Kapitel 68

Jesus e gi moro leri na a di foe seibi dei

A LASTI dei foe a Wiwirikampoe-fesa, a di foe seibi dei, no kaba ete. Jesus e gi sma leri na ini a pisi foe a tempel di den e kari „a goedoekamra”. Soleki fa a sori, dan disi de na a pisi di den e kari a fesisei-djari foe den oemasma, pe kisi de pe sma kan poti moni na ini.

Ala neti na a ten foe a fesa, den e leti wan spesroetoe faja na ini a pisi disi foe a tempel. Drape den poti fo boen bigi kandratiki, di ibriwan foe den abi fo bigi baki di foeroe nanga oli. A faja foe den lampoe disi, di e bron foe na oli di de na ini den tinasiksi baki, krakti nofo foe gi faja na wan bigi pisi foe a heri kontren na netiten. San Jesus e taki now, e memre den arkiman foe en kande na a spesroetoe faja disi. „Mi na a leti foe grontapoe”, Jesus e meki bekènti. „ A sma di e waka na mi baka, no sa waka na ini doengroe kwetikweti, ma a sa abi a leti foe a libi.”

Foe di den Fariseiman no e agri, meki den e taki: „Joe e gi kotoigi foe joesrefi; a kotoigi foe joe no troe.”

Jesus e piki: „ Awinsi mi e gi kotoigi foe misrefi, a kotoigi foe mi troe, bika mi sabi foe pe mi komoto èn pe mi e go. Ma oenoe no sabi foe pe mi komoto èn pe mi e go.” A e taki moro fara: „Mi na a sma di e gi kotoigi foe misrefi, èn a Tata, di ben seni mi kon, e gi kotoigi foe mi.”

„Pe joe Tata de?”, den Fariseiman wani sabi.

„Oenoe no sabi mi èn oenoe no sabi mi Tata toe”, Jesus e piki. „Efoe oenoe ben sabi mi, dan oenoe ben sa sabi mi Tata toe.” Ala di den Fariseiman wani ete foe den kisi Jesus foe go sroto en, tokoe no wan sma no e fasi en.

„Mi e gowe”, Jesus e taki agen. „Pe mi e go, oenoe no kan kon.”

Te den djoe jere disi, den e bigin aksi densrefi: „A no o kiri ensrefi, a no so? Foe di a e taki: ’Pe mi e go, oenoe no kan kon.’”

„Oenoe na foe den kondre na ondrosei”, Jesus e tjari kon na krin. „Mi na foe den kondre na tapoesei. Oenoe na foe a grontapoe disi; mi no de foe a grontapoe disi.” A e taki moro fara: „Efoe oenoe no e bribi taki mi na a sma, dan oenoe sa dede na ini oen sondoe.”

A no de foe taki, dati Jesus e sori go na a libi di a ben abi, fosi a ben tron wan libisma èn taki a de a pramisi Mesias, noso Krestes. Tokoe den e aksi, èn wi kan de seiker taki den e doe disi nanga tegoe: „Soema na joe?”

Foe di Jesus e froestan taki den e weigri foe erken en, a e piki: „Foe san ede mi e taki nanga oenoe srefi?” Tokoe a e taki moro fara: „En di ben seni mi kon, de troe, èn den srefi sani di mi ben jere foe en, na dati mi e taki na grontapoe.” Dan Jesus e taki moro fara: „Te oenoe opo a Manpikin go na tapoe kaba, dan oenoe sa sabi taki mi na a sma, èn taki mi no e doe no wan sani foe misrefi; ma soleki fa a Tata ben leri mi, na so mi e taki den sani disi. Èn a sma di ben seni mi kon, de nanga mi; a no ben libi mi foe mi tan mi wawan, bika alaten mi e doe den sani di e plisi en.”

Foeroe sma e poti bribi na ini Jesus, te a e taki den sani disi. A e taigi den sma disi: „Efoe oenoe e tan na ini mi wortoe, dan oenoe na troetroe disipel foe mi, èn oenoe sa sabi a waarheid, èn a waarheid sa meki oenoe kon fri.”

„Wi na bakapikin foe Abraham”, den gensman foe en e kon na mindri, „èn noiti wi ben de srafoe foe no wan sma. Fa joe kan taki dan: ’Oenoe sa kon fri’?”

Ala di den djoe nofo tron ben de na freimde makti ondro, tokoe den no e erken no wan enkri makti di e kwinsi den, leki basi. Den e weigri foe sma kari den srafoe. Ma Jesus e sori, taki den na srafoe troetroe. Na sortoe fasi? „Foe troe, foe troe, mi e taigi oenoe,” Jesus e taki, „ibriwan sma di e doe sondoe, na wan srafoe foe a sondoe.”

A weigri di den djoe e weigri foe erken taki den na srafoe foe sondoe, e poti den ini wan kefalek posisi. „A srafoe no e tan na ini na osofamiri foe têgo”, na so Jesus e tjari kon na krin. „A manpikin e tan foe têgo.” Foe di wan srafoe no abi den reti foe wan erfgenaam, dan a kan de ini kefar taki iniwan momenti den kan seni en gowe. Soso a manpikin di troetroe gebore na ini na osofamiri noso di den teki leki manpikin, e tan „foe têgo”, dati wani taki, so langa a e libi.

„Foe dati ede, efoe a Manpikin e meki oenoe kon fri,” na so Jesus e go moro fara, „dan oenoe sa fri troetroe.” So boen, a waarheid di e meki sma kon fri, na a waarheid di abi foe doe nanga a Manpikin, Jesus Krestes. Soso nanga jepi foe na ofrandi foe Jesus en volmaakti libisma libi, wan sma kan kon fri foe a sondoe di abi dede leki bakapisi. Johanes 8:12-36.

▪ Pe Jesus e gi leri na sma na a di foe seibi dei? San e pasa te neti drape, èn fa disi abi foe doe nanga a leri foe Jesus?

▪ Foe pe Jesus komoto, soleki fa a e taki, èn san disi moesoe tjari kon na krin ini a tori foe soema a de?

▪ Na sortoe fasi den djoe na srafoe, ma sortoe waarheid sa meki den kon fri?