Kapitel 2
A ben kisi grani bifo a ben gebore
BAKA DI na engel Gabrièl froeteri a jongoe oema Maria taki a sa kisi wan manpikin di sa tron wan kownoe di sa tiri foe têgo, Maria e aksi: „Fa disi sa pasa, foe di mi no e libi nanga wan man?”
„Santa jeje sa kon na joe tapoe”, Gabrièl e tjari kon na krin, „èn krakti foe a Moro Heiwan sa tapoe joe. Foe dati ede, meki san o gebore, den sa kari santa, a Manpikin foe Gado.”
Foe jepi Maria bribi a boskopoe foe en, meki Gabrièl e go moro fara: „Èn, loekoe! Elisabet, a famiri foe joe, en so srefi kisi bere foe wan manpikin, ini en owroe dei, èn disi na a di foe siksi moen gi en, na oema di sma ben taki dati a no man kisi pikin; bika na Gado no wan froeklari sa de wan sani di no kan.”
Maria e bribi den wortoe foe Gabrièl. Èn san a e piki? „Loekoe! Jehovah en oema-srafoe!”, a e bari taki. „Meki a pasa nanga mi, soleki fa joe ben froeklari.”
Sjatoe baka di Gabrièl gowe, Maria e sreka sani foe teki waka go loekoe Elisabet, di e libi nanga en masra Sakarias na ini a bergi kontren foe Judea. Foe Maria en oso na Nasaret go te drape, na wan langa waka foe kande dri noso fo dei.
Te Maria e doro na oso foe Sakarias te foe kaba, a e go na inisei èn a e gi odi. Ne Elisabet e kon foeroe nanga santa jeje, èn a e taigi Maria: „Blesi foe joe na mindri den oema, èn blesi foe a froktoe foe joe bere! We fa a doe kon taki mi kisi a grani disi, taki a mama foe mi Masra e kon na mi? Bika, loekoe! a momenti di mi jere na odi foe joe ini mi jesi, a pikin na ini mi bere djompo opo foe bigi prisiri ede.”
Te Maria e jere disi, a e piki nanga wan dipi firi foe tangi: „Mi sili e meki Jehovah bigi, èn mi jeje abi prisiri pasa marki ini Gado, mi Froeloesoeman; bika a loekoe a lagi posisi foe en oema-srafoe. Bika, loekoe! bigin nanga a dei foe tide, ala geslakti sa prèise mi kolokoe; bika a Maktiwan doe bigi sani gi mi.” Ala di Maria kisi a grani disi, tokoe a e gi ala grani na Gado. „En nen santa”, a e taki, „èn geslakti baka geslakti a sari-ati foe en de na tapoe den wan di frede en.”
Maria e go doro foe prèise Gado nanga wan profeiti singi di a e singi na ondro a krakti foe a santa jeje. A e taki: „A doe makti sani nanga en anoe, a panja den sma di abi heimemre lostoe na ini den ati. A poeroe maktiman foe den kownoestoeroe èn a meki den lagiwan kon hei; nanga boen sani a foeroe troetroe a bere foe den wan di ben de nanga angri, èn den sma di ben abi goedoe, a seni den gowe nanga leigi anoe. A kon foe jepi en foetoeboi Israèl, foe meki a tjari sari-ati kon na ini en prakseri baka, soleki fa a ben froeteri den fositen tata foe wi, na Abraham èn na a siri foe en, foe têgo.”
Maria e tan so wan dri moen nanga Elisabet, èn wi kan de seiker taki a de wan bigi jepi na ini den lasti wiki disi di Elisabet de nanga bere. A de troetroe wan moi sani taki den toe getrow oema disi, di ala toe e tjari wan pikin na ini den bere nanga jepi foe Gado, kan de makandra na ini a blesi ten disi foe a libi foe den!
Joe ben si fa Jesus ben kisi grani srefi bifo a ben gebore? Elisabet ben kari en „mi Masra”, èn a pikin foe en di no ben gebore ete, ben djompo opo foe prisiri ede di Maria ben kon na inisei. Ma na a tra sei, soleki fa wi sa si, baka ten sma no ben abi foeroe lespeki gi Maria nanga en pikin di ben moesoe gebore ete. Lukas 1:26-56.
▪ San Gabrièl e taki foe jepi Maria foe froestan fa a ben sa kisi bere?
▪ Fa Jesus ben kisi grani bifo a ben gebore?
▪ San Maria e taki ini wan profeiti singi di a e singi foe prèise Gado?
▪ O langa Maria e tan nanga Elisabet, èn foe san ede a fiti taki Maria e tan nanga Elisabet na ini a ten disi?