Te yu e studeri, yu sa kisi winimarki

OITI yu si fa sma e suku froktu? Yu si fa den e luku a froktu bun, fosi den e teki en fu wan ipi? Furu fu den sma disi e luku a kloru fu a froktu, sosrefi o bigi a froktu de. Disi den e du nomo fu kon sabi efu a froktu lepi kaba. Wan tu sma e smeri a froktu. Trawan e fasi a froktu, noso den e kwinsi en srefi. Trawan baka e wegi a froktu. Na ini ibri anu fu den, den e poti wan froktu fu kon sabi sortuwan abi moro froktuwatra na ini. San den sma disi e denki te den e du den sani disi? Den e ondrosuku sani finifini, den e luku fa a wan froktu de tra fasi leki a trawan, den e memre den froktu di den ben teki kaba, èn den e agersi den froktu di den e si now, nanga den wan di den sabi kaba. Fu di den luku sani finifini, meki den o prisiri fu nyan a switi froktu di den feni.

A no de fu taki dati te wi e studeri Gado Wortu, dan den winimarki sa de moro furu. Te a de wan prenspari sani na ini wi libi fu studeri Gado Wortu, dan wi bribi e kon moro tranga, wi lobi e kon moro tranga, wi kan du moro na ini a diniwroko fu wi, èn den bosroiti di wi e teki e sori moro krin taki wi man si sani krin èn taki wi abi a koni di komoto fu Gado. Odo 3:15 e taki fu den sortu winimarki disi: „Ala tra sani di e meki yu prisiri, noiti no kan doro a prisiri di yu e kisi fu [koni].” Na den winimarki dati yu e feni? A fasi fa yu e studeri, kan yepi yu fu kisi den winimarki dati.​—Kol. 1:9, 10.

San na studeri? A de moro leki fu leisi sani frafra nomo. Fu studeri yu musu gebroiki yu frustan bun so taki yu kan poti bun prakseri na wan tori. Disi wani taki, dati yu musu ondrosuku finifini tu san yu e leisi, èn yu musu teki dati gersi nanga san yu sabi kaba. Yu musu luku sosrefi fu san ede den e taki wan sani na wan spesrutu fasi. Te yu e studeri, dan yu musu prakseri dipi fu iniwan tori di kande na wan nyun tori gi yu. Te yu e si rai di komoto fu Bijbel, dan prakseri fa yusrefi kan gebroiki a rai dati moro bun. Leki wan Kotoigi fu Yehovah, yu sa wani prakseri tu o ten yu kan gebroiki den sani di yu studeri fu yepi trawan. A de krin taki te yu e studeri, dan yu musu prakseri dipi tu.

Kisi a yoisti denki nanga a yoisti firi fosi yu bigin

Fosi yu bigin studeri, dan yu e sreka yusrefi, fu di yu e teki yu Bijbel, den buku di yu o gebroiki, wan potlood noso wan pen, èn kande wan sani fu skrifi na tapu. Ma yu e sreka yu ati tu? Bijbel e fruteri wi taki Esra „ben sreka na ati fu en fu go suku rai na a wet fu Yehovah èn fu du en èn fu leri sma wet nanga retidu na Israel” (Esra 7:10). San yu musu du fu sreka yu ati na so wan fasi?

Begi e yepi wi fu abi a yoisti denki te wi e studeri Gado Wortu. Nanga wi heri ati wi wani de klariklari fu teki den leri di Yehovah e gi wi. Ibri leisi, fosi yu bigin studeri, dan begi Yehovah so taki en yeye kan yepi yu (Luk. 11:13). Aksi en fu yepi yu frustan san yu sa studeri, èn san a sani dati abi fu du nanga a prakseri fu en. Aksi en tu fa dati kan yepi yu fu si krin san bun èn san ogri, fa yu musu gebroiki den gronprakseri fu en na ini yu libi, èn fa a sani di yu e studeri abi krakti tapu a matifasi fu yu nanga en (Odo 9:10). Te yu e studeri, dan „tan aksi Gado” fu gi yu koni (Yak. 1:5). Ondrosuku yusrefi bun èn luku efu trutru yu e du san yu e leri, èn suku yepi na Yehovah fu puru fowtu denki noso ogri lostu. Ala ten „piki Yehovah nanga tangi na ati” gi den sani di a e tyari kon na krin (Ps. 147:7). Te wi e begi bifo wi e bigin studeri dan wi sa tron wan bun mati fu Yehovah, fu di begi e yepi wi fu piki en te a e taki nanga wi nanga yepi fu en Wortu.​—Ps. 145:18.

Fu di Yehovah en pipel wani teki ala den rai di a e gi den, dati meki den de heri tra fasi leki tra studenti. Den sma di no e gi densrefi fu dini Gado, lobi fu tweifri èn fu krutu san skrifi. Ma dati a no a fasi fa wi de. Wi e frutrow tapu Yehovah (Odo 3:5-7). Efu wi no e frustan wan sani, dan wi no e meki bigi èn wi no e taki dati a sani fowtu. Aladi wi e suku èn e diki fu feni a piki, wi e wakti tapu Yehovah (Mika 7:7). Neleki Esra, wi wani fu du san wi e leri èn wi wani leri tra sma tu san wi e leri. Efu wi abi disi na prakseri na ini wi ati, dan wi sa kisi bun winimarki te wi e studeri.

Fa yu musu studeri

Na presi fu bigin na a fosi paragraaf èn go doro te na a kaba, dan teki yu ten fu luku a heri artikel fosi, noso a kapitel di yu o studeri. Bigin ondrosuku den wortu fu a nen fu na artikel noso a kapitel. Disi e fruteri yu san na a tori di yu o studeri. Baka dati, luku finifini fa den ondro-edeprakseri abi fu du nanga a nen. Luku ala den prenki, karta, noso leri boksu di de na ini na artikel, noso na ini a kapitel. Aksi yusrefi: ’Efu mi prakseri fu den sani di mi luku didyonsro, dan san mi e denki taki mi sa leri? Fa a sa du mi furu bun?’ Ala den sani disi e sori yu san yu kan fruwakti fu den sani di yu o studeri.

Now luku den tru tori. Na ini den Waktitoren studie-artikel nanga na ini wan tu buku, yu kan feni wan tu aksi. Te yu leisi a paragraaf, dan a sa bun fu marki pe a piki tapu na aksi. Srefi efu aksi no de na ini a sani di yu e studeri, toku yu kan poti marki na den prenspari penti di yu wani memre. Efu yu si wan sani di yu no ben sabi ete, dan teki pikinso moro ten fu de seiker taki yu e frustan a tori bun now. Suku eksempre noso fasi fu taki-go-taki-kon di yu sa man gebroiki na ini a preikiwroko, noso di yu sa man gebroiki na ini wan lezing di yu musu hori. Prakseri fu spesrutu sma di yu kan yepi fu tranga a bribi fu den nanga den sani di yu e studeri. Poti wan marki gi den sani di yu wani gebroiki, èn luku den sani dati baka te yu kaba nanga a studie fu yu.

Te yu e studeri na so wan fasi, dan suku den bijbeltekst di kari na ini a pisi di yu e studeri. Ondrosuku san ibri tekst abi fu du nanga a moro prenspari sani di skrifi na ini a paragraaf.

A kan taki yu e si wan tu sani di yu no e frustan wantewante noso kande wan tu sani de di yu wani ondrosuku moro fini. Na presi fu den sani disi hori yu na baka, dan skrifi den wan presi so taki yu kan ondrosuku den moro fara tapu wan tra ten. Furu tron yu kan frustan wan penti moro bun te yu e leisi go doro. Efu yu e leisi go doro, ma toku yu no e frustan a penti ete, dan yu kan go ondrosuku dati moro fara. San na den sani di yu kan go ondrosuku moro fara? Kande wan bijbeltekst skrifi drape di yu no ben frustan. Noso kande yu no man frustan wantewante san a tekst di skrifi drape, abi fu du nanga a tori di yu e leisi. Kande yu e firi taki yu e frustan wan sani di yu e studeri, ma taki yu no sa man fruteri dati bun na wan tra sma. Na presi fu du neleki yu no si den sani disi, dan a ben o bun fu ondrosuku den moro fara; ma du dati te yu kaba nanga a studie fu yu.

Di Gado ben meki na apostel Paulus skrifi en brifi gi den Hebrew Kresten, dan Paulus ben skrifi finifini tori. Ma dan na mindribere fu en brifi, a ben wakti pikinso, dan a taki: „Disi na a prenspari pisi fu a tori” (Hebr. 8:1). Yusrefi e taki dati ten na ten? Prakseri fu san ede Paulus ben du dati. Na ini den kapitel na fesi, na ini a srefi brifi dati, Paulus ben sori kaba taki Krestes go na ini hemel srefi leki Gado en bigi Granpriester (Hebr. 4:14–5:10; 6:20). Ma toku, fu di Paulus ben sori san na a moro prenspari pisi fu a tori èn fu di a ben poti krakti na tapu dati na ini a bigin fu kapitel 8, dati meki a ben sreka den leisiman fu en fu denki dipi fa a tori dati abi fu du nanga a libi fu den. Paulus ben sori taki Krestes ben kon na fesi Gado gi den Hebrew Kresten dati, èn taki Krestes ben opo a pasi so taki densrefi ben kan go na ini a „santa presi” fu hemel (Hebr. 9:24; 10:19-22). Fu di a howpu disi fu den ben seiker, dati meki den ben sa man fiti den tra rai fu a brifi disi tu, di abi fu du nanga bribi, horidoro, nanga a fasi fa wan Kresten musu tyari ensrefi. Na a srefi fasi, te wi e studeri, dan wi musu poti prakseri na den moro prenspari pisi fu a tori. Disi sa yepi wi fu si san na a tori di wi e studeri. Sosrefi a sa meki wi frustan bun fu san ede wi musu libi soleki fa a tori e taki.

A studeri di yusrefi e studeri, sa gi yu deki-ati fu du san yu e studeri? Disi na wan kefalek prenspari aksi. Te yu e leri wan sani, dan aksi yusrefi: ’Fa a sani disi musu abi krakti tapu a fasi fa mi e denki? Fa a musu abi krakti tapu den sani di mi wani doro na ini a libi? Fa mi kan gebroiki a rai disi fu lusu wan problema, fu teki wan bosroiti, noso fu doro wan marki? Fa mi kan gebroiki a rai disi gi mi osofamiri, na ini a preikiwroko, èn na ini a gemeente?’ Begi te yu e poti prakseri na den aksi disi, èn denki bun fu sani di kan pasa trutru nanga yu, pe yu kan du den sani disi di yu kon sabi.

Baka te yu kaba nanga wan kapitel noso nanga wan artikel, dan teki yu ten fu luku baka san yu studeri. Luku efu yu kan memre den moro prenspari penti nanga den sani di ben horibaka gi den moro prenspari penti disi. Efu yu du en so, dan dati sa yepi yu fu gebroiki den tori disi na ini a ten di e kon.

San yu musu studeri

Leki Yehovah en pipel, wi abi furu sani fu studeri. Ma pe wi musu bigin dan? Ibri dei, a bun fu wi studeri a tekst nanga a komentaar fu a buku Ondrosuku den Buku fu Bijbel ala dei. Ibri wiki wi e fisiti gemeente konmakandra. Te wi e studeri fu sreka wisrefi gi den konmakandra disi, dan dati sa gi wi furu winimarki. Boiti dati, wan tu sma gebroiki den ten na wan koni fasi fu di den studeri wan tu fu wi Kresten buku di ben meki, bifo den ben leri a waarheid. Wan tu trawan baka e teki wan tu vers fu wi alawiki leisipisi fu Bijbel èn den e studeri dati moro fini.

Ma san yu kan du te yu no man studeri ala sani finifini gi den gemeente konmakandra fu ibri wiki? No lasi yusrefi fu luku den tori gawgaw, noso, moro ogri srefi, fu no studeri notinoti, soso fu di yu no kan luku ala den sani. Na presi fu dati, pruberi fu kon sabi omeni yu man studeri, èn dan studeri den sani dati bun. Du dati ibri wiki. Baka wan pisi ten, pruberi fu studeri moro fu den sani di wi musu sreka gi den tra konmakandra.

„Meki yu osofamiri kon tranga”

Yehovah sabi taki osofamiri edeman musu wroko tranga fu sorgu den lobiwan fu den. Odo 24:27 e taki: „Sreka yu wroko di yu abi na dorosei, èn seti en gi yusrefi na tapu a pranigron.” Ma toku, yu no musu frigiti san yu osofamiri abi fanowdu na yeye fasi. Dati meki a vers e taki moro fara: „Baka dati yu musu meki yu osofamiri kon tranga tu.” Fa osofamiri edeman kan du disi? Odo 24:3 e taki: „Koni fu si sani krin sa poti [wan osofamiri] steifi.”

Fa koni fu si sani krin, sa gi yu osofamiri winimarki? Te wan sma abi a koni fu si sani krin, dan a abi a frustan fu luku sani finifini. Wi kan taki dati wan bun osofamiri studie e bigin nanga na ondrosuku di yu e ondrosuku yu osofamiri srefi. Fa den sma na ini yu famiri e go na fesi na yeye fasi? Arki bun te yu e taki nanga den. Yu e yere taki den e krutukrutu, noso taki den ati e bron? Den e meki furu muiti fu kon gudu? Te yu de na ini a preikiwroko nanga den pikin fu yu, dan den e syen fu taki dati den na Yehovah Kotoigi te den e miti nanga tra yonguwan? Den e prisiri fu leisi Bijbel èn fu studeri dati nanga na osofamiri? Trutru den e meki a fasi fa Yehovah e du sani, de a fasi fa den e libi? Efu yu ondrosuku a tori bun leki osofamiri edeman, dan dati sa sori yu san yu musu du so taki yu kan kweki wan bun yeyefasi na ini ibri sma fu na osofamiri.

Go luku na ini A Waktitoren fu feni artikel di e taki spesrutu fu a sani di yu osofamiri abi fanowdu. Baka dati taigi den sma fu yu na fesi san yu nanga den o studeri, so taki den kan bigin luku a tori. Te unu e studeri, dan yu musu sorgu taki a tan de wan prisiri ten. Sori den sma fu yu osofamiri o bun a tori de di unu e taki, èn sori den fa unu leki osofamiri kan gebroiki dati. Ma du dati sondro fu strafu den, noso fu meki den firi syen. Sorgu taki ibri sma na ini na osofamiri sabi taki a tori abi fu du nanga en tu. Yepi ibri sma na ini na osofamiri fu si fa Yehovah en Wortu de „volmaakti” fu gi wi san wi abi fanowdu na ini a libi.​—Ps. 19:7.

Kisi den winimarki

Sma di e luku sani bun ma di no e frustan sani na yeye fasi, kan ondrosuku son, mun, stari nanga den sani di abi fu du nanga dati, noso den kan ondrosuku san e pasa na grontapu, noso den kan ondrosuku densrefi tu. Ma toku den no sabi trutru san den e ondrosuku. Na a tra sei, den sma di e studeri Gado Wortu dorodoro kan si krin nanga yepi fu Gado en yeye, taki den sani disi na wroko fu Gado. Den kan si tu taki den sani disi na profeititori di e kon tru, èn taki den de sani di e meki wi kon sabi san Gado abi na prakseri fu blesi den libisma di e arki en.​—Mark. 13:4-29; Rom. 1:20; Openb. 12:12.

Ma awansi o moi a de fu si sani so, toku dati no musu meki wi kisi bigifasi. Na presi fu dati, efu wi e ondrosuku Gado Wortu ala dei, dan dati e yepi wi fu tan abi sakafasi (Deut. 17:18-20). A e yepi wi tu fu kibri wisrefi gi „a triki krakti fu sondu”. Te Gado Wortu abi krakti na tapu wi ati, dan sondu no sa hari wi so makriki, fu di wi teki a fasti bosroiti fu no sondu (Hebr. 2:1; 3:13; Kol. 3:5-10). Na so wan fasi wi „kan waka na wan fasi di warti gi Yehovah, fu plisi en dorodoro, aladi [wi] e tan meki froktu ini ibri bun wroko” (Kol. 1:10). Dati na a marki di wi wani doro te wi e studeri Gado Wortu, èn te wi doro a marki dati, dan dati na a moro bigi winimarki di wi kan kisi.