Yu Musu Leri fu Gado

Te yu wani de Gado mati, dan yu musu leri fu en. Den mati fu yu sabi yu nen, den e gebroiki en? Na dati den e du. Gado wani taki yu musu sabi en nen, taki yu musu gebroiki en tu. Gado nen na Yehovah (Psalm 83:18; Mateus 6:9). Yu musu leri tu san a lobi nanga san a no lobi. Yu musu sabi suma na den mati fu en, suma na den feanti fu en. A e teki ten fu leri sabi wan sma. Bijbel e taki dati a de wan koni sani fu poti ten na wan sei fu leri fu Yehovah.​—Efeisesma 5:15, 16.

Den mati fu Gado e du sani di e plisi en. Prakseri den mati fu yu. Efu yu no e libi bun nanga den èn yu e du sani di den no lobi, dan den sa tan de yu mati? Kwetikweti! Na so a de tu, taki efu yu wani de Gado mati, dan yu musu du sani di e plisi en.​—Yohanes 4:24.

A no ala kerki e yepi yu fu de Gado mati. Yesus, di de a moro krosibei mati fu Gado, ben taki fu tu pasi. Wán pasi bradi èn a lai nanga sma. A pasi dati e tyari sma go pori. A tra pasi smara èn wan tu sma nomo e waka na en tapu. A pasi dati e tyari sma go na têgo libi. Disi wani taki dati efu yu wani de wan mati fu Gado, dan yu musu leri a yoisti fasi fu anbegi en.​—Mateus 7:13, 14.