David e tron kownu

SAUL e pruberi agen fu kisi David. Nanga 3000 fu en moro bun srudati a e go suku David. Te David yere fu disi, dan a e seni spion go fu kon sabi pe Saul nanga en man opo den kampu a neti dati. Dan David e aksi tu fu den man fu en: ’Suma fu unu wani go nanga mi na a kampu fu Saul?’

’Mi’, Abisai e piki. Abisai na a manpikin fu David sisa, Seruya. Aladi Saul nanga en man e sribi, dan David nanga Abisai e kroipi safri go na a kampu. Den e teki a lansri nanga a watrakan fu Saul di ben de leti na Saul edesei. Nowan sma e si, noso e yere den, bika den alamala e sribi dipi.

Luku san David nanga Abisai e du now! Den e kroipi gowe baka èn e tanapu sondro kefar na tapu wan ede fu wan pikin bergi. David e bari taigi a legre edeman fu Israel: ’Abner, fu san ede yu no e luku yu masra, a kownu, bun? Pe en lansri nanga en watrakan de?’

Saul e wiki. A e kon sabi a sten fu David èn a e aksi: ’Na yu, David?’ Yu e si Saul nanga Abner drape na ondrosei?

David e piki: ’Iya, mi masra kownu!’ Èn David e aksi: ’Fu san ede yu e pruberi fu kisi mi? Sortu ogri mi du? Dyaso yu lansri de, o kownu. Meki wan fu den man fu yu kon teki en.’

’Mi sondu’, Saul e piki. ’Mi handri na wan law fasi.’ Baka disi, dan David e gowe èn Saul e drai go na en oso. Ma David e taki na ensrefi: ’Saul o kiri mi wan fu den dei ete. Mi musu lowe go na a kondre fu den Filistiasma.’ Èn na dati a e du tu. David man fu kori den Filistiasma, so taki den e bribi taki a de na den sei.

Baka wan pisi ten den Filistiasma e hari go feti nanga Israel. Na a feti dati den e kiri Saul nanga Yonatan. Disi e meki David sari tumusi. A e skrifi wan tumusi moi singi, pe a e singi na ini: ’Mi e sari fu yu, mi brada Yonatan. Fa mi ben lobi yu so te!’

Baka disi David e drai go na Israel na a foto Hebron. Wan feti e broko na mindri den man di e teki Saul manpikin Isboset fu de kownu, nanga den man di wani David fu de kownu. Ma te fu kaba den man fu David e wini. David abi 30 yari te a e tron kownu. Seibi nanga afu yari a e tiri na Hebron. Wan tu fu en manpikin di e gebore drape, na Amnon, Absalom, nanga Adonia.

A ten e doro taki David nanga den man fu en e hari go fu wini a moi foto di nen Yerusalem. Yoab, wan tra manpikin fu David sisa Seruya, e teki fesi na ini a feti. Fu dati ede David e pai Yoab, fu di a e meki a tron edeman fu en legre. Now David e bigin tiri na a foto Yerusalem.