Kapitel 69

A tori di ben abi foe doe nanga soema na a tata foe soema

A TAKIMAKANDRA di Jesus abi nanga den djoe fesiman na a fesa, e kon moro faja. „Mi sabi taki oenoe na bakapikin foe Abraham”, Jesus e erken, „ma oenoe e soekoe foe kiri mi, foe di oenoe no e teki a wortoe foe mi na ini oen ati. Mi e taki den sani di mi si na mi Tata; èn oenoe foe dati ede, e doe den sani di oenoe jere foe oen tata.”

Ala di Jesus no e taki soema na a tata foe den, a e tjari kon na krin taki den abi wan tra tata leki en. Sondro foe froestan soema Jesus abi na prakseri, den djoe fesiman e piki: „Wi tata na Abraham.” Den denki taki den abi a srefi bribi leki Abraham, di ben de Gado mati.

Ma Jesus e seki den nanga san a e piki: „Efoe oenoe na pikin foe Abraham, dan doe den wroko foe Abraham.” Foe troe, wan troe manpikin e waka na en papa baka. „Ma now oenoe e soekoe foe kiri mi,” Jesus e taki, „wan sma di taigi oenoe a waarheid di mi ben jere foe Gado. Abraham no ben doe disi.” Foe dati ede Jesus e taki baka: „Oenoe e doe den wroko foe oen tata.”

Tokoe den no e froestan ete foe soema Jesus e taki. Den e tan taki dati den na manpikin foe Abraham soleki fa a wet e sori, èn den e taki: „Wi no ben gebore foe hoeroedoe.” Den e taki dati den na troe anbegiman neleki Abraham, èn foe dati ede den e froeklari: „Wi abi wán Tata, Gado.”

Ma Gado na troetroe a Tata foe den? „Efoe Gado ben de oen Tata,” Jesus e piki, „dan oenoe ben sa lobi mi, bika na foe Gado mi ben komoto èn mi de dja. Èn mi no kon kwetikweti foe misrefi, ma En ben seni mi kon. Fa a doe kon taki oenoe no e froestan san mi e taki?”

Jesus proeberi kaba foe meki den relisi fesiman disi si sortoe bakapisi a abi te den e weigri foe erken en. Ma now a e taki krin: „Oenoe kon foe oen tata Didibri, èn oenoe wani doe den lostoe foe oen tata.” Sortoe tata na Didibri? Jesus ben meki sma kon sabi Didibri leki wan kiriman èn a ben taki so srefi: „En na wan leiman èn a tata foe lei.” Foe dati ede Jesus e kon na a bosroiti: „A sma di kon foe Gado, e arki den wortoe foe Gado. Foe di oenoe no kon foe Gado, dati meki oenoe no e arki.”

Foe di den djoe ati e bron nanga a kroetoe foe Jesus, meki den e piki: „Wi no e taki nanga reti: Joe na wan Samariasma èn joe abi wan ogri jeje na joe tapoe?” Den e gebroiki a wortoe „Samariasma” foe sori taki den djoe e wisiwasi den èn den djoe no e feni den boen, bika den Samariasma ben de sma di den djoe no ben wani si na ai.

Jesus no e poti prakseri na tapoe san den e taki foe broko en saka, dati en na wan Samariasma èn a e piki: „Mi no abi wan ogri jeje na mi tapoe, ma mi e gi grani na mi Tata, èn oenoe no e gi mi grani.” Te Jesus e taki go moro fara, dan a e taki foe a froewondroe pramisi: „Efoe wan sma e doe san mi taki, dan noiti a no sa si dede kwetikweti.” A no de foe taki, dati Jesus no wani taki, dati ala den sma di e waka na en baka noiti no sa si dede troetroe. Na presi foe dati, a wani taki, dati noiti den sa kisi têgo pori, noso „a di foe toe dede”, pe sma no kan kisi wan opobaka foe en.

Ma tokoe den djoe e teki den wortoe foe Jesus leki wan troetroe sani. Foe dati ede den e taki: „Now wi sabi troetroe taki joe abi wan ogri jeje na joe tapoe. Abraham dede èn so srefi den profeiti; ma joe e taki: ’Efoe wan sma e doe san mi taki, dan noiti a no sa tesi dede kwetikweti.’ Joe no bigi moro wi tata Abraham, di dede, a no so? So srefi den profeiti dede toe. Soema joe e taki joe de?”

Na ini a heri takimakandra disi, a e kon na krin taki Jesus e sori den man disi taki en na a pramisi Mesias. Ma na presi foe piki na aksi foe den langalanga so taki den kon sabi soema na en, Jesus e taki: „Efoe mi e gi glori na misrefi, dan a glori foe mi no de noti. Mi Tata foe soema oenoe e taki dati en na oen Gado, na en e gi mi glori; èn tokoe oenoe no ben sabi en. Ma mi sabi en. Èn efoe mi ben taki dati mi no sabi en, dan mi ben sa de wan leiman neleki oenoe.”

Ala di Jesus e taki go moro fara, a e taki baka foe a getrow Abraham. A e taki: „ Abraham, oen tata, ben prisiri srefisrefi foe a froewakti di a ben froewakti foe si a dei foe mi, èn a ben si en èn a ben prisiri.” Ija, nanga ai foe bribi Abraham ben e froewakti a kon foe a pramisi Mesias. Foe di den djoe no abi bribi, den e piki: „ Joe no abi feifitenti jari srefi, èn tokoe joe si Abraham?”

„Foe troe, foe troe, mi e taigi oenoe”, Jesus e piki, „bifo Abraham ben kon foe de, mi ben de kaba.” A no de foe taki, dati Jesus e sori go na a libi di a ben abi leki wan makti jeje sma na hemel, bifo a ben tron wan libisma.

Den djoe ati kon bron srefisrefi, foe di Jesus ben taki dati a ben kon foe de bifo Abraham, èn dati meki den e teki ston foe iti go na en tapoe. Ma a e go kibri èn a e gowe libi a tempel sondro foe den man doe en wan sani. Johanes 8:37-59; Openbaring 3:14; 21:8.

▪ Fa Jesus e sori taki a abi wan tra tata leki den feanti foe en?

▪ San a wani taki dati den djoe e kari Jesus wan Samariasma?

▪ San Jesus wani taki te a e taki dati den bakaman foe en noiti no sa si dede?