No tron wan fufuruman noiti!

OITI wan sma fufuru wan sani fu yu?— Fa yu ben firi di dati pasa?— A sma di ben fufuru a sani ben de wan fufuruman, èn nowan sma no lobi wan fufuruman. Fa yu denki wan sma e tron wan fufuruman? A gebore nanga a firi fu fufuru sani?—

No so langa pasa, wi leri taki sma e gebore nanga sondu. Sobun, wi alamala na sondusma. Ma nowan sma e gebore leki wan fufuruman. Wan fufuruman ben kan komoto fu wan bun famiri. En papa nanga mama, den brada fu en, nanga den sisa fu en ben kan de sma di no e bedrigi trawan. Ma te a sma srefi e angri fu abi sani soleki moni nanga den sani di moni kan bai, dan dati ben kan meki a tron wan fufuruman.

Suma yu denki ben de a fosi fufuruman?— Meki wi poti prakseri na a tori dati. Di a Bigi Leriman ben de na hemel, dan a ben sabi a sma dati. A fufuruman dati ben de wan engel. Ma ala den engel di Gado meki ben de volmaakti engel, sobun fa a du kon taki na engel dati tron wan fufuruman?— We, soleki fa wi leri na ini kapitel 8 fu a buku disi, dan na engel disi ben wani wan sani di no ben de fu en. Yu sabi ete san a ben wani?—

Baka di Gado meki a fosi man nanga uma, dan na engel dati ben wani taki den anbegi en. A no ben abi reti tapu na anbegi fu den. Gado wawan ben musu kisi na anbegi fu den. Ma na engel dati fufuru na anbegi! A ben kisi Adam nanga Eva so fara taki den anbegi en, èn na so a tron wan fufuruman. A tron Satan Didibri.

San e meki taki wan sma e kon tron wan fufuruman?— A sma e angri fu abi wan sani di no de fu en. Na angri disi kan kon so tranga, taki a kan meki bun sma srefi du takru sani. Son leisi, den sma dati di e tron fufuruman no e sori berow èn no e du bun noiti moro. Wan fu den sma dati ben de wan apostel fu Yesus. A ben nen Yudas Iskariot.

Yudas ben sabi taki a no ben bun fu fufuru bika a ben kon leri sabi a Wet fu Gado sensi di a ben de wan pikin boi. A ben sabi taki wan leisi, Gado ben taki komoto fu hemel srefi, èn a ben taigi en pipel: „Yu no musu fufuru” (Exodus 20:15). Di Yudas gro kon bigi, dan a miti a Bigi Leriman, èn a tron wan disipel fu en. Bakaten, Yesus teki Yudas srefi fu tron wan fu den twarfu apostel fu en.

Yesus nanga den apostel fu en ben e go na presi makandra. Den ben e nyan nanga makandra. Èn ala moni di a grupu ben abi ben tan na ini wan kisi. Yesus ben gi Yudas a frantwortu fu luku a kisi dati. A no de fu taki dati a moni no ben de fu Yudas. Ma yu sabi san Yudas du baka wan pisi ten?—

Yudas bigin teki moni na ini a kisi, aladi a no ben abi primisi fu du dati. A ben e teki moni te den tra apostel no ben e luku, èn a ben e suku fasi srefi fu kan kisi moro moni. Te fu kaba, soso moni ben de na en ede. Meki wi luku san ben de a bakapisi fu a takru angri disi, wan tu dei nomo bifo sma kiri a Bigi Leriman.

Maria, a sisa fu Yesus mati Lasarus, ben teki wan diri sortu oli èn a kanti en na tapu den futu fu Yesus. Ma Yudas kragi fu a sani dati. Yu sabi fu san ede?— A ben feni taki den ben musu seri na oli so taki den ben kan gi pôtisma a moni. Ma fu taki en leti, a ben wani taki moro moni ben musu kon na ini a kisi, so taki a ben kan fufuru en.​—Yohanes 12:1-6.

Yesus taigi Yudas fu no trobi Maria, di ben sori so furu switifasi. Yudas no ben lobi di Yesus taigi en dati, èn fu dati ede a go na den edeman fu den priester, di ben de feanti fu Yesus. Den ben wani grabu Yesus, ma den ben wani du dati na neti so taki sma no ben o man si den.

Yudas taigi den priester: ’Efu un gi mi moni, dan mi sa taigi unu fa un kan grabu Yesus. Omeni moni unu o gi mi?’

Den priester piki en: ’Wi sa gi yu dritenti solfru sensi.’​—Mateyus 26:14-16.

Yudas teki a moni. A ben de neleki a ben e seri a Bigi Leriman gi den man dati! Yu kan bribi taki wan sma kan du so wan takru sani?— We, na dati e pasa te wan sma e tron wan fufuruman èn e fufuru moni. A sma dati lobi moni moro leki a lobi tra sma, iya, moro leki a lobi Gado.

Kande yu sa taki: ’Noiti mi sa lobi wan sani moro leki mi lobi Yehovah Gado.’ A bun taki yu abi a denki dati. A kan taki Yudas ben abi a denki dati di Yesus teki en leki wan apostel. Kande tra sma di tron fufuruman ben abi a denki dati tu. Meki wi taki fu wan tu fu den sma dati.

Wan fu den ben de wan futuboi fu Gado èn a ben nen Akan. A man disi ben libi wan langa ten bifo a Bigi Leriman ben gebore. Akan ben si wan moi dyakti, wan pisi gowtu, nanga wan tu solfru sensi. Den no ben de fu en. Bijbel e taki dati den ben de fu Yehovah, bika den sani dati ben teki puru fu den feanti fu Gado pipel. Ma Akan ben wani den sani disi so te taki a fufuru den.​—Yosua 6:19; 7:11, 20-22.

Luku wan tra eksempre. Langa ten pasa, Yehovah ben teki David fu tron kownu fu a pipel fu Israel. Wan dei, David bigin luku a moi uma Batseiba. A tan luku Batseiba èn a tan prakseri fu tyari en go na en oso neleki a ben de en wefi. Ma na uma disi ben de a wefi fu Uria. San David ben musu du?—

David ben musu puru a prakseri na en ede fu abi Batseiba leki en wefi. Ma a no du dati. Sobun, David tyari en go na en oso. Èn baka dati, a seti sani so taki sma ben o kiri Uria. Fu san ede David ben du den takru sani disi?— Fu di a ben tan angri fu abi wan uma di ben de fu wan tra man.​—2 Samuel 11:2-27.

Fu di David ben firi sari fu a sani di a ben du, meki Yehovah gi pasi fu a tan na libi. Ma now, wan lo problema ben e miti David. En manpikin Absalom ben wani teki David en presi leki kownu. Sobun, te sma ben e kon na David, dan Absalom ben gwenti fu brasa den èn bosi den. Bijbel e taki: ’Absalom ben e tan fufuru na ati fu den man fu Israel.’ A kisi den sma so fara taki den ben wani en leki kownu na presi fu David.​—2 Samuel 15:1-12.

Oiti yu ben wani wan sani srefisrefi, neleki Akan, David, nanga Absalom?— Efu a sani dati na fu wan tra sma, èn yu e teki en sondro primisi, dan yu e fufuru. Yu sabi ete san a fosi fufuruman, Satan, ben wani?— A ben wani taki sma ben musu anbegi en na presi fu Gado. Sobun, Satan ben e fufuru di a kisi Adam nanga Eva so fara taki den gi yesi na en.

Te wan sma abi wan sani di de fu en, dan a abi a reti fu taki suma kan gebroiki a sani dati. Fu gi wan eksempre, kande yu e go prei nanga tra pikin na den oso. A ben o fiti fu teki wan sani drape tyari go na yu oso?— Yu kan du dati soso te a papa noso mama fu den pikin dati e gi yu primisi fu du so. Efu yu e teki wan sani tyari go na oso sondro fu aksi den, dan yu e fufuru.

Fu san ede yu ben kan bigin prakseri fu fufuru wan sani?— Fu di yu wani wan sani di no de fu yu. Kande wan tra sma no e si taki yu e teki a sani, ma suma e si yu?— Yehovah Gado. Èn wi musu memre taki Gado no lobi te wan sma e fufuru. Fu dati ede yu musu lobi Gado nanga tra sma, bika dati sa yepi yu fu no tron wan fufuruman noiti.