Fu san ede wi no musu lei

KON meki wi taki dati wan meisje e taigi en mama: „Iya, mi o kon na oso wantron te skoro kaba.” Ma a e tan èn a e prei nanga den mati fu en, èn bakaten a e taigi en mama: „Mi skoromisi hori mi na skoro di skoro tapu.” A ben o bun fu taki so wan sani?—

Noso, wan boi ben kan taigi en papa: „Nôno, mi no skopu a bal na ini na oso.” Ma san efu a du dati trutru? A ben o bun efu a ben taki dati a no du dati?—

A Bigi Leriman sori wi san na a yoisti sani fu du. A ben taki: ’Te yu taki Iya, dan meki a tan Iya, èn te yu taki Nôno, dan meki a tan Nôno; iniwan tra sani di yu e taki e komoto fu na ogriwan’ (Mateyus 5:37). San Yesus ben wani taki nanga dati?— A ben wani taki dati wi musu du san wi e taki.

Wan tori de na ini Bijbel di e sori o prenspari a de fu fruteri san tru. A tori dati abi fu du nanga tu sma di ben taki dati den ben de disipel fu Yesus. Meki wi luku san ben pasa.

Sowan tu mun baka di Yesus dede, furu sma fu farawe presi kon na Yerusalem gi wan prenspari fesa fu den Dyu. A fesa dati nen a Pinksterfesa. Na apostel Petrus e hori wan tumusi moi taki, èn na ini a taki disi a e fruteri den sma fu Yesus, di Yehovah gi wan opobaka. Disi na a fosi leisi di furu fu den sma di kon na Yerusalem e leri fu Yesus. Now den wani sabi moro. Sobun, san den e du?

Den tan moro langa leki den ben abi na prakseri. Ma baka wan pisi ten, sonwan fu den no abi moni moro, èn den abi moni fanowdu fu bai nyanyan. Den disipel na ini Yerusalem wani yepi den fisitiman disi. Fu dati ede, furu fu den e seri den sani di den abi, èn den e tyari a moni go na den apostel fu Yesus. Baka dati, den apostel e gi a moni na den sma di abi en fanowdu.

Ananias nanga en wefi, Safira, di de memre fu a Kresten gemeente na ini Yerusalem, e seri wan gron di den abi. Nowan sma e taigi den fu seri en. Densrefi e bosroiti fu du dati. Ma den no e du dati fu di den lobi den nyun disipel fu Yesus. Fu taki en leti, Ananias nanga Safira wani gi sma a denki taki den bun srefisrefi. Sobun, den e bosroiti fu taki dati den e gi ala a moni fu yepi tra sma. Ma den o gi soso wan pisi fu a moni, èn den ben o taki dati den e gi ala. San yu feni fu a tori dati?—

We, Ananias e kon na den apostel. A e gi den a moni. A no de fu taki, dati Gado sabi taki a no e gi ala. Sobun, Gado e meki Petrus kon sabi taki Ananias no e taki fa sani de trutru.

Baka dati Petrus e taki: ’Ananias, fu san ede yu meki Satan kori yu fu du a sani disi? A gron ben de fu yu. Yu no ben abi fu seri en. Èn srefi baka di yu seri a gron, yusrefi ben kan bosroiti san yu ben o du nanga a moni. Ma fu san ede yu e du neleki yu gi ala moni, aladi yu e gi soso wan pisi fu en? Nanga disi yu no e lei gi wi wawan, ma yu e lei gi Gado tu.’

A sani disi na wan seryusu tori. Ananias e lei! A no e du soleki fa a e taki. A e kori sma. Bijbel e taigi wi san e pasa moro fara. A e taki: ’Di Ananias yere den wortu fu Petrus, dan a fadon na gron èn a dede.’ Gado naki Ananias kiri! Baka dati, sma tyari en dedeskin go na dorosei èn den beri en.

Sowan dri yuru baka dati, Safira e kon na inisei. A no sabi san pasa nanga a masra fu en. Sobun Petrus aksi en: ’Unu tu seri a gron gi a moni di unu gi wi?’

Safira piki: ’Iya, wi seri a gron gi a moni dati.’ Ma dati na wan lei! Di den seri a gron, dan den hori pikinso fu a moni gi densrefi. Fu dati ede, Gado e naki Safira kiri tu.​—Tori fu den Apostel 5:1-11.

San wi musu leri fu a sani di pasa nanga Ananias nanga Safira?— A sani disi e leri wi taki Gado no lobi sma di e lei. A wani taki ala ten wi musu fruteri san tru. Ma furu sma e taki dati a no de wan ogri fu fruteri lei. Yu denki taki den sma dati abi leti?— Yu ben sabi taki ala siki, ala sari, nanga dede na grontapu kon fu di wan sma ben taki wan lei?—

Memre taki Didibri ben lei gi a fosi uma, Eva. A ben taigi Eva taki a no ben o dede efu a ben trangayesi Gado èn efu a ben nyan a froktu di Gado ben taigi en fu no nyan. Eva ben bribi Didibri èn a nyan fu a froktu. A meki Adam nyan fu en tu. Di den du dati, dan den tron sondari, èn ala den pikin fu den ben o gebore leki sondari. Èn fu di ala den pikin fu Adam ben de sondari, meki den nyan pina èn den dede. Fa ala problema bigin?— Den bigin nanga wan lei.

A no e fruwondru wi taki Yesus ben taki dati Didibri „na wan leiman èn a tata fu leitori”! A ben de a fosi sma di ben fruteri wan lei. Te wan sma e fruteri wan lei, dan a e du san Didibri ben du fosi. Wi musu denki a sani disi efu oiti wi ben sa wani fruteri wan lei.​—Yohanes 8:44.

O ten yu ben kan kisi a prakseri fu fruteri wan lei?— A no te yu du wan ogri?— Kande yu broko wan sani, aladi yu no du en fu espresi. Te wan sma e aksi yu efu na yu du en, dan yu musu taki dati yu brada noso yu sisa du en? Noso, yu musu du neleki yu no sabi fa a sani du broko?—

Kon meki wi taki dati yu ben musu du yu skorowroko, ma yu no du ala? Yu musu taki dati yu du ala, aladi dati no tru?— Wi musu memre Ananias nanga Safira. Den no ben fruteri soifri fa sani ben de trutru. Èn Gado naki den kiri fu sori taki den ben du wan takru sani trutru.

Sobun, awansi san wi du, sani o kon moro takru te wi e lei, èn wi no musu fruteri afu nomo fu san pasa. Bijbel e taki: „Taki san tru.” A e taki sosrefi: „No lei gi makandra.” Ala ten Yehovah e taki san tru, èn a e fruwakti taki wi e du dati tu.​—Efeisesma 4:25; Kolosesma 3:9.