Fa Yu Kan Leri fu Gado

Yu kan leri fu Yehovah te yu e leisi Bijbel. Granwe kaba, Gado ben teki wan tu sma na mindri trawan, so taki den ben kan skrifi den sani di a ben abi na prakseri. Na Bijbel, na san wi e kari den sani disi di den skrifi. Na ini a ten disi wi e leri fu Gado te wi e leisi Bijbel. Fu di a wortu noso boskopu fu Yehovah de na ini Bijbel, meki wi e kari en so srefi Gado Wortu. Wi kan bribi san Bijbel e taki, fu di Yehovah no e lei noiti. ’Gado no man lei kwetikweti’ (Hebrewsma 6:18). Gado Wortu abi a waarheid.​—Yohanes 17:17.

Bijbel na wan fu den moro diri presenti di Gado gi wi. A de leki wan brifi di wan papa di lobi den pikin fu en, e seni go gi den. A e fruteri wi fa Gado pramisi fu kenki grontapu meki a kon tron wan heri moi presi fu tan — wan paradijs. A e fruteri wi san a du na ini a ten di pasa, san a e du now, èn san a sa du gi den getrow pikin fu en na ini a ten di e kon. A e yepi wi tu fu lusu den problema fu wi èn fu kon de koloku.​—2 Timoteus 3:16, 17.

Yehovah Kotoigi na mati fu Gado; den sa yepi yu fu frustan san Bijbel e leri. Taigi den nomo taki yu wani studeri Bijbel. Den no e aksi sma moni gi disi (Mateus 10:8). Boiti dati, yu kan go na den Kresten konmakandra. Den e hori disi na ini den presi pe den e anbegi Gado èn di den e kari Kownukondre zaal. Efu yu e go na den Kresten konmakandra, dan heri esi yu sa kon sabi moro fu Gado.

Den sani di Gado meki kan leri yu fu en. Bijbel e taki fu eksempre: „Gado ben meki hemel nanga grontapu” (Genesis 1:1). Di Yehovah ben meki „hemel”, dan a ben meki a son. Now, san dati e fruteri wi fu Gado? A e fruteri wi taki Yehovah abi bun furu makti. Soso en ben kan meki so wan tranga sani leki a son. A e fruteri wi tu taki Yehovah koni, fu di koni de fanowdu fu meki a son. A son e puru faya nanga leti èn noiti a e tapu fu bron.

Den sani di Yehovah meki e sori taki a lobi wi. Prakseri ala den difrenti sortu froktu di de dya na grontapu. Yehovah ben kan gi wi soso wán sortu froktu nomo — noso a no ben abi fu gi wi no wan froktu srefi. Ma Yehovah ben gi wi furu sortu froktu di e luku difrenti fasi, di pikin noso bigi, di abi difrenti kloru èn di e tesi difrenti fasi. Disi e sori taki Yehovah na wan Gado di no lobi wi nomo, ma di lobi fu gi wi furu sani tu. A e hori wi na prakseri tu èn a abi switifasi.​—Psalm 104:24.