Kapitel Wan
A Buku Danièl Nanga Yu
1, 2. (a) San na wan tu fu den situwâsi di no e pasa ibri dei èn di skrifi na ini a Bijbel buku Danièl? (b) Sortu aksi e kon na ini a ten fu wi, di abi fu du nanga a buku Danièl?
WAN makti kownu e tapu skreki gi den koniman fu en taki a o kiri den fu di den no man puru èn fruklari a dangra dren fu en. Den e trowe dri yonkuman di e weigri fu anbegi wan kefalek bigi popki, go na ini wan bun faya onfu, ma toku den e tan na libi. Na a momenti di wan fesa e hori, dan hondrohondro sma e si wan anu di e skrifi dangra wortu na tapu a skotu fu wan paleisi. Ogri-ati man di meki wan komplot, meki den trowe wan owru man go na ini wan lew-olo, ma a e komoto na ini sondro taki wan sani pasa nanga en. Wan profeiti fu Gado e si fo meti na ini wan fisyun, èn san den meti disi wani taki e go dusundusun yari doro te na ini a ten di e kon.
2 Disi na wan tu fu den tori nomo di de fu feni na ini a Bijbel buku Danièl. ¿Den warti fu poti seryusu prakseri na den? Sortu waarde a bun owru buku disi ben kan abi gi a ten fu wi? Fu san ede wi musu broko wi ede nanga sani di ben pasa so wan 2600 yari pasa?
DANIÈL—WAN BUKU FU OWRUTEN GI A TEN FU WI
3, 4. Fu san ede furu sma abi reide fu broko den ede nanga a tamara fu a libisma famiri?
3 Furu sani na ini a buku Danièl e poti prakseri na a tori fu grontapu tirimakti, wan tori di de tumusi prenspari na ini a ten disi. Pikinmoro ala sma sa agri taki wi e libi na ini muilek ten. Ibri dei wi e yere furu sari nyunsu di e memre wi taki a libisma libimakandra e saka gowe na ini tumusi dangra problema — èn disi e pasa ala di libisma man du so furu aparti sani tapu a kontren fu sabidensi nanga tèknologi.
4 Luku a tori disi: Libisma waka na tapu mun, ma na furu presi den no man waka na den strati na tapu den eigi planeiti sondro fu frede. Libisma kan seti wan oso nanga ala sortu nyunten sani di e meki a libi kon moro makriki, ma den no man tapu, taki moro nanga moro osofamiri e broko. Èn den man meki wan pisi ten kon na ini a libisma historia pe bodoi e gi nanga yepi fu nyunten komunikâsi yepisani, ma den no man leri sma fu libi nanga makandra na ini vrede. Hugh Thomas, wan profesor na ini historia ben skrifi wan leisi: „Sabi nanga skoroleri kon moro furu, ma dati no leri a libisma famiri furu tapu a kontren fu a dwengi di den musu dwengi densrefi, èn moro mendri fa den musu libi nanga tra sma.”
5. San furutron ben de a bakapisi fu a tirimakti fu libisma?
5 Libisma orga densrefi na ondro wan lo tirimakti fu pruberi meki pikinso orde de na ini a libimakandra. Ma no wan fu den no man taki dati den ben fri fu a tru tori di Kownu Salomo ben taki: „A wan libisma, tiri a tra libisma nanga ogri bakapisi gi en” (Preikiman 4:1; 8:9). A no de fu taki dati wan tu tiriman ben abi bun sani na prakseri fu du. Toku no wan kownu, presidenti noso diktator kan puru siki nanga dede. No wan libisma kan meki a grontapu fu wi kon tron a Paradijs baka, soleki fa Gado ben abi dati na prakseri.
6. Fu san ede Yehovah no abi a wrokomakandra fu libisma tirimakti fanowdu fu du En wani?
6 Toku a Kriaman wani du èn man du den sani disi. A no abi a primisi fanowdu fu libisma tirimakti fu du san a abi na prakseri, bika gi En „den nâsi de leki wan dropu di komoto na wan embre; èn leki a fini stòf na tapu a wegi den de” (Yesaya 40:15). Iya, Yehovah na a Soeverein Tiriman fu na universum. Dati meki, A abi makti di e pasa den libisma tirimakti krinkrin. A de Gado Kownukondre di sa kon na ini a presi fu ala libisma tirimakti fu a têgo blesi fu libisma. Kande na no wan tra presi a sani disi tyari moro bun kon na krin leki na ini a Bijbel buku Danièl.
DANIÈL—WAN MAN DI GADO LOBI SREFISREFI
7. Suma ben de Danièl, èn fa Yehovah ben e si en?
7 Yehovah Gado ben abi furu lobi gi Danièl di ben dini leki en profeiti furu yari langa. Iya, na engel fu Gado ben kari Danièl „wan sma di Gado lobi srefisrefi” (Danièl 9:23). A Hebrew wortu di ben de biginbigin èn di vertaal nanga „wan sma di Gado lobi srefisrefi” kan wani taki „san sma lobi srefisrefi”, „san wan sma e warderi srefisrefi” èn a kan wani taki srefi „wan lobiwan”. Danièl ben de trutru warti na ini na ai fu Gado.
8. Fa Danièl ben du kon na Babilon?
8 Meki wi go luku syatu den aparti situwâsi fu a profeiti disi di Gado ben lobi. Na ini 618 b.G.T. Kownu Nebukadnesar fu Babilon ben lontu Yerusalem nanga en legre (Danièl 1:1). Syatu baka dati, nanga tranga den ben tyari wan tu Dyu yonguwan di ben kisi bun skoro, go na ini katibo na Babilon. Danièl ben de na den mindri. Na a ten dati, kande a ben de ini en tini-yari.
9. Sortu leri Danièl nanga den Hebrew kompe fu en ben kisi?
9 Danièl nanga den kompe fu en Hananya, Misaèl nanga Asarya ben de na mindri den Hebrewsma di den ben teki fu kisi dri yari leri na ini „a skrifi nanga a tongo fu den Kaldewsma” (Danièl 1:3, 4). Son sabiman e taki dati a leri disi di den ben kisi, kande ben de moro leki a leri di den musu leri wan tongo nomo. Fu eksempre, Profesor C. F. Keil e taki: „Danièl nanga den kompe fu en ben musu kisi leri na ini a koni fu den Kaldew priester nanga den man di kisi hei leri, di ben gi na den skoro fu Babilon.” So bun, Danièl nanga den kompe fu en ben e kisi spesrutu leri fu wroko na lanti.
10, 11. Nanga sortu tyalensi Danièl nanga den kompe fu en ben kisi fu du èn sortu yepi Yehovah ben gi den?
10 ¡A situwâsi ben kenki srefisrefi gi Danièl nanga den kompe fu en! Na ini Yuda den ben libi na mindri den anbegiman fu Yehovah. Now sma ben de lontu den di ben e anbegi mangado nanga umagado di no ben de trutru. Toku den sani disi no ben tapu skreki gi den yonkuman disi, Danièl, Hananya, Misaèl nanga Asarya. Den ben abi a fasti bosroiti — ala di a situwâsi disi ben de wan tyalensi gi a bribi fu den — fu hori fasti na a tru anbegi.
11 Disi no ben sa makriki. Kownu Nebukadnesar ben de wan fayafaya anbegiman fu Marduk, a moro prenspari gado fu Babilon. Sontron wan anbegiman fu Yehovah no ben man du den sani kwetikweti di a kownu ben aksi en fu du. (Luku fu eksempre Danièl 3:1-7.) Toku Danièl nanga den kompe fu en ben kisi tiri fu Yehovah doronomo. Na ini den dri yari di den ben kisi leri, Gado ben blesi den nanga „sabi nanga inzicht na ini ala fasi fu skrifi nanga koni”. Boiti dati, Danièl ben kisi a koni fu man frustan san den fisyun nanga den dren ben wani taki. Baka ten, di a kownu ben ondrosuku den fo yonkuman disi, a ben kon si taki den ben de „tin tron moro bun leki ala den priester di e du towfruwroko nanga ala den lukuman di ben de na ini a heri kontren fu en kownukondre”.—Danièl 1:17, 20.
MEKI DEN BOSKOPU FU GADO BEKÈNTI
12. Sortu spesrutu wroko Danièl ben kisi?
12 Na ini ala den furu yari di Danièl ben de na Babilon, a ben dini leki a boskopuman fu Gado gi man soleki Kownu Nebukadnesar nanga Kownu Bèlsasar. A wroko fu Danièl ben de wan tumusi prenspariwan. Yehovah ben gi Nebukadnesar pasi fu pori Yerusalem, fu di a ben gebroiki en leki En wrokosani. Baka wan pisi ten, Babilon srefi ben sa kisi pori. Fu tru, a buku Danièl e hei Yehovah Gado leki a Moro Heiwan èn leki a Tiriman na ini „a kownukondre fu a libisma famiri”.—Danièl 4:17.
13, 14. San ben pasa nanga Danièl baka di Babilon fadon?
13 Danièl ben tan dini na ini a kownu oso so wan seibitenti yari te leki Babilon ben fadon. A ben de na libi ete di furu Dyu ben drai go baka na a mamakondre fu den na ini 537 b.G.T., ala di Bijbel no e taki dati a ben go nanga den. Seiker te leki a di fu dri yari fu a tiri fu Kownu Sirus, di ben seti a Gran Kownukondre Persia, a ben wroko fayafaya. ¡Na a ten dati Danièl ben musu abi pikinmoro 100 yari!
14 Baka a fadon fu Babilon, Danièl ben skrifi den moro prenspari sani na ini en libi na tapu papira. A sani di a ben skrifi de now wan tumusi prenspari pisi fu a Santa Bijbel èn sma sabi en leki a buku Danièl. Ma fu san ede wi musu poti prakseri na a owruten buku disi?
TU PISI, WAN BOSKOPU
15. (a) Sortu tu pisi a Bijbel buku Danièl abi? (b) Fa a pisi fu Danièl di skrifi leki te wan sma e fruteri wan tori kan gi wi wini?
15 A buku Danièl di de wan aparti sortu buku, abi tu pisi di e difrenti fu makandra srefisrefi — wán skrifi leki te wan sma e fruteri wan tori èn a trawan abi profeititori na ini. Ala den tu pisi fu a buku Danièl kan bow wi bribi. Fa? Den pisi di skrifi leki te wan sma e fruteri wan tori — den de den moro span pisi na ini Bijbel — e sori wi taki Yehovah sa blesi èn sa sorgu gi den wan di e hori den soifri retifasi na en. Danièl nanga den dri kompe fu en ben tanapu kánkan ala di den ben kisi fu du nanga tesi di ben de wan kefar gi den libi. Na ini a ten disi, ala den wan di wani tan loyaal na Yehovah, sa kisi tranga te den sa go luku na eksempre fu den man disi finifini.
16. San wi e leri fu den pisi fu a buku Danièl di abi profeititori na ini?
16 Den pisi fu a buku Danièl di abi profeititori na ini e bow bribi fu di den e sori taki Yehovah sabi hondrohondro yari na fesi — srefi dusundusun yari — fa a historia o waka. Fu eksempre, Danièl e gi finifini bodoi ini a tori fu a bigin èn a fadon fu den grontapumakti fu sensi a ten fu Babilon fu owruten langalanga go te na „a ten fu a kaba” (Danièl 12:4). Danièl e poti wi prakseri na a Kownukondre fu Gado ini na anu fu a Kownu di Gado ben poti makandra nanga kompe „santawan”, fu di a e sori go na a Kownukondre leki a tiri di sa tan fu têgo. A tirimakti disi sa meki a prakseri di Yehovah abi nanga wi grontapu kon tru dorodoro èn a sa abi leki bakapisi taki ala den wan di wani dini Gado sa kisi blesi.—Danièl 2:44; 7:13, 14, 22.
17, 18. (a) Fa a bribi fu wi sa kon tranga te wi e ondrosuku a buku Danièl finifini? (b) Sortu tori wi musu luku bifo wi e bigin studeri a profeiti Bijbel buku disi?
17 Wi de nanga tangi taki Yehovah no e hori a sabi di a sabi sani di o pasa na ini a ten di o kon gi ensrefi nomo. Na presi fu dati a de a „Sma di e tyari kibritori kon na krin” (Danièl 2:28). Te wi e luku a kontru fu den profeititori di skrifi na ini a buku Danièl, dan a bribi fu wi na ini den pramisi fu Gado sa kon tranga. Wi sa abi wan moro tranga overtoigi taki Gado sa meki en prakseri kon tru na a reti ten èn na a yoisti fasi di a e frukisi.
18 Ala den wan di e studeri a Bijbel buku Danièl nanga wan ati di wani sabi sani, sa gro na ini bribi. Ma bifo wi e bigin ondrosuku a buku disi finifini, wi musu luku buweisi fu si efu a buku disi tru. Son sabiman di e gi komentaar tapu tori fu buku, taki takru fu a buku Danièl fu di den e taki dati den profeititori fu Danièl, te yu luku en bun, ben skrifi baka di den ben kon tru. ¿Den sani, di den sma di e tweifri e taki, yoisti? A tra kapitel sa taki fu a tori disi.
SAN YU BEN KON FRUSTAN?
• Fu san ede a buku Danièl de gi a ten fu wi?
• Fa a du kon taki Danièl nanga den kompe fu en ben kon kisi wroko leki tiriman na Babilon?
• San ben de a spesrutu wroko fu Danièl na Babilon?
• Fu san ede wi musu poti prakseri na a profeititori fu Danièl?
[Prenki di e tapu heri bladzijde 4]
[Prenki di e tapu heri bladzijde 11]