Den ogri jeje e gi deki-ati foe meki oproeroe nanga Gado

Ma foe san ede Satan nanga den ogri jeje foe en e wroko so tranga foe kori sma? Foe di den wani foe wi teki a sei foe den na ini a oproeroe foe den. Den wani foe wi anbegi den. Den wani foe wi bribi den lei foe den èn foe doe sani di Jehovah no lobi. Foeroe foe den sani disi na gwenti di abi foe doe nanga den dedewan.

A dede foe wan lobiwan na wan ondrofeni di e hati wi èn di wi e firi. Foe dati ede a de wan normaal èn joisti sani foe sori taki wi e sari. Baka di en mati Lasarus dede, dan Jesus „ben bigin krei”. — Johanes 11:35.

Foeroe gwenti de di abi foe doe nanga dede, èn ini heri grontapoe den kenki foeroe foe makandra. Foeroe foe den gwenti disi no de kontrari bijbel gronprakseri. Ma son gwenti abi den fondamenti na tapoe a prakseri taki den dedewan de a libi èn man foe si den libiwan. Hori wakti na dedesma, sari pasa marki nanga foeroe spesroetoe sani di moesoe doe foe beri wan sma, alamala abi den roetoe ini a frede foe no meki den jeje foe den dedewan atibron. Ma foe di den dedewan „no sabi notinoti”, meki den sma di e doe den sortoe sani disi e meki a lei foe Satan go a fesi. — Preikiman 9:5.

Tra gwenti noso spesroetoe sani di moesoe doe e kon foe na bribi taki den dedewan abi jepi fanowdoe foe den libiwan èn sa doe den libiwan ogri, efoe den no doe san den wani. Na son kondre, 40 dei noso wan jari baka te wan sma dede, den sma e hori fesa èn e tjari ofrandi. Sma e denki taki disi sa jepi na dedewan foe ’abra go’ na a jejekondre. Wan tra gwenti di de foeroe na foe gi njanjan nanga dringi na den dedewan.

Den sani disi fowtoe, bikasi den e meki den lei foe Satan di e go foe den dedewan go a fesi. Jehovah e feni en boen taki wi abi wan sani foe doe nanga gwenti di abi den fondamenti na tapoe den leri foe ogri jeje? Kwetikweti! — 2 Korentesma 6:14-18.

Foetoeboi foe a troe Gado no abi no wan prati ini gwenti di e hori baka gi den lei foe Satan. Na presi foe dati, na wan lobi fasi den e gi ten nanga moeiti foe jepi èn trowstoe den libiwan. Den sabi taki efoe wan sma dede kaba, soso Jehovah kan jepi a sma dati. — Job 14:14, 15.

Gado e kroetoe afkodrei

Son sma abi foe doe langalanga nanga den ogri jeje noso nanga jepi foe wan libisma di de leki wan asi foe den jeje. Disi den e kari afkodrei. Fodoe, bonoe, obia, loekoemanwroko, èn na aksi di sma e aksi sani na den dedewan na alamala fasi foe afkodrei.

Bijbel e kroetoe den sani disi te a e taki: „Na oen mindri no wan sma moesoe de . . . di e doe loekoemanwroko, no wan sma di e wroko nanga obia, noso wan sma di e loekoe foe marki foe san o kon, noso wan towfroeman, noso wan sma di e tai tra sma nanga wisi, noso wan sma di e soekoe rai na wan sma di de leki wan asi foe den jeje, noso wan sma di abi a wroko foe taki sani a fesi, noso wan sma di e aksi den dedewan foe kon sabi sani. Bika ibriwan sma di e doe den sani disi na wan tegoe sani gi Jehovah.” — Deuteronomium 18:10-12.

Foe san ede Jehovah e gi wi so wan tranga warskow foe den sani disi?

Jehovah e warskow wi gi ala fasi foe afkodrei foe wi eigi boen ede. A lobi sma èn a e sorgoe gi den. A sabi taki den sma di abi foe doe nanga ogri jeje seiker sa njan pina foe dati.

Nilda, di ben de leki wan asi foe den jeje, ben de wan foe den sma disi na Brasjonkondre. Den ogri jeje ben pori en libi. A ben froeteri: „Den jeje ben kon na mi tapoe, èn ben tan komanderi mi nomo. Mi ben de a wan tron nanga mi krin froestan èn a tra tron mi no ben sabi noti foe misrefi èn mi ben kon didon na ini wan ati-oso foe senwe problema ede. Den ogri jeje ben froefolgoe mi so te, taki disi ben trobi mi senwe. Mi ben dringi dresi foe saka a senwe èn mi ben bigin dringi sopi èn smoko doronomo. Jari langa disi ben go so doro.”

Baka wan pisi ten, nanga jepi foe Jehovah nanga en Kotoigi na grontapoe, Nilda ben fri ensrefi foe a krakti foe ogri jeje èn now a e libi wan gesontoe libi di foeroe nanga boen sani. A e taki: „Mi e gi deki-ati na ala sma foe den no boemoei noiti, ija no wan momenti, nanga den [ogri] jeje.”