LES 4
Leri fu tyari frantwortu
SAN A WANI TAKI?
Sma di man tyari frantwortu na sma di yu kan frutrow. Den e sorgu taki den du den wroko bun, èn den e kaba biten tu.
Awinsi wan pikin yongu ete toch a kan leri kaba fu tyari frantwortu. A buku Parenting Without Borders, e taki: „Te wan pikin abi 15 mun a kan bigin du kaba san en papa naga mama e taigi en. Èn te a abi wan nanga afu yari, dan a e wani du tu san a e si den e du. Na ini furu kulturu, te a pikin abi 5 te go miti 7 yari, papa nanga mama e bigin leri en kaba fa fu du son osowroko. Aladi den yongu ete toch den man du son wroko bun.”
FU SAN EDE A PRENSPARI?
Na son presi furu sma di e go seti den eigi libi, e drai go baka na den papa nanga mama fu di a libi muilek gi den. Son leisi dati e pasa fu di noiti den leri fa fu gebroiki moni, fa fu drai wan oso èn fa fu tyari den frantwortu ini a libi.
Dati meki a bun fu leri yu pikin frukufruku kaba fa fu tyari frantwortu fosi den kon bigi. A buku How to Raise an Adult, e taki: „Yu no kan kweki yu pikin taki den no man du noti gi densrefi, dan te den abi 18 yari dan yu e lusu den fu go seti den eigi libi.”
FA FU LERI YU PIKIN FU TYARI FRANTWORTU
Gi a pikin osowroko fu du.
BIJBELTEKST: „Ala tranga wroko e tyari wini kon.”—Odo 14:23.
Pikin-nengre lobi fu yepi den papa nanga mama awinsi san den e du. Gebroiki den moi okasi disi fu meki den yepi yu nanga osowroko.
Son papa nanga mama no e wani du a sani disi, fu di den feni taki den pikin abi furu skorowroko fu du. Dati meki den no e wani gi den tra wroko fu du.
Ma toch a de so taki pikin di e du osowroko e moro leri na skoro. Te den bigin du wan sani den e leri fu kaba en. Boiti dati, a buku Parenting Without Borders e taki: „Efu wi no e meki den pikin fu wi du wroko yonguyongu kaba, dan den kan bigin denki taki a yepi fu den no de fanowdu. Den o bigin denki tu taki na sma musu du ala sani gi den.”
A srefi buku e taki: „Te pikin e kisi wroko fu du, dan na so den e leri fa fu yepi tra sma èn fu no denki densrefi nomo. Osowroko e yepi pikin fu frustan taki den na wan prenspari pisi fu na osofamiri èn taki den musu tyari den frantwortu di den kisi.
Yepi yu pikin fu si taki den musu tyari den bakapisi fu den fowtu fu den.
BIJBELTEKST: „Arki rai èn teki piri-ai, so taki yu kan tron wan koni sma bakaten.”—Odo 19:20.
Efu yu pikin du wan sani di no bun, fu eksempre efu a broko wan sma sani, dan no suku fu kibri a tori. Awansi a no du en fu espresi, a man tyari a frantwortu fu san a du. Meki ensrefi aksi pardon noso efu a kan meki a gi a sani baka di a broko.
Te pikin e leri fu tyari den frantwortu fu fowtu di den meki, dan disi o yepi den fu
de eerlijk èn fu erken den fowtu
no skoifi a fowtu go tapu tra sma
no lei
aksi pardon