Fo boi na ini Babilon

KOWNU Nebukadnesar e teki den Israelsma, di kisi moro bun leri, tyari go na Babilon. Bakaten a kownu e teki na den mindri den moro moi èn koni yonkuman. Fo fu den na den boi di yu e si dya. Wan fu den na Danièl èn den dri trawan den Babilonsma e kari Sadrak, Meisak nanga Abedneikow.

Nebukadnesar wani fu den yonkuman kisi leri, so taki den kan kon wroko na ini en palèisi. Baka dri yari te den kisi leri kaba, dan a wani teki soso den moro koniwan fu yepi en lusu problema. A kownu wani fu den boi de tranga èn gosontu aladi den e kisi leri. Fu dati ede a e taigi en futuboi fu gi ala den boi a srefi bun nyanyan nanga win di en nanga en famiri e kisi.

Luku a yongu Danièl pikinso. Yu sabi san a e taigi Aspenas, na edeman fu den futuboi fu Nebukadnesar? Danièl e taigi en taki a no wani nyan a bun nyanyan fu kownu tafra. Ma Aspenas e broko en ede. A e taki: ’A kownu ben poti san un musu nyan èn dringi. Efu unu no luku gosontu a srefi leki den tra yonkuman, dan a sa kiri mi kande.’

Fu dati ede Danièl e go na a waktiman di Aspenas poti fu luku en nanga den dri mati fu en. ’Grantangi, pruberi wi tin dei luku’, Danièl e taki. ’Gi unu soso gruntu fu nyan nanga watra fu dringi. Dan teki unu gersi nanga den tra yonkuman di e nyan a nyanyan fu a kownu èn luku suma e luku moro bun.’

A waktiman e agri nanga disi. Te den tin dei pasa, dan Danièl nanga en dri mati e luku moro gosontu leki ala den tra yonkuman. Fu dati ede a waktiman e meki den go doro fu nyan gruntu na presi fu a nyanyan fu a kownu.

Na a kaba fu den dri yari den e tyari ala den yonkuman go na Nebukadnesar. Baka di a kownu taki nanga den alamala, dan a e feni taki Danièl nanga en dri mati na den moro koniwan. Dati meki a e hori den fu yepi en na ini en palèisi. Èn ala tron te a kownu e kon nanga muilek aksi nanga problema na Danièl, Sadrak, Meisak, nanga Abedneikow, dan den sabi tin tron moro furu leki den priester nanga den koniman fu a kownu.