Na ini wan kamra na sodro

A DE fodewroko neti now, tu dei na baka. Yesus nanga en 12 apostel kon na a bigi kamra disi di de na sodro, fu nyan a Paska nyanyan. A man di yu e si e waka gowe na Yudas Iskariot. A e go taigi den priester fa den kan kisi Yesus.

A dei na fesi, Yudas ben go na den èn a ben aksi den: ’San unu sa gi mi efu mi yepi unu kisi Yesus?’ Den ben taki: ’Dritenti solfru moni.’ Dati meki Yudas e gowe now fu miti den man disi, so taki a kan tyari den go na Yesus. Dati na wan ogri sani, a no so?

Den kaba fu nyan a Paska nyanyan. Ma Yesus e bigin now nanga wan spesrutu nyanyan. A e langa wan brede gi en apostel èn a e taki: ’Un nyan, bika disi wani taki mi skin, di sa gi fu unu ede.’ Dan a e langa wan kan nanga win gi den èn a e taki: ’Un dringi, bika disi wani taki mi brudu, di sa lon fu unu ede.’ Bijbel e kari disi na ’Avondmaal fu Masra’, noso a ’Neti-nyanyan fu Masra’.

Den Israelsma ben nyan a Paska fu memre den taki na engel fu Gado ’ben abra’ den oso fu den na Egepte, ma ben kiri den fosi gebore pikin na den oso fu den Egeptesma. Ma now Yesus wani fu en bakaman memre en èn fa a ben gi en libi fu den ede. Dati meki a e taigi den fu nyan a spesrutu nyanyan disi ibri yari.

Baka te den nyan na Avondmaal fu Masra, dan Yesus e taigi en apostel fu de nanga deki-ati èn fu de tranga na ini bribi. Te fu kaba den e singi wan tu singi gi Gado èn dan den e gowe. A de bun lati kaba, kande pasa mindrineti. Meki wi go luku pe den e go.