Du muiti fu leisi

METI no man du san yu e du nownow. Fu ibri feifi sma di leri leisi, dan wán e kon di no leri leisi kwetikweti. Furu tron dati du kon fu di den no kisi na okasi fu go na skoro. Ma fu den sma di leri leisi, furu fu den no e leisi ala ten. Toku te yu sabi leisi, dan nanga den sani di yu e leisi a kan de neleki yu e koiri go na tra kondre. Noso nanga den sani di yu e leisi a de neleki yu e miti tra sma, yu e si fa den e libi, èn dati kan yepi yu fu libi moro bun. Sosrefi nanga den sani di yu e leisi yu kan kon sabi sani di kan yepi yu nanga den broko-ede fu a libi.

Te wan yongu sma man leisi, dan dati kan yepi en fu leri furu sani na skoro. Te a e suku wroko, dan a leisi di a yongu sma disi man leisi, sa abi krakti tapu sortu wroko a sa man feni èn omeni yuru a sa abi fu wroko so taki a sa man sorgu gi den sani di a abi fanowdu fu libi. Te den wefi di e wroko na oso, sabi leisi, dan dati kan yepi den moro bun fu sorgu den osofamiri. Dati de so, fu di den sa sabi moro bun sortu nyanyan bun fu nyan, fa den musu hori a presi krin, èn fa den musu sorgu taki trawan no kon siki na ini na osofamiri. Wan tu mama di sabi leisi bun, kan abi wan bun krakti tu tapu den pikin fu den so taki den pikin kan leri moro bun.

Ma a no de fu taki dati a moro bigi winimarki di yu e kisi te yu sabi leisi, na taki a kan yepi yu fu „feni a sabi fu Gado srefi” (Odo 2:5). Furu sani di wi musu du te wi e anbegi Gado, e aksi fu wi taki wi musu man leisi. Na den gemeente konmakandra wi e leisi Bijbel nanga buku di e sori san skrifi na ini Bijbel. Efu yu sabi leisi bun, dan dati kan yepi yu furu so taki sani sa waka bun gi yu na ini a preikiwroko. Sosrefi, te yu e sreka yusrefi fu go na ini a preikiwroko noso fu go na den konmakandra, dan yu musu man leisi tu. Fu dati ede a gro di yu kan gro na yeye fasi, e anga furu fu a gwenti di yu gwenti fu leisi.

Gebroiki na okasi bun

Wan tu sma di e leri fu Gado, no kisi furu skoroleri. A kan taki den musu leri leisi so taki den kan gro moro bun na yeye fasi. Noso kande wan sma musu yepi den so taki den kan leisi moro bun. Te dati de fanowdu, dan den gemeente e meki muiti fu orga Leri leisi-skoro nanga yepi fu a brochure Du Muiti fu Leisi èn fu Skrifi. Dusundusun sma nyan bun fu a seti disi. Fu di a de prenspari fu man leisi bun, dati meki wan tu gemeente seti wan tu klas fu yepi sma meki den leisi moro bun. Den klas disi e hori makandra nanga a Theokrasia Diniwroko-skoro. Srefi na den presi pe den sortu klas disi no e hori, wan sma kan go bun na fesi efu ibri dei a e teki ten fu leisi nanga wan tranga sten èn efu a abi wan prati na a skoro doronomo.

A de wan sari taki buku nanga furu prenki èn sosrefi telefisi, e meki taki furu sma no e leisi so furu moro. Te wan sma e luku telefisi tumusi furu èn te a no e leisi nofo, dan dati no sa meki en leisi moro bun. A kan meki sosrefi taki a no sa man denki so bun, a no sa man taki-go-taki-kon nanga trawan, èn a no sa man taki krin fa ensrefi e denki fu wan tori.

„A getrow èn koni srafu” meki buku di e yepi wi fu frustan Bijbel. Na ini den buku disi wi kan feni furu tori di e taki fu prenspari yeye afersi (Mat. 24:45; 1 Kor. 2:12, 13). Den buku disi e yepi wi tu fu sabi san e pasa na ini grontapu èn den e sori wi san den sani disi wani taki. Den e yepi wi tu fu kon sabi moro bun san Gado meki, èn den e leri wi san wi musu du nanga sani di e miti wi na ini wi libi. Moro prenspari leki dati srefi, den buku dati e sori wi fa fu dini Gado bun, so taki en kan feni wi bun. Te yu e leisi den sortu bun sani dati, dan dati sa yepi yu fu gro na yeye fasi.

Te yu man leisi bun, dan dati a no ala ete. Te yu sabi leisi bun, dan yu musu gebroiki dati na wan bun fasi. Neleki fa yu musu luku bun san yu e nyan, na so yu musu luku bun tu san yu e leisi. Fu san ede yu ben o nyan wan nyanyan di no gosontu trutru, noso di kan kiri yu srefi? Na so a de tu te yu e leisi. Fu san ede yu ben o leisi sani di kan pori yu frustan nanga yu ati? Fu san ede yu ben o leisi den sortu sani dati wanwan leisi srefi? Bijbel gronprakseri musu yepi wi fu bosroiti san wi o leisi. Fosi yu teki a bosroiti san yu o leisi, dan yu musu poti prakseri na wan tu bijbeltekst soleki Preikiman 12:12, 13; Efeisesma 4:22-24; 5:3, 4; Filipisma 4:8; Kolosesma 2:8; 1 Yohanes 2:15-17; nanga 2 Yohanes 10.

Yu musu sabi bun fu san ede yu e leisi

Te wi e ondrosuku den Evangelietori, dan wi e si krin o prenspari a de fu sabi fu san ede wi e leisi. Fu eksempre, na ini na Evangelietori fu Mateyus wi kan leisi taki Yesus e poti aksi gi kerki fesiman di ben sabi Bijbel heri bun. A ben e aksi den sani soleki „Unu no leisi?” èn „Noiti unu no leisi disi?” A ben poti den aksi disi gi den bifo a gi den wan piki fu Bijbel tapu den triki aksi fu den (Mat. 12:3, 5; 19:4; 21:16, 42; 22:31). Wán sani di wi kan leri fu disi na taki, efu wi no sabi bun fu san ede wi e leisi, dan wi kan denki wan sani di no tru kwetikweti. Den Fariseiman ben leisi den Buku fu Bijbel fu di den ben denki taki, nanga dati den ben o kisi têgo libi. Ma soleki fa Yesus ben sori, dan wan sma no kan kisi têgo libi, efu a no lobi Gado èn efu a no e teki a sani di Gado seti fu frulusu sma (Yoh. 5:39-43). Den sani di den Fariseiman ben du, den ben du fu di den ben denki densrefi nomo, èn fu dati ede, furu fu den sani di den ben denki, ben fowtu.

A moro soifri sani di e meki taki wi wani leisi Yehovah Wortu, na fu di wi lobi En. So wan lobi e gi wi deki-ati fu leri san Gado wani, bika lobi „e prisiri nanga a waarheid” (1 Kor. 13:6). A kan de so taki wi no ben lobi leisi fosi. Ma te wi lobi Yehovah nanga wi „heri frustan”, dan dati sa meki taki wi wani du furu muiti fu kon sabi fu Gado (Mat. 22:37). Te wi lobi wan sani, dan wi wani kon sabi moro fu a sani dati. Èn fu di wi wani sabi moro, dan wi sa leri moro tu.

Luku bun taki yu no e leisi tumusi gaw

Te yu e leisi, dan na a srefi ten yu e si wortu di yu sabi kaba. Srefi na a sani disi di yu e leisi now, yu e si wortu di yu sabi kaba èn yu e memre san den wortu dati wani taki. Yu kan leisi moro gaw, efu yu e luku moro leki wán wortu nomo te yu e leisi. Na presi fu yu tapu ibri tron fu luku ibri wortu di yu e leisi, dan pruberi fu si difrenti wortu wantewante. Te yu teki a gwenti disi, dan yu sa si taki yu sa frustan moro bun san yu e leisi.

Te yu e leisi sani di de moro muilek fu frustan, dan yu sa musu wroko na wan tra fasi. Efu yu du dati, dan yu sa man kisi moro winimarki fu den muiti di yu e du fu leisi. Di Yehovah ben taigi Yosua fa a ben musu leisi den Buku fu Bijbel, dan Yehovah ben taki: „A wetbuku disi no musu komoto na yu mofo, èn yu musu leisi na ini en nanga wan safri sten” (Yos. 1:8). Furu tron te wan sma e taki nanga wan safri sten, dan a e prakseri dipi fu wan sani. Fu dati ede, a Hebrew wortu di vertaal nanga „leisi nanga wan safri sten”, yu kan vertaal tu nanga „prakseri dipi” (Ps. 63:6; 77:12; 143:5). Te wan sma e prakseri dipi fu sani, dan a no e du disi gawgaw. Te wan sma e leisi Gado Wortu èn a e prakseri dipi fu san a e leisi, dan dati sa abi wan moro bigi krakti tapu en frustan nanga en ati. Bijbel abi profeititori, rai, odo, puwema, krutu boskopu fu Gado, finifini tori fu den sani di Yehovah abi na prakseri, èn furu eksempre fu sani na ini a libi di trutru pasa nanga sma. Ala den tori disi warti furu gi sma di wani waka Yehovah pasi. Fu tru, a o gi yu furu winimarki te yu e leisi Bijbel na so wan fasi taki a kan doro yu frustan nanga yu ati!

Leri fu poti yu prakseri na a sani di yu e leisi

Te yu e leisi wan sani, dan du neleki yusrefi de na ini ibri pisi di yu leisi. Pruberi fu si den sma fu suma yu e leisi, èn pruberi fu firi san e pasa na ini a libi fu den. Te yu luku en bun, dan disi makriki te yu e leisi so wan tori leki di fu David nanga Goliat, soleki fa dati skrifi na ini 1 Samuel kapitel 17. Ma srefi finifini tori fu a bow di den ben bow a tabernakel èn a poti di den ben poti den priester na wroko soleki fa dati skrifi na ini Exodus nanga Lefitikus, sa kon de neleki yu e si dati nanga yu eigi ai. Fa so? We, pruberi fu si o bigi a tabernakel ben de èn sortu sani den ben gebroiki fu bow en. Prakseri tu fa a switismeri ben e smeri, fa den losi a karu, èn sortu meti den ben musu tyari leki ofrandi. Prakseri sortu kefalek bigi grani a ben musu de fu du diniwroko leki priester! (Luk. 1:8-10) Efu yu e pruberi fu si, firi, yere, smeri, noso tesi san e pasa, dan dati sa yepi yu fu frustan o prenspari a sani de di yu e leisi èn a sa yepi yu tu fu memre moro bun san yu e leisi.

Ma efu yu no e luku bun, dan te yu e pruberi fu leisi, yu kan bigin prakseri tra sani. Kande yu ai e luku a papira fu a buku, ma yu e prakseri wan heri tra sani. Poku e prei? A telefisi leti? Tra sma fu yu famiri e taki nanga makandra? Efu yu kan, dan a moro bun fu leisi na wan presi pe ala sani de pî. Ma toku, a kan taki a no den sani disi wawan e meki yu prakseri tra sani. Kande yu ben abi furu fu du a dei dati. We, a de makriki srefisrefi fu denki baka fu den sani di yu du! A no de fu taki dati a bun fu luku baka san yu ben du a dei dati, ma a no bun fu du dati te yu e leisi. Kande yu e bigin leisi nanga ala yu prakseri, noso kande yu e bigin nanga begi srefi fosi yu leisi. Ma dan, aladi yu e leisi, toku yu e bigin denki tra sani. Pruberi en baka. Dwengi yusrefi fu kan hori ala yu prakseri na san yu e leisi. Safrisafri yu sa si taki a sa go moro bun.

San yu e du te yu leisi wan wortu di yu no e frustan? Kande wan tu wortu di yu no sabi, yu kan frustan te yu e leisi moro fara, bika drape den e fruteri san den wortu dati wani taki. Noso kande yu man si san a wortu wani taki, fu di yu leisi a pisi tori di skrifi lontu a wortu. Efu yu no e frustan en ete, dan teki yu ten fu go suku a wortu na ini wan buku, noso poti wan marki gi a wortu, so taki yu kan aksi wan trawan san a wortu dati wani taki. Na so wan fasi yu sa kon sabi moro wortu èn yu sa frustan sani moro bun te yu e leisi.

Leisi na fesi sma

Di na apostel Paulus ben taigi Timoteyus fu go doro fu meki muiti fu leisi, dan Paulus ben taki spesrutu fu a leisi di Timoteyus ben musu leisi gi trawan so taki den ben kan nyan bun fu dati (1 Tim. 4:13). Te yu wani leisi bun na fesi sma, dan dati wani taki moro leki fu leisi wortu nomo nanga wan tranga sten. A leisiman musu frustan san den wortu wani taki èn a musu frustan tu sortu prakseri den wortu dati, wani tyari abra. Soso te a leisiman e du dati, dan a sa man tyari den soifri prakseri nanga den yoisti firi, abra na den arkiman. Dati wani taki dati a leisiman sa musu sreka ensrefi bun èn a sa musu pruberi fu leisi a tori ibri tron baka teleki a sabi leisi en bun. Fu dati ede, Paulus ben frumane: „Go doro fu meki muiti fu leisi na fesi sma.” Tapu a Theokrasia Diniwroko-skoro yu sa leri bun sani fu yepi yu leisi bun na fesi sma.

Suku ten fu leisi

„Den sani di wan sma di de fayafaya, wani du, seiker sa abi winimarki, ma ibri sma di e du sani tumusi esi, sa pina seiker” (Odo 21:5). Efu wi wani leisi trutru, dan na odo disi de tru srefisrefi! Efu wi wani abi „winimarki”, dan wi musu de fayafaya fu du den sani di wi poti na wi ede, so taki tra sani no kon na ini a presi fu a leisi di wi wani leisi.

O ten yu e leisi? Yu e feni winimarki te yu e leisi fruku mamanten? Noso a moro bun gi yu fu leisi moro lati tapu a dei? Efu yu kan teki 15 noso 20 miniti ibri dei fu leisi, dan yu sa skreki fu si o furu yu kan du. Ma a prenspari sani na taki yu musu leisi ibri tron tapu fasti ten di yu poti na wan sei fu leisi.

Yehovah abi bigi sani na prakseri. Dan fu san ede a meki sma skrifi dati na ini wan buku? A du dati so taki sma kan suku rai na ini en Wortu di skrifi na ini Bijbel. Disi e yepi den fu poti prakseri na den kefalek moi wroko fu Yehovah, fu fruteri den pikin fu den fu disi, èn fu memre san Gado du (Ps. 78:5-7). A moro bun fasi fa wi e sori taki wi e warderi den sani di Yehovah gi wi, na te wi e meki muiti fu leisi en Wortu di e gi wi libi.