INTERVIEW | ANTONIO DELLA GATTA
Fu san ede wan priester gowe libi en kerki?
INI 1969, baka di Antonio Della Gatta teki leri neigi yari langa na ini Rome, a tron wan priester. Bakaten a tron fesiman, noso edeman fu wan skoro pe den e leri sma fu tron priester, krosibei fu Napels na Italiakondre. Di a ben drape a studeri bun furu èn a denki dipi fu sani, ma baka wan pisi ten a kon frustan taki den sani di a Lomsu bribi ben e leri sma no komoto fu Bijbel. A taki nanga Ontwaakt! fu a muiti di a meki fu feni a tru Gado.
Yu kan fruteri wi fu a ten di yu ben de wan pikin-nengre?
Mi gebore ini 1943 na Italiakondre. Mi gro kon bigi na ini wan pikin dorpu makandra nanga den brada nanga sisa fu mi. Drape, mi papa ben e wroko gron èn a ben de wan temreman. Wi papa nanga mama kweki wi fu tron bun Lomsusma.
Fu san ede yu ben wani tron wan priester?
Di mi ben de wan boi, mi ben lobi arki den priester ini kerki. Mi ben lobi a sten fu den nanga den moi kerkigwenti di den ben e hori. Dati meki mi ben wani tron wan priester tu. Di mi ben abi 13 yari, mi mama tyari mi go na wan internaat. Na internaat disi ben abi wan skoro pe den ben e sreka boi fu tron priester bakaten.
Yu ben e studeri Bijbel drape tu?
Fu taki en leti, nôno. Di mi ben abi 15 yari, wan fu den sma di ben e gi wi leri gi mi wan buku di ben abi den evangelietori na ini. A buku disi ben e taki fu a libi fu Yesus nanga en diniwroko. Mi leisi en furu leisi. Di mi ben abi 18 yari, mi go na Rome fu teki leri na den universiteit di ben abi a pawsu leki edeman. Drape mi leri Latijntongo, Grikitongo, historia, filosofia, psychologie, kerkigwenti nanga kerkileri. Wi ben e leri Bijbel vers na ede di wi ben e taki ibri tron baka. Te sonde mamanten wi ben e yere tu te den ben e leisi Bijbel, ma a no studeri wi ben e studeri Bijbel trutru.
Yu tron na edeman fu wan priester-skoro. Yu ben e gi leri tu?
Na soso kantorowroko mi ben e du. Ma mi ben e gi leri tu di ben abi fu du nanga bosroiti di teki tapu a di fu tu Bigi Konmakandra fu a Vatikan.
Fu san ede yu ben bigin tweifri na a kerki fu yu?
Dri sani ben e trobi mi. A kerki ben e teki prati na politiek. Te kerki fesiman noso tra sma ini a kerki e du wani sani di no bun, dan sma no e du noti. Leki fa mi ben e si en, dan sonwan fu den leri fu Lomsu kerki no ben tru. Fu eksempre, fa wan lobi-ati Gado kan pina sma fu têgo, baka te den dede? Wan tra sani: Gado wani trutru taki wi e taki a srefi begi hondrohondro tron baka, aladi wi e gebroiki wan rowskransi?a
San yu du dan?
Nanga watra-ai mi begi fu kon sabi san fu du. Mi bai wan Lomsu Bijbel di no ben kon na doro so langa ete na ini Italiatongo, dan mi bigin leisi en. Wan sonde mamanten di mi ben e anga a priesterkrosi fu mi, baka di mi komoto na kerki, tu man kon tapu a dyari fu a priester-skoro. Den taigi mi taki den na Yehovah Kotoigi. Wi taki moro leki wán yuru fu Bijbel èn san Bijbel e taki fu a fasi fa sma kan kon sabi a tru bribi.
San yu ben e denki fu den man disi?
Mi ben fruwondru fu a bribi fu den nanga a makelek fasi fa den sori mi tekst na ini a Lomsu Bijbel. Bakaten wan tra Kotoigi di nen Mario bigin kon na mi. A ben abi pasensi èn yu ben kan frutrow en. Ibri satra neigi yuru mamanten, a ben e naki na tapu a doro, awansi alen ben e fadon noso a son ben faya.
San den tra priester ben denki fu den sma di ben e kon na yu?
Mi aksi den fu kon sidon nanga wi te wi ben abi den takimakandra, ma nowan fu den ben teki a Bijbelstudie seryusu. Ma mi ben lobi a studie. Mi ben e kon sabi den moi leri fu Bijbel, soleki fu san ede Gado e gi pasi taki ogri nanga pina de. Fosi mi no ben man frustan a sani disi srefisrefi.
Den priester di ben e teki fesi drape tapu fu yu studeri Bijbel?
Na ini 1975, mi go wan tu leisi na Rome fu fruteri fa mi e denki fu sani. Den priester di ben e teki fesi pruberi fu kenki a fasi fa mi ben e denki, ma nowan fu den gebroiki Bijbel. Te fu kaba, tapu 9 yanuari 1976, mi skrifi wan brifi fu taigi den taki mi no ben o de wan memre fu Lomsu kerki moro. Tu dei baka dati, mi gowe libi a priester-skoro èn mi teki wan loko fu go na wan konmakandra fu Yehovah Kotoigi fosi tron. Ma di mi doro drape, a ben de wan bigi konmakandra pe furu gemeente ben kon na wán. Ala sani ben de heri tra fasi leki fa mi ben gwenti! Ibriwan fu den Kotoigi ben abi wan Bijbel èn den ben e luku na ini den eigi Bijbel te den takiman ben e taki fu difrenti tori.
San yu famiri ben feni fu a bosroiti di yu teki?
Furu fu den no ben lobi en srefisrefi. Ma mi ben kon sabi taki wan brada fu mi, di ben e libi na Lombardije, wan presi na noordsei fu Italiakondre, ben e studeri nanga Yehovah Kotoigi. Mi go luku en èn den Kotoigi drape yepi mi fu feni wroko nanga wan presi fu tan. Na ini a srefi yari dati, mi dopu leki wan Yehovah Kotoigi.
Now mi e firi krosibei fu Gado trutru
A hati yu taki yu teki sowan bosroiti?
Kwetikweti! Now mi e firi krosibei fu Gado trutru fu di den sani di mi sabi fu en komoto fu Bijbel. A no filosofia noso kerkigwenti leri mi den. Èn mi kan gi tra sma leri nanga wan krin ati èn sondro fu tweifri.
a Bijbel e gi krin piki tapu den aksi disi nanga furu tra aksi di sma abi. Go na SAN BIJBEL E LERI > PIKI TAPU AKSI FU BIJBEL.