Oproeroe na ini a jejekondre

Ala den jejesma di Jehovah ben meki ben boen. Dan wan engel ben kon ogri. Na en na Satan Didibri. Satan ben wani foe sma na grontapoe anbegi en na presi foe Jehovah. Disi na san ben pasa:

Na ini a djari foe Eden, foeroe bon ben de, di ben abi switi froktoe. Jehovah ben taigi Adam nanga en wefi, Eva, taki den ben mag njan fri foe den. Ma wán bon ben de di Gado ben taki, dati den no ben moesoe njan foe en. A ben taki, dati efoe den ben sa njan foe en, den ben sa dede nomonomo. — Genesis 2:9, 16, 17.

Wan dei di Eva ben de en wawan, wan sneki ben kon taki nanga en. A no de foe taki, dati a no ben de troetroe a sneki di ben e taki; a ben de Satan Didibri di ben meki a gersi leki na a sneki ben e taki. Satan ben taigi Eva taki efoe a ben njan foe a froktoe di a no ben mag njan, a ben sa koni leki Gado. A ben taki toe, dati Eva no ben sa dede. Den toe sani disi, di a ben taki, ben de lei. Tokoe Eva ben bribi Satan èn ben njan a froktoe. Baka ten, a ben gi Adam wan pisi èn Adam ben njan toe. — Genesis 3:1-6.

Wi e leri foe a troe tori disi taki Satan na wan oproeroeman nanga wan leiman. A ben taigi Eva taki, efoe a ben trangajesi Gado, a no ben sa dede. Dati ben de wan lei. Eva ben dede troetroe èn so srefi Adam toe. Satan no ben dede na a ten dati, ala di a o dede te foe kaba, bika a ben sondoe. Ma, disi ten, a de a libi ete èn a e go doro foe kori libisma. A de te now ete wan leiman, èn a e proeberi foe kisi sma so fara foe pasa den wet foe Gado. — Johanes 8:44.

Tra engel di meki oproeroe

Baka ten, tra engel ben kon ogri toe. Den engel disi ben si den moi oema na grontapoe èn ben wani foe abi seks nanga den. Foe dati ede den ben kon na grontapoe èn ben teki libisma skin foe wan mansma. Ne den ben teki den oemasma gi densrefi. Disi ben de kontrari a prakseri foe Gado. — Genesis 6:1, 2; Judas 6.

A ben tjari foeroe problema kon toe gi libisma. Den wefi foe den engel disi ben meki pikin, ma den no ben de normaal pikin. Den ben gro kon tron langa man di nanga tranga ben doe ogri-ati sani. Te foe kaba grontapoe ben kon so foeroe nanga ogri di e doe nanga tranga, taki Jehovah ben bosroiti foe pori den ogri sma nanga jepi foe wan bigi froedoe. Den wan enkri libisma di ben pasa a froedoe libilibi ben de a regtfardiki man Noa nanga en osofamiri. — Genesis 6:4, 11; 7:23.

Ma den ogri engel ben drai go baka na a jejekondre; den no ben dede. Ma den ben kisi strafoe. Den no ben kisi pasi foe go baka na a osofamiri foe Gado foe regtfardiki engel. Boiti foe dati, Jehovah no ben gi den pasi moro foe teki libisma skin. Èn te foe kaba den sa dede ini a bigi kroetoe. — 2 Petrus 2:4; Judas 6.

Den iti Satan komoto na hemel

Ini a bigin foe a jarihondro foe wi, wan feti ben de na hemel. A bijbel boekoe Openbaring e froeteri san ben pasa: „Èn feti ben kon na hemel: Mikaèl [a Jesus Krestes di ben opo baka na dede] nanga en [boen] engel ben feti nanga a draak [Satan], èn a draak nanga en [takroe] engel ben feti, ma a no ben wini èn presi no ben de foe feni moro gi den na hemel. Foe dati ede den ben fringi a bigi draak go na ondro, na fosi sneki, na wan di den e kari Didibri nanga Satan, di e kori a heri grontapoe pe sma e libi; na en den ben fringi go na grontapoe, èn den [ogri] engel foe en den ben fringi go nanga en.”

San ben de a bakapisi? A tori e go moro fara: „Oen prisiri foe disi, oen hemel nanga oenoe di e libi drape!” Den boen engel ben kan prisiri, bika Satan nanga den ogri engel, noso jeje, no ben de moro na hemel. Ma fa a de nanga den sma na grontapoe? Bijbel e taki: „Heloe foe grontapoe nanga se, bika Didibri saka kon na oenoe, a abi bigi atibron, foe di a sabi taki a abi wan sjatoe pisi ten nomo.” — Openbaring 12:7-9, 12.

Ija, Satan nanga en ogri kompe e kori sma èn e meki bigi heloe kon gi den sma na grontapoe. Den ogri engel disi den e kari ogri jeje. Den na feanti foe Gado. Den alamala ogri.