mi ben abi Yesus fanowdu fu abi wan bun libi.

Mi taigi en: „Den sma di e bribi na ini Yesus lasi den frustan”.

A aksi mi: „Yu leisi a Nyun Testamenti wan leisi kaba?”

Mi taigi en: „Nôno”.

A piki mi: „Ma efu yu no sabi noti fu a tori, dan fa yu sabi taki a no bun?”

A sani dati hati mi, fu di ala ten mi ben feni en wan don sani fu taki fa yu e denki sondro fu sabi wan tori. Dati meki mi tyari a Bijbel fu en go na oso èn mi bigin leisi a Nyun Testamenti.

Fa den sani di yu leisi ben abi krakti tapu yu?

Mi ben fruwondru di mi kon sabi taki den sma di skrifi a Nyun Testamenti ben de Dyu. O moro mi ben e leisi, o moro mi ben e si taki Yesus ben de wan Dyu di ben abi switifasi nanga sakafasi. Mi ben kon si tu taki a no ben kori sma, ma a ben wani yepi den. Mi go leni buku srefi na presi pe sma kan leni buku, fu ben leisi moro fu Yesus. Ma nowan fu den buku disi ben man overtoigi mi taki Yesus na a Mesias. Sonwan fu den buku disi ben e kari Yesus Gado​—wan sani di mi no ben man frustan. Suma Yesus ben e begi? Na ensrefi a ben e begi? Wan tra sani, na taki Yesus dede. Ma Bijbel e taki fu Gado: „Yu no e dede.”a

Fa yu feni piki tapu den aksi disi?

Den tekst na ini Bijbel e kruderi nanga densrefi, èn mi ben wani sabi san na waarheid. Dati meki mi begi Gado komoto fu mi ati​—fu a fosi leisi sondro mi siddoer. Di mi kaba begi, wan sma naki na tapu a doro. A ben de tu Yehovah Kotoigi. Den gi mi wan fu den buku di den e studeri Bijbel nanga sma. A buku dati nanga den takimakandra di mi ben abi nanga den Kotoigi, ben gi mi na overtoigi taki den sani di den e bribi na san Bijbel e taki. Fu eksempre, den Kotoigi no e si Yesus leki dri sma na ini wan, ma leki „Gado manpikin”b nanga „a bigin fu ala sani di Gado meki.”c

A no langa baka dati, mi drai go baka na Meksikow. Mi tan studeri nanga den Kotoigi fu sabi den profeititori di abi fu du nanga a Mesias. Mi ben fruwondru fu sabi taki someni profeititori de! Ma toku mi ben e tweifri ete. Mi ben e aksi misrefi: ’Nanga yepi fu Yesus wawan den profeititori disi kon tru? A kan taki Yesus ben e du neleki en na a Mesias?’

Fa a du kon taki yu no e tweifri moro

Den Kotoigi sori mi wan tu profeititori di wan sma no man gebroiki fu kori trawan. Fu eksempre, a profeiti Mika ben taki 700 yari na fesi dati a Mesias ben o gebore na ini Betlehem, na ini Yudea.d Wan sma kan taki pe a o gebore? Yesaya ben skrifi dati sma ben o kiri a Mesias leki wan ogriman, ma a ben o beri pe den e beri den gudu wan.e Ala den profeititori disi kon tru na ini Yesus.

Wan lasti sani di ben sori mi taki Yesus na a Mesias, na a famiri pe Yesus komoto. Bijbel e taki dati a Mesias ben o de wan bakapikin fu Kownu David.f Fu di den Dyu fu owruten ben abi buku pe den ben e skrifi den nen fu sma di ben de fu wan famiri, meki den ben o man sabi efu Yesus ben de wan bakapikin fu David trutru. Sobun, efu Yesus no ben de fu a famiri fu David, dan den feanti fu en ben o meki ala sma kon sabi dati. Ma den no ben du dati, fu di Yesus ben de wan bakapikin fu David trutru. Sma ben e kari en „a manpikin fu David”g srefi.

Na ini a yari 70, a legre fu Rome pori a foto Yerusalem èn den pori ala den buku pe den nen nanga den lo fu sma ben skrifi. Dati ben de 37 yari baka di Yesus dede. Sobun, a Mesias ben musu kon fosi a yari 70, fu di sma no ben o man sabi suma ben de den afo Yesus, baka a yari dati.

Fa den sani disi di yu kon sabi ben abi krakti na yu tapu?

Bijbel ben taki na fesi na ini Deuteronomium 18:18, 19, taki Gado ben o teki wan sma na ini Israel fu de wan profeiti leki Moses. Gado taki: „Efu wan sma no arki a profeiti disi di e taki na ini mi nen, dan mi o aksi a sma frantwortu fu dati.” Baka di mi studeri a heri Bijbel bun, mi ben de seiker taki na Yesus fu Nasaret ben de a profeiti dati.