Abraham—Wan mati fu Gado

WÁN fu den presi pe den sma ben go libi baka a Frudu, ben nen Ur. Ur ben tron wan prenspari foto nanga moi oso. Ma den sma drape ben e anbegi falsi gado. Na so den ben du tu na Babel. Den sma na Ur nanga Babel no ben de leki Noa nanga en manpikin Sem, di ben tan dini Yehovah.

Te fu kaba, 350 yari baka a frudu, a getrow Noa ben dede. A ben de tu yari na baka, taki a man di yu e si na tapu a prenki disi, en mama ben meki en. A ben de wan aparti man gi Gado. En nen ben de Abraham. A ben libi nanga en osofamiri na a foto Ur dati.

Wan dei Yehovah ben taigi Abraham: ’Gowe libi Ur nanga yu famiri èn go na wan kondre, di mi sa sori yu.’ Abraham ben gi yesi na Gado, èn gowe libi a switi libi na Ur? Iya, èn fu di ala ten a ben gi yesi na Gado, meki sma ben kon sabi en leki a mati fu Gado.

Di Abraham ben gowe libi Ur, dan wan tu fu en famiri ben go nanga en: en papa Tera, en brada pikin Lot èn a no de fu taki en wefi Sara tu. Baka wan pisi ten den alamala ben doro na wan presi di ben nen Haran, pe Tera kon dede. Den ben de bun fara kaba fu Ur.

Baka wan pisi ten, dan Abraham nanga en osofamiri ben gowe libi Haran, èn den ben kon na a kondre Kanan. Drape Yehovah ben taki: ’Disi na a kondre di mi sa gi na den pikin fu yu.’ Abraham ben tan na Kanan, èn a ben libi na ini tenti.

Gado ben bigin yepi Abraham, so taki a ben kon abi bigi ipi skapu nanga tra meti èn hondrohondro futuboi. Ma en nanga Sara no ben abi nowan pikin fu densrefi.

Di Abraham ben de 99 yari, Yehovah ben taki: ’Mi e pramisi yu taki yu sa tron a papa fu furu nâsi.’ Ma fa disi ben sa kan pasa, now di Abraham nanga Sara ben de tumusi owru fu kisi wan pikin?