Wan pen di hebi srefisrefi

„Mi nanga Sophiaa ben trow moro leki 39 yari, di a kisi wan seryusu siki èn dede baka dati. Mi ben kisi furu yepi fu den mati fu mi èn mi ben e du sani fu hori misrefi bezig. Ma na wan heri yari langa mi ben e firi a pen ete ini mi ati. Son leisi a ben hebi gi mi fu hori misrefi. Now na dri yari kaba di a dede, ma toch mi abi son momenti pe mi e bigin sari wantronso.”​—Kostas.

Yu lasi wan lobiwan na ini dede? Efu dati de so, dan kande yu e firi leki Kostas. Nowan sani hati èn e gi so furu stres leki te yu lasi yu trowpatna, wan famiri, noso wan mati na ini dede. Ondrosukuman kon si dati tu. A tijdschrift The American Journal of Psychiatry taki dati „te wan sma dede dan dati na wan fu den moro hati sani di kan miti den famiri nanga mati fu en. Furu sma e firi leki den lasi a sma fu ala ten. Den e firi wan hebi pen ini den ati.” Den sma di e firi a pen disi e aksi densrefi: ’O langa mi o tan firi so? Oiti mi o de koloku baka? Pe mi kan feni trowstu?’

Na Ontwaakt! disi e piki den aksi disi. Na artikel di e kon now e sori san yu kan du efu wan lobiwan fu yu dede no so langa pasa. Den trawan e sori sortu sani yu kan du fu no sari tumusi.

Wi howpu taki a tijdschrift disi trowstu èn yepi ibri sma di de na ini bigi sari.