Kapitel 94
A de di a de fanowdoe foe begi èn foe abi sakafasi
DI JESUS ben de na Judea ete, a ben froeteri wan agersitori foe sori o prenspari a de foe horidoro na ini begi. Now, te a e teki en lasti waka foe go na Jerusalem, a e poti krakti baka na tapoe a de di a de fanowdoe foe no tapoe foe begi. Kande Jesus de na Samaria noso na Galilea ete te a e froeteri den disipel foe en na agersitori disi di e kon now:
„Na wan seiker foto wan seiker kroetoeman ben de, di no ben frede Gado èn a no ben abi lespeki gi libisma. Ma na a foto dati wan weduwe ben de, di ala leisi baka ben go na en èn ben taki: ’Sorgoe taki mi e kisi reti na ini a kroetoe afersi nanga mi feanti.’ We, wan heri pisi ten a [kroetoeman] no ben wani, ma bakaten a ben taki na ensrefi: ’Ala di mi no frede Gado noso no abi lespeki gi wan libisma, tokoe awansi fa a no fa, mi sa sorgoe taki a weduwe disi sa kisi reti, foe di ala leisi baka a e trobi mi, so taki a no sa tan kon èn sa naki mi na ini mi fesi te foe kaba.’”
Dan Jesus e sori san a tori foe en wani taki, te a e taki: „Jere san a kroetoeman ben taki, ala di a ben de onregtfardiki! Gado no sa meki den sma di a ben froekisi, èn di e bari kari en dei nanga neti, kisi reti dan, ala di a abi langa pasensi nanga den?”
Jesus no wani sori nanga dati, taki Jehovah Gado, na a wan noso tra fasi, de leki na onregtfardiki kroetoeman. Ma efoe srefi wan onregtfardiki kroetoeman sa doe wan sani na tapoe den tranga begi di sma e begi doronomo, dan sma no moesoe tweifri taki Gado, di de regtfardiki èn boen dorodoro, sa piki efoe en pipel no e tapoe foe begi. Foe dati ede Jesus e taki moro fara: „Mi e taigi oenoe: Heri esi [Gado] sa meki den kisi reti.”
Nofo tron a de so, taki den mofinawan nanga den pôtiwan no e kisi reti, ala di den maktiwan nanga den goedoewan nofo tron e feni boen. Ma Gado no sa sorgoe wawan taki den ogrisma e kisi a reti strafoe, ma a sa sorgoe toe, taki a e handri na wan regtfardikifasi nanga den foetoeboi foe en, foe di a e gi den têgo libi. Ma omeni sma e bribi tranga taki heri esi Gado sa meki libisma kisi reti?
Jesus e sori spesroetoe go na tapoe bribi na ini a krakti foe begi, èn a e aksi: „Te a Manpikin foe libisma doro, dan a sa feni bribi troetroe na grontapoe?” Ala di piki no e gi tapoe na aksi, tokoe a prakseri kan de, taki te Krestes doro na ini Kownoekondre makti, dan moro foeroe sma no ben sa abi a bribi disi.
Na mindri den sma di e arki Jesus, joe abi son sma di de seiker foe densrefi ini a tori foe a bribi foe den. Den abi a froetrow taki den de regtfardiki, èn den e si tra sma leki lagi sma. Kande wan toe foe Jesus en disipel srefi de na ini a groepoe toe. Foe dati ede Jesus e froeteri den sortoe sma disi, na agersitori di e kon now:
„Toe sma ben go na a tempel foe begi; a wan ben de wan Fariseiman èn a trawan ben de wan belastingman. A Fariseiman ben tanapoe èn a ben bigin begi na ensrefi na a fasi disi: ’O Gado, mi e taki joe tangi taki mi no de leki den tra sma: bidrigiman, onregtfardikisma, soetaman, noso srefi soleki a belastingman disi. Mi e faste toe tron wan wiki, mi e gi a di foe tin pisi foe ala sani san mi e kisi.’”
Sma sabi taki den Fariseiman e sori regtfardikifasi na poebliki foe kan meki tra sma e froewondroe. Moende nanga fodewroko na den dei di densrefi ben poti foe faste, èn den e pai finifini a di foe tin pisi foe srefi den pikin wiwiri di e gro na pranigron. Wan toe moen na fesi, na a ten foe a Wiwirikampoe-fesa, a ben kon na krin taki den e si a gewoon pipel leki lagi sma, di den ben taki: „Na ipi sma disi, di no sabi a Wet [dati wani taki, a fasi fa den Fariseiman e tjari a Wet kon na krin], den de froefroektoe sma.”
Te Jesus e go doro nanga en agersitori, dan a e taki foe so wan „froefroektoe” sma: „Ma a belastingman di ben e tanapoe fara, no ben wani opo en ai srefi go na hemel, ma a ben naki doronomo na tapoe en borsoe èn a ben taki: ’O Gado, sori mi boen-ati, mi, di de wan sondari.’” Foe di a belastingman erken den swakifasi foe en na wan sakafasi, meki Jesus e taki: „Mi e taigi oenoe: a man disi di ben go na en oso, ben sori foe de moro regtfardiki leki a tra man; bika ibriwan sma di e hei ensrefi, den sa saka en, ma a sma di e saka ensrefi, den sa hei en.”
Na so fasi, Jesus e poti krakti agen na tapoe, taki a de fanowdoe foe abi sakafasi. Foe di den disipel foe Jesus gro na ini wan libimakandra pe den Fariseiman, di e si densrefi leki regtfardiki sma, abi so wan makti èn pe alaten den e poti krakti na tapoe wan hei posisi noso wan bigi nen, meki a no de foe froewondroe taki a abi krakti srefi na tapoe den disipel foe Jesus. Ma Jesus e leri den troetroe wan moi sani ini a tori foe sakafasi! Lukas 18:1-14; Johanes 7:49.
▪ Foe san ede na onregtfardiki kroetoeman e doe san a weduwe aksi en, èn sortoe sani wi kan leri foe na agersitori foe Jesus?
▪ Na sortoe bribi Jesus sa loekoe te a doro?
▪ Gi soema Jesus e froeteri en agersitori foe a Fariseiman nanga a belastingman?
▪ Gi sortoe fasi foe den Fariseiman wi moesoe wai pasi?