Yona nanga a bigi fisi

LUKU a man na ini a watra. A de na ini bigi problema, a no so? A fisi dati de fu swari en! Yu sabi suma na a man disi? A nen Yona. Meki wi go luku fa a ben du kon na ini so wan problema.

Yona na wan profeiti fu Yehovah. A no langa baka a dede fu a profeiti Elisa, taki Yehovah e taigi Yona: ’Go na a bigi foto Ninefei. Na ogridu fu den sma drape de tumusi bigi èn mi wani fu yu taki nanga den fu dati.’

Ma Yona no wani go. Fu dati ede a e teki wan boto di e go na a tra sei fu a pasi di e go na Ninefei. A no ben de wan switi sani gi Yehovah taki Yona e lowe gowe. Fu dati ede a e meki wan bigi winti kon, di de so tranga, taki a boto pikinmoro de fu sungu. Den matrosi e frede srefisrefi èn den e bari kari den gado fu den fu yepi den.

Te fu kaba Yona e fruteri den: ’Mi e anbegi Yehovah, a Gado di meki hemel nanga grontapu. Mi e lowe fu no du san Yehovah ben taigi mi fu du.’ Dan den matrosi e aksi: ’San wi musu du nanga yu fu meki a bigi winti tapu.’

’Iti mi go na ini a se, dan a se sa kon tiri baka’, Yona e taki. Den matrosi no wani du dati, ma te a winti e kon moro ogri, dan te fu kaba den e iti Yona go na ini a se. Wantewante a bigi winti e tapu èn a se e kon tiri baka.

Te Yona e saka gowe na ini a watra, dan a bigi fisi e swari en. Ma Yona no e dede. Dri dei nanga dri neti a de na ini a bere fu a fisi dati. Yona e sari tumusi taki a no ben gi yesi na Yehovah èn no ben go na Ninefei. Yu sabi san a e du now?

A e begi Yehovah fu yepi en. Dan Yehovah e meki a bigi fisi pio Yona na tapu a drei gron. Baka dati, dan Yona e go na Ninefei. A tori disi no e leri wi o prensari a de fu du ala san Yehovah e taki?