Gado Na a Moro Bun Mati Di Yu Ben Kan Abi Oiti

A moro bun sani di oiti ben kan pasa nanga yu na taki yu tron Gado mati. Gado sa leri yu fa fu de koloku èn fu no broko yu ede. A sa fri yu fu wan lo kruktu bribi èn fu den gwenti di kan du sma ogri. A sa arki den begi fu yu. A sa yepi yu fu abi vrede na ini yu ati nanga a frutrow taki sani sa waka bun gi yu (Psalm 71:5; 73:28). Gado sa yepi yu te yu abi problema (Psalm 18:18). Èn Gado wani gi yu a presenti fu têgo libi.​—Romesma 6:23.

Te yu e kisi wan banti nanga Gado, dan yu sa kisi wan banti tu nanga den mati fu Gado. Den sa tron yu mati tu. Fu taki en leti, den sa de leki brada nanga sisa gi yu. Den sa breiti fu leri yu fu Gado. Den sa yepi yu èn gi yu deki-ati.

Wi no de a srefi leki Gado. Te yu wani de wan mati fu Gado, dan yu musu frustan wan prenspari sani. Wan matifasi nanga Gado, a no wan matifasi di tu srefi sortu sma abi nanga makandra. Gado moro owru, a koni moro wi èn a tranga moro wi. A abi a reti fu de wi Tiriman. Dati meki efu wi wani de en mati, dan wi musu arki en èn du san a e taigi wi fu du. Disi sa gi wi wini ala ten.​—Yesaya 48:18.